ដើម្បីចូលរួមស្វែងរកដំណោះស្រាយ និងសំដៅធ្វើឱ្យស្ថានភាពត្រលប់ទៅរកប្រក្រតីភាពឡើងវិញ និងដើម្បីទប់ស្កាត់ការអូសបន្លាយ ប្រទេសជាសមាជិកអាស៊ាន បានតែងតាំង ឯកឧត្តម ប្រាក់ សុខុន ជាប្រេសិតពិសេសរបស់ប្រធានអាស៊ាន ស្តីពីមីយ៉ាន់ម៉ា ហើយក្នុងនាមជាប្រធានអាស៊ាន កម្ពុជា បានអំពាវនាវឲ្យអាជ្ញាធរមីយ៉ាន់ម៉ាជួយសម្រួលបេសកកម្មនានា ដើម្បីអាចឲ្យប្រសិតពិសេសអាស៊ានអាចធ្វើដំណើរទស្សនកិច្ចជាលើកដំបូងទៅកាន់មីយ៉ាន់ម៉ា ក្នុងពេលឆាប់ៗខាងមុខនេះតាមដែលអាចធ្វើទៅបាន។
យោងតាមសេចក្ដីថ្លែងការណ៍របស់ប្រធានអាស៊ានចុះថ្ងៃទី២ ខែកុម្ភៈ ស្ដីអំពី ស្ថានភាពនៅមីយ៉ាន់ម៉ា ប្រទេសសមាជិកអាស៊ានបានគូសបញ្ជាក់អំពីភាពប្រញាប់ប្រញាល់នៃការបញ្ចប់ អំពើហិង្សាជាបន្ទាន់ និងសម្រាប់គ្រប់ភាគីទាំងអស់ឲ្យមានការប្រកាន់យកភាពអត់ធ្មត់ឱ្យខ្ពស់បំផុត ក៏ដូចជាការធានាបាននូវការចែកចាយជំនួយមនុស្សធម៌ប្រកបដោយសុវត្ថិភាព និងទាន់ពេលវេលាទៅដល់ប្រជាជន ដែលត្រូវការជំនួយបំផុត ដោយឈរលើមូលដ្ឋាននៃគោលការណ៍មនុស្សធម៌ អព្យាក្រឹតភាព ភាពមិនលំអៀង និងឯករាជ្យ។
ប្រទេសជាសមាជិកអាស៊ានក៏បានជំរុញឲ្យអាជ្ញាធរមីយ៉ាន់ម៉ាចាត់សកម្មភាពជាក់លាក់ ដើម្បីអនុវត្តប្រកបដោយប្រសិទ្ធភាព និងពេញលេញនូវកិច្ចព្រមព្រៀងជាឯកច្ឆន្ទ៥ចំណុច ដែលបានសម្រេចនៅក្នុងកិច្ចប្រជុំរបស់ថ្នាក់ដឹកនាំអាស៊ានកាលពីថ្ងៃទី ២៤ ខែមេសាឆ្នាំ២០២១។
អត្ថបទគួរអាន
កិច្ចព្រមព្រៀងជាឯកច្ឆន្ទទាំង៥ចំណុចនោះ រួមមាន៖ ទី១.ត្រូវបញ្ចប់អំពើហិង្សា, ទី២.ត្រូវមានការសន្ទនារកដំណោះស្រាយប្រកបដោយសន្តិវិធីរវាងភាគីទាំងអស់, ទី៣.អនុញ្ញាតវត្តមានប្រេសិតពិសេសអាស៊ានដើម្បីជួយសម្របសម្រួលការសន្ទនារកដំណោះស្រាយ, ទី៤. ការបើកផ្លូវឲ្យមានការផ្តល់ជំនួយ និងទី៥. ត្រូវឲ្យមានដំណើរទស្សនកិច្ចរបស់ប្រេសិតពិសេសទៅកាន់ប្រទេសមីយ៉ាន់ម៉ា។
កន្លងមក សម្តេចតេជោហ៊ុន សែន នាយករដ្ឋមន្ត្រីនៃកម្ពុជា ក៏បានជួបពិភាក្សាជាមួយលោក មីន អ៊ុងឡាំង មេដឹកនាំយោធាមីយ៉ាន់ម៉ាចំនួន ២លើក រួចមកហើយ ពាក់ព័ន្ធបញ្ហានៅមីយ៉ាន់ម៉ា ដោយមេដឹកនាំយោធារូបនេះ ក៏បានសន្យាអនុវត្តបទឈប់បាញ់រហូតដល់ចុងឆ្នាំ២០២២។ ទោះយ៉ាងណា រហូតមកដល់ពេលនេះ ស្ថានភាពនៅមីយ៉ាន់ម៉ា ហាក់មិនទាន់មានការថមថយនោះទេ។
សូមបញ្ជាក់ថា រដ្ឋប្រហារដែលធ្វើឡើងកាលពីថ្ងៃទី១ខែកុម្ភៈឆ្នាំមុន បានក្តិចត្រួយលទ្ធិប្រជាធិបតេយ្យដ៏ក្មេងខ្ចីរបស់មីយ៉ាន់ម៉ា ក្រោយគណៈបក្សសម្ព័ន្ធជាតិដើម្បីប្រជាធិបតេយ្យ លោកស្រី ស៊ូជី ឈ្នះឆ្នោតយ៉ាងភ្លូកទឹកភ្លូកដី មិនទាន់បានមួយអាណត្តិផង។ ចាប់តាំងពីថ្ងៃធ្វើរដ្ឋប្រហារ ទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី ការបង្ក្រាប ពីសំណាក់កងកម្លាំទៅលើក្រុមអ្នកតវ៉ាបានធ្វើឲ្យមានមនុស្សជាង ១៥០០នាក់ត្រូវបានស្លាប់ និងជាច្រើននាក់ទៀតរងរបួស៕
None
