ទីផ្សារលំនៅឋាននៅទីក្រុងបាងកកនឹងធ្លាក់ចុះ ចំពេលស្ថានភាពសេដ្ឋកិច្ចមិនអំណោយផល

មជ្ឈមណ្ឌលស្រាវជ្រាវលំនៅឋាន SCB EIC របស់ធនាគារ Siam Commercial Bank បានព្យាករថា ការលក់លំនៅឋានថ្មីក្នុងរាជធានីបាងកក នឹងធ្លាក់ចុះ១០% នៅឆ្នាំ២០២៤ ហើយនឹងបន្តធ្លាក់ចុះបន្ថែមទៀតពីចន្លោះ១% ទៅ៣% នៅឆ្នាំ២០២៥ ដែលភាគច្រើនដោយសារតែការធ្លាក់ចុះសេដ្ឋកិច្ចរបស់ប្រទេសនេះ។

ការធ្លាក់ចុះទីផ្សារលក់លំនៅឋាននៅទីក្រុងបាងកកនេះ ត្រូវបានសន្មតថា គឺបណ្ដាលមកពីបញ្ហាប្រឈមផ្នែកសេដ្ឋកិច្ចរួមទាំងការកើនឡើងការចំណាយក្នុងជីវភាពប្រចាំថ្ងៃរបស់ប្រជាពលរដ្ឋ ការធ្លាក់ចុះអំណាចទិញ កម្រិតបំណុលគ្រួសារកើនឡើង ការកើនឡើងអត្រាការប្រាក់ និងលក្ខខណ្ឌវិនិច្ឆ័យនៃការអនុម័តលើកម្ចីទិញផ្ទះមានតឹងរ៉ឹង។

កត្តាទាំងអស់នេះកំពុងធ្វើឱ្យអ្នកមានបំណងទិញផ្ទះនៅពេលអនាគតពន្យារពេលការសម្រេចចិត្តរបស់ពួកគេ ជាពិសេសក្នុងចំណោមអ្នកមានប្រាក់ចំណូលទាបទៅមធ្យមតែម្ដង។ ដើម្បីឆ្លើយតបទៅនឹងលក្ខខណ្ឌទាំងនេះ ក្រុមអ្នកអភិវឌ្ឍអចលនទ្រព្យកំពុងផ្តោតការយកចិត្តទុកដាក់បន្ថែមទៀតលើគម្រោងទីផ្សារមធ្យមទៅខ្ពស់ ខណៈទីផ្សារកម្រិតនេះនៅទទួលបានអំណាចទិញរឹងមាំនៅឡើយ៕

អត្ថបទ៖ សុខ មង្គល