ស្ថាប័នស្រាវជ្រាវម៉ាក្រូសេដ្ឋកិច្ចអាស៊ានបូកបី ព្យាករថា កម្ពុជានឹងសម្រេចបានកំណើនសេដ្ឋកិច្ច៥,៦%នៅឆ្នាំ២០២៤ មុនកើនឡើងដល់៥,៩%នៅឆ្នាំ២០២៥

លោក ជីនហូ ជ័រ (Jinho Choi ) អ្នកវិភាគសេដ្ឋកិច្ច នៃស្ថាប័នស្រាវជ្រាវម៉ាក្រូសេដ្ឋកិច្ចអាស៊ានបូកបី(AMRO) បានព្យាករថា សេដ្ឋកិច្ចកម្ពុជានឹងបន្តកើនឡើងពី ៥% នៅក្នុងឆ្នាំ២០២៣ ដល់ ៥,៦% នៅឆ្នាំ២០២៤ ហើយបន្តប្រសើរឡើងថែមទៀតដល់ ៥,៩% នៅឆ្នាំ២០២៥ខាងមុខ។ បើតាមអ្នកជំនាញសេដ្ឋកិច្ចរូបនេះ កំណើនសេដ្ឋកិច្ចកម្ពុជានេះ នឹងជួយគាំទ្រដោយការស្ទុះឡើងវិញនៃវិស័យឧស្សាហកម្មកាត់ដេរ ការកើនឡើងនៃការនាំចេញផលិតផលផ្សេងៗទៀត និង ការបន្តការស្ទុះងើបឡើងវិញនៃវិស័យទេសចរណ៍។

ការព្យាកររបស់សេដ្ឋវិទូរូបនេះធ្វើឡើងក្រោយលោកបានដឹកនាំក្រុមការងារចុះមកទស្សនកិច្ចសិក្សា និងពិគ្រោះយោបល់ប្រចាំឆ្នាំនៅកម្ពុជាពីថ្ងៃទី ២ ដល់ទី ១៣ ខែឧសភា ឆ្នាំ២០២៤ កន្លងទៅថ្មីៗនេះ។

របាយការណ៍សិក្សារបស់ស្ថាប័នដែលមានមូលដ្ឋាននៅសិង្ហបុរីនេះ បានរកឃើញថា សន្ទស្សន៍អតិផរណានៃតម្លៃទំនិញប្រើប្រាស់ (CPI) នៅកម្ពុជា បានធ្លាក់ចុះមកនៅត្រឹមតែ ២,១% ក្នុងឆ្នាំ ២០២៣ បន្ទាប់ពីបានស្ទុះឡើងរហូតដល់កម្រិត ៧,៨% នៅក្នុងខែមិថុនា ឆ្នាំ២០២២ ហើយនៅក្នុងឆ្នាំ២០២៤ នេះ វាអាចឡើងបន្តិចវិញក្នុងរង្វង់ ២,៥% និង ២,៦% នៅឆ្នាំ២០២៥។

ដើម្បីធានាបាននូវកំណើនប្រកបដោយភាពធន់រយៈពេលវែង ស្ថាប័ននេះបានលើកទឹកចិត្តឲ្យកម្ពុជា ផ្តល់អាទិភាពដល់ការកសាងសារពើពន្ធឡើងវិញ និងការពារស្ថិរភាពហិរញ្ញវត្ថុ ពីព្រោះកម្ពុជាកំពុងប្រឈមមុខនឹងហានិភ័យរយៈពេលខ្លី ដែលភាគច្រើនជាកត្តាខាងក្រៅ ក៏ដូចជាភាពងាយរងគ្រោះក្នុងស្រុកដែលអាចរារាំងដល់ការស្តារឡើងវិញនៃសេដ្ឋកិច្ច ក្រោយរងរបួសដោយសារកូវីដ-១៩ ។ ក្រៅពីនោះកម្ពុជា ក៏ត្រូវបង្កើនការអភិវឌ្ឍហេដ្ឋារចនាសម្ព័ន្ធរូបវន្ត និងឌីជីថល ក៏ដូចជាពន្លឿនការធ្វើពិពិធកម្មការនាំចេញ និង លើកកម្ពស់តួនាទីរបស់កម្ពុជា ក្នុងខ្សែច្រវាក់តម្លៃសកលផងដែរ៕

ដោយៈ សរ សុជាតិ