មេដឹកនាំអាស៊ានយល់ព្រមសហការគ្នា ក្នុងការប្រយុទ្ធប្រឆាំងនឹងការបោកប្រាស់តាមប្រព័ន្ធអ៊ីនធឺណែត

មេដឹកនាំអាស៊ានបានជួបប្រជុំគ្នានៅទីក្រុង ឡាបូន បាចូ (Labuan Bajo) ប្រទេសឥណ្ឌូនេស៊ី ដើម្បីបង្ហាញអំពីការព្រួយបារម្ភរួមគ្នាចំពោះ«ការកើនឡើងនៃការរំលោភបំពានដោយប្រើបច្ចេកវិទ្យាក្នុងការរៀបចំការជួញដូរមនុស្សនៅក្នុងតំបន់អាស៊ីអាគ្នេយ៍និងនៅទូទាំងពិភពលោក ជាអ្វីដែលរីកសាយតាមរយៈការប្រើប្រាស់និងការប្រើដោយបំពាននូវប្រព័ន្ធផ្សព្វផ្សាយសង្គមនិងវេទិកាអនឡាញផ្សេងទៀត។ នេះបើយោងតាមសំណៅព្រាងនៃសេចក្តីថ្លែងការណ៍របស់មេដឹកនាំអាស៊ាន។

សេចក្តីព្រាងនោះបានឱ្យដឹងទៀតថា ការប្រើប្រាស់ប្រព័ន្ធផ្សព្វផ្សាយសង្គមនិងវេទិកាផ្សេងទៀតដោយក្រុមឧក្រិដ្ឋជនតាមអ៊ីនធឺណិត បានធ្វើឱ្យមានភាពស្មុគស្មាញដល់កិច្ចខិតខំប្រឹងប្រែងប្រឆាំងនឹងការជួញដូរមនុស្ស ក៏ដូចជាបានបង្កើនចំនួននិងទំហំនៃសំណុំរឿងផងដែរ។

ការបោកប្រាស់តាមប្រព័ន្ធអ៊ីនធឺណិតបានក្លាយជាបញ្ហាចម្បងនៅក្នុងតំបន់ ព្រោះបើតាមរបាយការណ៍ជាច្រើន ប្រជាជនមកពីអាស៊ីនិងតំបន់ផ្សេងទៀតត្រូវបានទាក់ទាញឱ្យទៅធ្វើការនៅក្នុងប្រទេសនានា ដូចជាមីយ៉ាន់ម៉ានិងកម្ពុជា។ ទោះបីជាយ៉ាងណាក៏ដោយ ជារឿយៗពួកគេបានរកឃើញថា ពួកគេជាប់នៅក្នុងទាសភាពនិម្មិត ហើយត្រូវបានបង្ខំឱ្យចូលរួមក្នុងការបោកប្រាស់ដែលយកអ្នកប្រើប្រាស់អ៊ីនធឺណិតជាគោលដៅ។

បណ្តាញបោកប្រាស់តាមអ៊ីនធឺណិតទាំងនេះទៀតសោធ ជារឿយៗមានទំនាក់ទំនងជាមួយឧក្រិដ្ឋកម្មឆ្លងដែនដែលត្រូវបានបង្កើតឡើងនៅក្នុងប្រទេសដែលមានការអនុវត្តច្បាប់ខ្សោយ ហើយទាក់ទាញកម្មករវ័យក្មេងដោយការសន្យាថានឹងទទួលបានប្រាក់ចំណូលខ្ពស់។ បន្ទាប់មក កម្មករនិយោជិតត្រូវដាក់ឱ្យនៅដាច់ដោយឡែក និងរងការគំរាមកំហែងដោយប្រើអំពើហិង្សា លើកលែងតែពួកគេជោគជ័យក្នុងការបោកប្រាស់ជនរងគ្រោះដែលអាចទាក់ទងតាមទូរស័ព្ទបាន ឱ្យផ្ទេរប្រាក់ទៅក្នុងគណនីធនាគារនៅក្រៅប្រទេស។

សំណៅព្រាងសេចក្តីថ្លែងការណ៍បាននិយាយទៀតថា មេដឹកនាំអាស៊ានបានយល់ព្រមបង្កើនកិច្ចសហប្រតិបត្តិការក្នុងការគ្រប់គ្រងព្រំដែន ការស៊ើបអង្កេត ការអនុវត្តច្បាប់និងការកាត់ទោស ព្រមទាំងការធ្វើមាតុភូមិនិវត្តន៍ជនរងគ្រោះទាំងនោះផងដែរ។ លើសពីនេះទៀត សេចក្ដីថ្លែងការណ៍ព្រាងនោះក៏ជំរុញឱ្យមានការកែលម្អកិច្ចខិតខំបង្ការនៅថ្នាក់ជាតិដែរ ក្នុងនោះមានយុទ្ធនាការផ្សព្វផ្សាយការយល់ដឹងជាសាធារណៈឱ្យកាន់តែប្រសើរឡើង និងការបង្កើនការប្រើប្រាស់បច្ចេកវិទ្យាទំនើប។

កាលពីថ្ងៃអាទិត្យ អាជ្ញាធរឥណ្ឌូនេស៊ីបាននិយាយថា ពលរដ្ឋរបស់ពួកគេចំនួន ២០ នាក់ត្រូវបានដោះលែងនៅក្នុងក្រុង មីយ៉ាវ៉ាឌី ប្រទេសមីយ៉ាន់ម៉ា បន្ទាប់ពីត្រូវបានគេនាំទៅមីយ៉ន់ម៉ា និងបង្ខំឲ្យធ្វើការបោកប្រាស់តាមអ៊ីនធឺណិត។ ដោយឡែក កម្មករផ្សេងទៀតមកពីអាស៊ីអាគ្នេយ៍ក៏រងគ្រោះដែរ។ ថ្មីៗនេះ អាជ្ញាធរហ្វីលីពីនបាននិយាយថា ជនរងគ្រោះហ្វីលីពីនមួយចំនួនក៏ត្រូវបានជួយសង្គ្រោះពីប្រទេសមីយ៉ាន់ម៉ាដូចគ្នាដែរ ហើយនឹងត្រូវបញ្ជូនត្រឡបទៅប្រទេសកំណើតវិញ។

ទន្ទឹមគ្នានេះ រដ្ឋមន្ត្រីឥណ្ឌូណេស៊ី លោក មូហាមេដ ម៉ាហ្វូដ ដែលធ្វើការលើបញ្ហានយោបាយ ច្បាប់ និងសន្តិសុខ បានប្រាប់អ្នកយកព័ត៌មានកាលពីថ្ងៃអង្គារថា វាមានការលំបាកសម្រាប់ប្រទេសឥណ្ឌូនេស៊ី និងប្រទេសដទៃទៀតនៅក្នុងតំបន់ ក្នុងការធ្វើការជាមួយប្រទេសមីយ៉ាន់ម៉ាដែលគ្រប់គ្រងដោយរបបយោធាតាំងពីឆ្នាំ២០២១ ដើម្បីដោះស្រាយបញ្ហាឧក្រិដ្ឋកម្មតាមអ៊ីនធឺណិតនិងជួយជនរងគ្រោះ។ លោកបាននិយាយថា អាស៊ានចាំបាច់ត្រូវធ្វើឱ្យមានការវិវឌ្ឍលើសន្ធិសញ្ញាបត្យាប័នក្នុងតំបន់ដែលបានស្នើឡើងជាយូរមកហើយ ដោយវានឹងជួយឱ្យអាជ្ញាធរកាត់ទោសជនល្មើសកាន់តែលឿន និងទប់ស្កាត់ការកើនឡើងបន្ថែមទៀតនៃឧក្រិដ្ឋកម្មតាមអ៊ីនធឺណិតនេះ៕