ក្នុងនាមជាប្រសិតពិសេសប្រធានអាស៊ាន ឯកឧត្តម ប្រាក់ សុខុន បានថ្លែងនៅក្នុងសន្និសីទ សារព័ត៌មានក្រោយបញ្ចប់កិច្ចប្រជុំចង្អៀតរដ្ឋមន្ត្រីការបរទេសអាស៊ានថា ឯកឧត្តម នឹងអញ្ចើញទៅទស្សនកិច្ចនៅប្រទេសមីយ៉ាន់ម៉ា នៅសប្ដាហ៍ទី២ ខែមីនាខាងមុខនេះហើយ ដោយដំណើរទស្សនកិច្ចនេះ នឹងផ្សាភ្ជាប់ជាមួយបេសកកម្មចូលជួបជាមួយគ្រប់ភាគីពាក់ព័ន្ធ និងជំនួយមនុស្សធម៌សម្រាប់ប្រទេសមីយ៉ាន់ម៉ាជាដើម។
ដំណើរទស្សនកិច្ចនេះ គឺជាដំណើរទស្សនកិច្ចលើកដំបូងសម្រាប់ប្រេសិតពិសេសប្រធានអាស៊ាន នៅក្នុងប្រទេសមីយ៉ាន់ម៉ា បន្ទាប់ពីដំណើរទស្សនកិច្ចរបស់សម្តេចតេជោ ហ៊ុន សែន នាយកដ្ឋមន្ត្រីនៃកម្ពុជាបានធ្វើឡើងកាលពីខែមករា ឆ្នាំ២០២២។
តាមការគូសបញ្ជាក់ របស់ឯកឧត្តម ប្រាក់ សុខុន ឯកឧត្តម ក៏នឹងស្នើជួបជាមួយនឹង លោក មីន អោងឡាំង មន្ត្រីជាន់ខ្ពស់រដ្ឋាភិបាលមីយ៉ាន់ម៉ា រួមទាំងឥស្សរជនផ្សេងទៀត ដែលខាងរដ្ឋាភិបាលក្រុងណៃពិដោរ ជួយសម្របសម្រួលឲ្យជួបផងដែរ។ បន្ថែមពីនេះ ក៏នឹងមានការផ្ដល់ជូនជំនួយរបស់អាស៊ាន ទៅកាន់ប្រជាជនមីយ៉ាន់ម៉ា ដែលកំពុងត្រូវការផងដែរ។
អត្ថបទគួរអាន
ដោយឡែក សម្រាប់កិច្ចប្រជុំចង្អៀតរដ្ឋមន្ត្រីការបរទេសអាស៊ាន ដែលបានធ្វើឡើងនៅរាជធានីភ្នំពេញ នៅថ្ងៃព្រហស្បតិ៍ សប្ដាហ៍នេះដែរ បើទោះបីជា ប្រទេសមីយ៉ាន់ម៉ាមិនបានចូលរួមផ្ទាល់ ឬចាត់អ្នកតំណាងឲ្យចូលរួមក៏ដោយ ប៉ុន្ដែ បើតាមឯកឧត្តម ប្រាក់ សុខុន ប្រទេសមីយ៉ាន់ម៉ា ក៏បានចូលស្ដាប់កិច្ចប្រជុំនេះ តាមរយៈតំណ Link ក្នុងក្របខណ្ឌអ្នកសង្កេតការណ៍ផងដែរ។
សូមបញ្ជាក់ថា កិច្ចប្រជុំរដ្ឋមន្ត្រីការបរទេសអាស៊ានត្រូវបានរៀបចំធ្វើឡើងរយៈពេល ៣ថ្ងៃ ចាប់ពីថ្ងៃទី១៥ ដល់ថ្ងៃ១៧ខែកុម្ភៈ នៅរាជធានីភ្នំពេញ ក្រោយការចូលរួមដោយផ្ទាល់ និងតាមប្រព័ន្ធវីដេអូអានឡាញ ពីប្រទេសចំនួន៩ជាសមាជិក និងអវត្តមានប្រទេសមីយ៉ាន់ម៉ា។ ក្នុងនោះ មានប្រទេសចំនួន៧ បានចូលរួមប្រជុំដោយផ្ទាល់ និងប្រទេស២ទៀត គឺថៃ និងហ្វីលីពីនបានចូលរួមតាមប្រព័ន្ធវីដេអូ៕
None
