អូស្ត្រាលីប្រឈមមុខនឹងការគម្រាមកំហែងពីជំងឺគ្រុនផ្តាសាយធំ ស្របពេលដែលជំងឺកូវីដ១៩ នៅតែបន្តរាតត្បាត

ប្រទេសអូស្ត្រាលី ជាធម្មតាទទួលរងនូវការកើតជំងឺផ្តាសាយចាប់ផ្តើមពីខែមិថុនា ដល់ ខែកញ្ញា ប៉ុន្តែជំងឺនេះមានការថយចុះចំនួន ២ ឆ្នាំជាប់ៗគ្នា បន្ទាប់ពីមានការរីករាលដាលនៃមេរោគឆ្លងកូវីត ១៩ នៅឆ្នាំ ២០២០។

ប៉ុន្ដែ ករណីនៃជំងឺផ្តាសាយនៅអូស្ត្រាលីបានចាប់ផ្ដើមកើនឡើងយ៉ាងឆាប់រហ័សចាប់តាំងពីចុងខែមេសាឆ្នាំនេះមក នៅស្របពេលដែលមេរោគកូវីដ ១៩ មិនទាន់សាបរលាបពីប្រទេសនេះនៅឡើយទេ ហើយបញ្ហានេះ កំពុងធ្វើឲ្យវិស័យសុខាភិបាលអូស្ត្រាលីកំពុងរងទុក្ខកាន់តែខ្លាំង។

បើយោងតាមនាយកដ្ឋានសុខាភិបាលអូស្ត្រាលី ករណីជំងឺគ្រុនផ្តាសាយធំប្រហែល ៨ ម៉ឺន ៨ ពាន់នាក់ ត្រូវបានរាយការណ៍នៅឆ្នាំនេះ បើគិតត្រឹមថ្ងៃទី ៥មិថុនា។ ទន្ទឹមនឹងនោះ នៅក្នុងរយៈពេល ២ សប្តាហ៍ចុងក្រោយនេះ ករណីឆ្លងជំងឺនេះបានកើនឡើងដល់ទៅជាង៥០% ដោយមានមនុស្សយ៉ាងហោចណាស់ ៤ ម៉ឺន ៨ ពាន់នាក់បន្ថែមទៀតត្រូវបានធ្វើរោគវិនិច្ឆ័យរកឃើញមានជំងឺផ្តាសាយធំនេះ។

ចាប់តាំងពីពាក់កណ្តាលខែមេសា ករណីអ្នកកើតជំងឺផ្ដាសាយធំបានបន្តលើសពីមធ្យមភាគក្នុងរយៈពេល៥ឆ្នាំចុងក្រោយនេះ ខណៈការកើនឡើងនៃអ្នកជំងឺបានចាប់ផ្តើមយ៉ាងឆាប់រហ័សជាងឆ្នាំមុនៗ។

គួរកត់សម្គាល់ថាគ្រុនផ្តាសាយ និង ជំងឺកូវីដ-១៩ គឺជា ប្រភេទជំងឺស្រដៀងគ្នាដែលឆ្លងតាមរយៈផ្លូវដង្ហើម ហើយមានការឆ្លងលឿននៅរដូវរងា។

មែនទែនទៅ អ្នកជំនាញផ្នែកសុខភាពធ្លាប់បានព្រមានជាយូរមកហើយ អំពីលទ្ធភាពនៃការរីករាលដាលនៃមេរោគគ្រុនផ្តាសាយនេះ ខណៈវិធានការណ៍ដើម្បីប្រឆាំងនឹងមេរោគនេះ មានដូចជាការពាក់ម៉ាស់ ការលាងដៃ និងការរក្សាគម្លាត ក៏ដូចជាការរឹតបន្តឹងការធ្វើដំណើរ ក៏មានប្រសិទ្ធភាពប្រឆាំងនឹងជំងឺគ្រុនផ្តាសាយផងដែរ។

គួរជម្រាបថា យោងតាមអង្គការសុខភាពពិភពលោក បានឲ្យដឹងថា បច្ចុប្បន្ន មានមនុស្សភាគតិចប៉ុណ្ណោះ ដែលបានចាក់វ៉ាក់សាំងជំងឺផ្ដាសាយធំនេះ បន្ទាប់ពីករណីឆ្លងជំងឺនេះ បានថយចុះនៅក្នុងរយៈពេល២ឆ្នាំកន្លងមកនេះ។ បច្ចុប្បន្ន ករណីជំងឺគ្រុនផ្តាសាយកំពុងកើនឡើងនៅក្នុងប្រទេសអូស្ត្រាលី នូវែលសេឡង់ ឈីលី និងអ៊ុយរូហ្គាយជាដើម៕