តើបំណុលខូចនៅវៀតណាមបច្ចុប្បន្នមានស្ថានភាពបែបណា និងមានទំហំប៉ុន្មាន?

របាយការណ៍ហិរញ្ញវត្ថុពីធនាគារចំនួន២៨ នៅក្នុងប្រទេសវៀតណាម បានបង្ហាញឱ្យឃើញថា នៅត្រីមាសទី១ ដើមឆ្នាំ២០២៤ បំណុលមិនដំណើរការ ឬបំណុលខូចសរុបរបស់ខ្លួនបានកើនឡើងដល់ជិត៩ពាន់លានដុល្លារអាម៉េរិក កើនឡើងជាង១៤% បើធៀបនឹងដំណាច់ឆ្នាំ២០២៣។ ក្នុងចំណោមធនាគារទាំង២៨ខាងលើ ធនាគារ MB មានបំណុលខូចខ្ពស់ជាងគេកើនដល់៥៦% ឬស្មើនឹងប្រមាណ២១៦លានដុល្លារអាម៉េរិក បន្ទាប់មកគឺធនាគារ BIDV មានបំណុលខូចកើនឡើងជិត២១% ឬស្មើនឹង១៨២លានដុល្លារអាម៉េរិក។

សូមបញ្ជាក់ថា ក្នុងចំណោមធនាគារទាំង២៨ខាងលើ គឺមានតែធនាគារពីរប៉ុណ្ណោះ គឺធនាគារ VPBank និងធនាគារ SHB ដែលមានស្ថានភាពឥណទានល្អប្រសើរ ដោយអនុបាតបំណុលខូចរបស់ធនាគារ VPBank បានធ្លាក់ចុះជិត១% ខណៈដែលអនុបាតបំណុលរបស់ធនាគារ SHB បានធ្លាក់ចុះ០,១%។

តាមរយៈរបាយការណ៍វិភាគមួយដែលបានចេញផ្សាយនាពេលថ្មីៗនេះ ក្រុមហ៊ុនមូលបត្រវៀតណាម Saigon Securities Incorporation (SSI) បានព្យាករថា អនុបាតបំណុលខូចអាចនឹងកើនឡើងជាថ្មីក្នុងឆមាសទី១ ឆ្នាំ២០២៤ ដោយសារតែសន្ទុះកំណើនឥណទានយឺត ហើយកត្តាម៉ាក្រូសេដ្ឋកិច្ចក៏មិនបង្ហាញសញ្ញាច្បាស់លាស់ពីភាពប្រសើរឡើងនោះដែរ។ ក្រុមអ្នកវិភាគនៅក្រុមហ៊ុនមូលបត្រនេះ បានព្យាករផងដែរថា អនុបាតបំណុលខូចនៅដំណាច់ឆ្នាំ២០២៤ នឹងកើនឡើងបន្តិច បើធៀបនឹងឆ្នាំ២០២៣ ព្រោះធនាគារនានាត្រូវបានរំពឹងថា នឹងជំរុញការកាត់បំណុលខូចចេញ ហើយសេដ្ឋកិច្ចវៀតណាម នឹងងើបឡើងវិញកាន់តែរឹងមាំនៅត្រឹមដំណាច់ឆ្នាំនេះ៕

ដោយ: តែម សុខុម