ក្រសួងទេសចរណ៍ និងក្រុមហ៊ុនមិត្តហ្វូន ចុះអនុស្សរណៈនៃការយោគយល់គ្នាបើកសម្ពោធកម្មវិធីថ្មី និងពុំធ្លាប់មានកន្លងមក «ស្រុកខ្ញុំ ម្ហូបខ្ញុំ» ដើម្បីជំរុញសក្ដានុពលទេសចរណ៍ គោលដៅទេសចរណ៍ និងម្ហូបអាហារខ្មែរ

ការរួមបញ្ចូលគ្នារវាងចក្ខុវិស័យអភិវឌ្ឍន៍ទេសចរណ៍ជាតិ របស់ ក្រសួងទេសចរណ៍ និងបណ្តាញតភ្ជាប់ឌីជីថលគ្របដណ្តប់ផ្ទៃប្រទេសរបស់ ក្រុមហ៊ុន មិត្តហ្វូន យុទ្ធនាការនេះត្រូវបានបង្កើតឡើងក្នុងគោលបំណងរំលេចនូវតំបន់ទេសចរណ៍ និងរសជាតិម្ហូបអាហារប្រចាំតំបន់ ជួយពង្រឹងសមត្ថភាពអាជីវកម្មធុនតូច និងមធ្យម (SMEs) ព្រមទាំងជំរុញការអភិវឌ្ឍសេដ្ឋកិច្ចសហគមន៍ប្រកបដោយចីរភាព។

ក្នុងនាមជាដៃគូឌីជីថលយុទ្ធសាស្ត្រដ៏មោះមុត ក្រុមហ៊ុនមិត្តហ្វូន បានផលិត និងផ្សព្វផ្សាយកម្មវិធីដំណើរទេសចរណ៍លើប្រព័ន្ធឌីជីថលចំនួន 7 វគ្គ ដែលផ្តោតលើការបង្ហាញនូវម្ហូបអាហារប្រចាំតំបន់ រំលេចនូវកេរដំណែលម្ហូបអាហារខ្មែរដ៏មានតម្លៃ សិល្បករណែនាំដំណើរទេសចរណ៍ និងដំណើររឿងដ៏ទាក់ទាញជ្រាបចូលក្នុងសហគមន៍នៅតាមបណ្តាខេត្តទាំង 7 នៃប្រទេសកម្ពុជា។

ក្នុងឱកាសនោះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ក៏បានលើកឡើងពីចំណុចសំខាន់នៃកម្មវិធីនេះ ក្នុងការប្រើប្រាស់ឥទ្ធិពលវប្បធម៌ អំណាចទន់ និងការចូលរួមរបស់យុវជនថា៖

«ម្ហូបអាហារ គឺជាផ្នែកមួយយ៉ាងសំខាន់នៃអត្តសញ្ញាណទេសចរណ៍ និងជាអំណាចទន់ (Soft Power) ដ៏មានឥទ្ធិពលរបស់កម្ពុជា។ កម្មវិធី «ស្រុកខ្ញុំ ម្ហូបខ្ញុំ» គឺមិនត្រឹមតែជាកម្មវិធីផ្សព្វផ្សាយម្ហូបអាហារប៉ុណ្ណោះទេ ប៉ុន្តែនេះជាការបើកឱកាសឱ្យប្រជាជនកម្ពុជា ជាពិសេសក្រុមអ្នកបង្កើតមាតិកាវ័យក្មេង ឱ្យក្លាយជាទូតសុច្ឆន្ទៈផ្សព្វផ្សាយពីសហគមន៍របស់ខ្លួនដោយទំនុកចិត្ត។ ។ តាមរយៈការប្រើប្រាស់បណ្តាញឌីជីថល ដើម្បីចែករំលែករឿងរ៉ាវពិតៗអំពីស្រុកកំណើត និងវប្បធម៌របស់យើង កិច្ចសហប្រតិបត្តិការរវាងក្រសួងទេសចរណ៍ និងក្រុមហ៊ុន មិត្តហ្វូន នឹងចូលរួមគាំទ្រដល់អាជីវកម្មក្នុងស្រុក ជំរុញកំណើនទេសចរណ៍សហគមន៍ ព្រមទាំងពង្រឹងកេរ្តិ៍ឈ្មោះរបស់កម្ពុជាលើឆាកអន្តរជាតិ ជាគោលដៅទេសចរណ៍ប្រកបដោយសុវត្ថិភាព និងសម្បូរបែបដោយវប្បធម៌»។

លោក Cao Manh Duc នាយកប្រតិបត្តិនៃក្រុមហ៊ុន មិត្តហ្វូន បានបង្ហាញពីការប្តេជ្ញាចិត្តដ៏មុតមាំរបស់ក្រុមហ៊ុន ក្នុងការចូលរួមអភិវឌ្ឍន៍ប្រទេសជាតិថា៖

«ខណៈដែលសេដ្ឋកិច្ចឌីជីថលកំពុងបង្កើតឱកាសរីកចម្រើនថ្មីៗ វិស័យទេសចរណ៍បានប្រែក្លាយជាស្ពានតភ្ជាប់អត្តសញ្ញាណវប្បធម៌ជាតិទៅកាន់ពិភពលោក។ សម្រាប់ ក្រុមហ៊ុន មិត្តហ្វូន កម្មវិធីនេះបានបង្ហាញពីទស្សនវិស័យស្នូលរបស់យើង នោះគឺភាពរីកចម្រើនប្រកបដោយចីរភាពរបស់ក្រុមហ៊ុន ត្រូវតែដើរទន្ទឹមគ្នាជាមួយនឹងការអភិវឌ្ឍរបស់ប្រទេសជាតិ។ តាមរយៈកម្មវិធី «ស្រុកខ្ញុំ ម្ហូបខ្ញុំ» យើងបានទាញយកប្រយោជន៍ពីបច្ចេកវិទ្យា និងបណ្តាញតភ្ជាប់របស់យើង ដើម្បីផ្សព្វផ្សាយបេតិកភណ្ឌវប្បធម៌ដ៏ផូរផង់របស់ខ្មែរ ទៅកាន់ភ្ញៀវទេសចរ និងបង្កើតនូវផលប្រយោជន៍ពិតប្រាកដជូនដល់ប្រជាសហគមន៍»។

កាលវិភាគចាក់ផ្សាយកម្មវិធីប្រចាំសប្តាហ៍

កម្មវិធីនេះ មានចំនួន 7 វគ្គ ដែលនឹងត្រូវចាក់ផ្សាយរៀងរាល់ថ្ងៃសៅរ៍ ចាប់ពីថ្ងៃទី 12 ខែកញ្ញា ឆ្នាំ 2026 តទៅ នៅលើបណ្តាញទំនាក់ទំនងសង្គមផ្លូវការ និងប្រព័ន្ធឌីជីថលនានារបស់ក្រុមហ៊ុន មិត្តហ្វូន និងផេកហ្វេសប៊ុកផ្លូវការ របស់ក្រសួងទេសចរណ៍៖

ក្រសួងទេសចរណ៍ និងក្រុមហ៊ុនមិត្តហ្វូន សូមឱ្យសាធារណៈជន ក៏ដូចជាទស្សនិកជនទាំងក្នុងនិងក្រៅប្រទេស ចូលរួមគាំទ្រ និងតាមដានទស្សនា ក៏ដូចជាជួយផ្សព្វផ្សាយចែករំលែកកម្មវិធីនេះឱ្យបានទូលំទូលាយ ដើម្បីរួមគ្នាស្វែងយល់ពីមរតកវប្បធម៌ម្ហូបអាហារខ្មែរដ៏សម្បូរបែប ឱជារសនៃការចម្អិនប្រចាំតំបន់ដែលផ្សារភ្ជាប់បេះដូងដ៏ជ្រាលជ្រៅ តំបន់ទេសចរណ៍ដ៏មានសក្តានុពល ព្រមទាំងរបៀបនៃការរស់នៅ និងការប្រកបរបអាជីវកម្មដ៏សាមញ្ញរបស់ប្រជាសហគមន៍ នៅតាមបណ្តាខេត្តនានានៃព្រះរាជាណាចក្រកម្ពុជា។