អាជ្ញាធរកំពុងស្វែងរកដំណោះស្រាយជូនអតិថិជនរបស់បុរី ម៉ន ដានី ដែលកំពុងរងដីកាចាប់ខ្លួន

ឯកឧត្តម ជូ វណ្ណៈ អគ្គនាយកនិយ័តករអាជីវកម្មអចលនវត្ថុ និងបញ្ចាំបានបញ្ជាក់ប្រាប់ខេមបូណូមីសថា វិវាទរវាងអតិថិជនជាមួយម្ចាស់បុរី ម៉ន ដានី នឹងអាចឈានដល់ការស្នើសុំគោលការណ៍ពីថ្នាក់ដឹកនាំរាជរដ្ឋាភិបាលក្នុងការស្វែងរកដំណោះស្រាយសមស្របណាមួយនាពេលខាងមុខ។ បើតាមថ្នាក់ដឹកនាំរូបនេះ បច្ចុប្បន្នវិវាទនេះពុំទាន់ទទួលបានដំណោះស្រាយសមស្របណាមួយនៅឡើយទេ ស្របពេលដែលលោកស្រី ម៉ន ដានី កំពុងគេចខ្លួនពីការតាមចាប់របស់អាជ្ញាធរ ពាក់ព័ន្ធនឹងការចេញសែកគ្មានសាច់ប្រាក់ ដែលជាបណ្ដឹងរបស់ម្ចាស់ដី។ ក្រៅពីមានបញ្ហាជាមួយម្ចាស់ដីដែលខ្លួនបានទិញដើម្បីសាងសង់បុរី លោកស្រី ម៉ន ដានី ក៏មានបញ្ហាជាមួយអតិថិជន និងរងបណ្ដឹងរក្សាការពារផងដែរ។

​ជុំវិញវិវាទរវាងម្ចាស់ដីជាមួយលោកស្រី ម៉ន ដានី ត្រូវបានឯកឧត្តម ជូ វណ្ណៈ អះអាងថា កាលពីចុងខែកញ្ញា ឆ្នាំ២០២៣ ភាគីពាក់ព័ន្ធបានធ្វើកិច្ចព្រមព្រៀងជាមួយគ្នា ដើម្បីឈានទៅរកដំណោះស្រាយរួចហើយ ប៉ុន្តែអស់រយៈពេលជាច្រើនខែមកនេះ ភាគីម្ចាស់បុរី ម៉ន ដានី តែងតែពន្យារពេលរហូតដល់មានដីកាតាមចាប់ខ្លួនពីតុលាការតែម្ដង។

​គួរបញ្ជាក់ថា តុលាការបានចេញដីកាឱ្យចាប់ខ្លួនលោកស្រី ម៉ន ដានី ម្ចាស់បុរី ម៉ន ដានី ពាក់ព័ន្ធនឹងការមិនបំពេញកាតព្វកិច្ចចំពោះឧបករណ៍អាចជួញដូរបាន ឬចេញសែកគ្មានសាច់ប្រាក់ជាង៦០ម៉ឺនដុល្លារ ប្រព្រឹត្តក្នុងរាជធានីភ្នំពេញ កាលពីថ្ងៃទី៣០ ខែមេសា ឆ្នាំ២០២៣។ ក្នុងដីកាបញ្ជានេះ បានបង្គាប់ឱ្យភ្នាក់ងារនៃកងកម្លាំងសាធារណៈស្វែងរកចាប់ខ្លួនតាំងពីថ្ងៃទី១០ ខែមករា ឆ្នាំ២០២៤ មកម្លេះ៕