បន្ថែមពីនេះទៀត កិច្ចព្រមព្រៀងនេះ រួមបញ្ចូលទាំងការចូលរួមវគ្គបណ្តុះបណ្តាលវិជ្ជាជីវៈដោយមន្ត្រីយោធា មកពីកងកម្លាំងប្រដាប់អាវុធសិង្ហបុរី និងកងទ័ពរំដោះប្រជាជនចិន (PLA) ក៏ដូចជាដំណើរទស្សនកិច្ចសិក្សា និងការសន្ទនារវាងវិទ្យាស្ថានយោធាសិង្ហបុរី (SAFTI) និងបណ្ឌិត្យសភាវិទ្យាសាស្ត្រយោធាចិន (PLA) ថែមទៀតផង។
រដ្ឋមន្ត្រីការពារជាតិសិង្ហបុរី លោក អ៊ីង ងេនឆឹន (Ng Eng Hen) និងសមភាគីចិន ឧត្តមសេនីយ៍ វី ហ្វេង (Wei Fenghe) បានធ្វើជាសាក្សីក្នុងការចុះហត្ថលេខាលើកិច្ចព្រមព្រៀងស៊ីជម្រៅនេះ។
ក្រសួងការពារជាតិសឹង្ហបុរីបាននិយាយថា កិច្ចព្រមព្រៀងដែលបានធ្វើឡើងក្នុងពេលបច្ចុប្បន្ននេះ គឺឆ្លុះបញ្ចាំងពីវឌ្ឍនភាពនានាក្នុងវិស័យយោធារវាងប្រទេសទាំងពីរ ក្នុងក្របខណ្ឌនៃទំនាក់ទំនងការពារជាតិទ្វេភាគីចាប់តាំងពីឆ្នាំ ២០០៨ មក ។
ក្រសួងការពារជាតិសិង្ហបុរី បានគូសបញ្ជាក់ទៀតថា "ក្នុងអំឡុងពេលកិច្ចសន្ទនា រដ្ឋមន្ត្រីទាំងពីរបានអះអាងឡើងវិញនូវការប្តេជ្ញាចិត្តរបស់ខ្លួនក្នុងការពង្រឹងកិច្ចសហប្រតិបត្តិការការពារជាតិទ្វេភាគី តាមរយៈការបន្ត និងការអនុវត្តឲ្យបានទៀងទាត់នៃសមយុទ្ធទ្វេភាគីរបស់ខ្លួន ដែលត្រូវបានផ្អាកដោយសារជំងឺរាតត្បាត COVID-19 អស់រយៈពេលពីរឆ្នាំមកនេះ"។
អត្ថបទគួរអាន
បន្ថែមពីនេះ រដ្ឋមន្ត្រីទាំងពីរក៏បានពិភាក្សាអំពីបញ្ហាសន្តិសុខពិភពលោក និងមធ្យោបាយជាក់ស្តែងក្នុងការពង្រឹងនៃកិច្ចសហប្រតិបត្តិការលើវិស័យការពារជាតិរវាងអាស៊ាន-ចិន ក្រោមកិច្ចប្រជុំរដ្ឋមន្ត្រីការពារជាតិអាស៊ានបូកផងដែរ។
គួរបញ្ជាក់ថា ឧត្តមសេនីយ វី ហ្វេង ដែលជារដ្ឋមន្ត្រីការពារជាតិចិន នឹងថ្លែងសុន្ទរកថា នៅថ្ងៃអាទិត្យសប្តាហ៍នេះ ស្តីពីចក្ខុវិស័យរបស់ប្រទេសចិនសម្រាប់សណ្តាប់ធ្នាប់ក្នុងតំបន់។ ហើយលោកក៏នឹងជួបជាមួយនាយករដ្ឋមន្ត្រីសិង្ហបុរី លោក លី សៀន ឡុង (Lee Hsien Loong) និងទេសរដ្ឋមន្ត្រី និងជារដ្ឋមន្ត្រីសម្របសម្រួលសន្តិសុខជាតិ លោក តៅ ឈីហីន (Teo Chee Hean) ផងដែរ ក្នុងដំណើរទស្សនកិច្ចរបស់លោកនៅក្នុងប្រទេសដែនកោះមួយនេះ៕
អត្ថបទ៖ ហ៊ុន គន្ធថៃ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
