ការណ៍ដែលអូស្ត្រាលី ងាកចេញពីបារាំង ស្រវាក្រសោបអាមេរិក និងអង់គ្លេសបង្កើតសម្ព័ន្ធមិត្ត Aukusនោះ ក៏បានធ្វើឲ្យបារាំង ក្ដៅស្លឹកត្រចៀកមិនតិចនោះដែរ។ ទោះយ៉ាងណាតាមរយៈការស្វែងរកដំណោះស្រាយថ្មីនេះ ទីក្រុងកង់បេរ៉ា (Canberra) សង្ឃឹមថា នឹងអាចជួយជួសជុលភាពប្រេះឆារវាងប្រទេសទាំង២នេះឡើងវិញ។ នេះបើតាមការរាយការណ៍ដោយសារព័ត៌មានអន្តរជាតិធំៗជាច្រើន។
ប្រទេសអូស្ត្រាលីកាលពីឆ្នាំមុនបានលុបចោលការបញ្ជាទិញនាវាមុជទឹកជាមួយក្រុមហ៊ុនឧស្សាហកម្មផលិតសព្វាវុធបារាំង គឺក្រុមហ៊ុន Naval Group នៅក្នុងទំហំទឹកប្រាក់រាប់ពាន់លានដុល្លារអាមេរិក ហើយបានជំនួសមកវិញនូវកិច្ចព្រមព្រៀងជាមួយសហរដ្ឋអាមេរិក និងចក្រភពអង់គ្លេស ដែលជាសម្ព័ន្ធមិត្ត Aukusរបស់ខ្លួន។
ទង្វើនេះបានធ្វើឱ្យរដ្ឋាភិបាលក្រុងប៉ារីសខឹងសម្បារយ៉ាងខ្លាំង និងបានបង្កឱ្យមានវិបត្តិការទូតដែលមិនធ្លាប់មានពីមុនមកជាមួយអូស្ត្រាលី ព្រមទាំងធ្វើឱ្យប្រទេសចិនដែលជាមហាអំណាចកំពុងតែរះឡើងយ៉ាងត្រដែតនៅក្នុងតំបន់ឥណ្ឌូប៉ាស៊ីហ្វិក ក៏មានការខឹងសម្បារខ្លាំងផងដែរ ចំពោះការបង្កើតសម្ព័ន្ធមិត្ត Aukus ដែលមានអាមេរិក អង់គ្លេស និងអូស្ត្រាលីនេះ ដ្បិតថា កិច្ចព្រមព្រៀងនេះ ត្រូវមានចិនមើលឃើញថា អាចជាការគំរាមកំហែងដល់សន្ដិសុខតំបន់។
នាយករដ្ឋមន្ត្រីអូស្ត្រាលីលោក អេនថូនី អាល់បានីស (Anthony Albanese) បាននិយាយកាលពីថ្ងៃសៅរ៍ក្នុងសន្និសីទសារព័ត៌មាននៅទីក្រុងស៊ីដនីថា រដ្ឋាភិបាលរបស់លោកបានឈានដល់ការដោះស្រាយ«ដោយយុត្តិធម៌ និងសមធម៌»ជាមួយក្រុមហ៊ុនឧស្សាហកម្ម Naval Group។
សូមរំលឹកថា កាលពីឆ្នាំមុនរដ្ឋាភិបាលក្រុងកង់បេរ៉ាបានលុបចោលការបញ្ជាទិញនាវាមុជទឹកអនុសញ្ញាថ្មីមួយកងជាមួយក្រុមហ៊ុន Naval Group ដែលមានតម្លៃ ៤០ ពាន់លានដុល្លារអាមេរិកដែលបានចុះកិច្ចសន្យាទិញក្នុងឆ្នាំ២០១៦។
អត្ថបទគួរអាន
កិច្ចព្រមព្រៀងត្រីភាគី Aukus រួមមានអូស្ត្រាលី អាមេរិក និងអង់គ្លេសនោះ អនុញ្ញាតឲ្យអូស្ត្រាលីអាចទិញនាវាមុជទឹកដើរដោយថាមពលនុយក្លេអ៊ែរ ជាមួយប្រព័ន្ធបច្ចេកវិទ្យារបស់សហរដ្ឋអាមេរិក និងចក្រភពអង់គ្លេស។ លោក អាល់បានីស (Albanese) បាននិយាយថា ការដោះស្រាយបញ្ហាទាក់ទងនឹងការទិញនាវាមុជទឹកនៅពេលនេះ នឹងជួយឱ្យប្រទេសអូស្ត្រាលីឆ្ពោះទៅមុខក្នុងទំនាក់ទំនងរបស់ខ្លួនជាមួយបារាំង។
លោក Albanese បាននិយាយនៅក្នុងសេចក្តីថ្លែងការណ៍ដាច់ដោយឡែកមួយថា ដោយហេតុតែមានភាពធ្ងន់ធ្ងរនៃបញ្ហាប្រឈម ដែលអូស្ត្រាលីកំពុងតែប្រឈមមុខទាំងក្នុងតំបន់ និងសកលលោកនោះ ដូច្នេះហើយវាចាំបាច់ណាស់ដែលអូស្ត្រាលី និងបារាំងត្រូវរួបរួមគ្នាម្តងទៀតដើម្បីការពារគោលការណ៍ និងផលប្រយោជន៍រួមរបស់ប្រទេសទាំង២នេះ។
ប្រទេសអូស្ត្រាលី សហរដ្ឋអាមេរិក ប្រទេសបារាំង និងក្រុមប្រទេសដៃគូរបស់ខ្លួនបានសម្ដែងក្ដីកង្វល់របស់ពួកគេពីឥទ្ធិពលរបស់ប្រទេសចិន ដែលចេះតែកើនឡើងនៅក្នុងតំបន់ប៉ាស៊ីហ្វិកជាតំបន់មួយស្ថិតក្រោមអំណាចរបស់ពួកគេតាំងពីយូរយាមកហើយ ហើយក្ដីកង្វល់របស់ពួកគេបានកើនឡើងកាន់តែខ្លាំងក្រោយពីមហាយក្សចិន និងប្រទេសកោះសូឡូម៉ុនបានចុះហត្ថលេខាលើកតិការសញ្ញាសន្តិសុខមួយនៅក្នុងឆ្នាំនេះ។
លោក អាល់បានីស បាននិយាយថា ប្រទេសអូស្ត្រាលីបានសម្ដែងការគោរពយ៉ាងខ្លាំងចំពោះតួនាទីរបស់ប្រទេសបារាំង និងទំនាក់ទំនងដ៏សកម្មនៅក្នុងតំបន់ឥណ្ឌូប៉ាស៊ីហ្វិក។
លោកបានបន្ថែមថា លោកកំពុងតែទន្ទឹងរង់ចាំទទួលការអញ្ជើញរបស់ប្រធានាធិបតីបារាំងលោក អេម៉ាញូអែល ម៉ាក្រុង (Emmanuel Macron) ឱ្យទៅធ្វើទស្សនកិច្ចនៅទីក្រុងប៉ារីសផងដែរ៕
អត្ថបទ៖ សុខ ជា
None
