បង់ក្លាដេសសម្លឹងរកកិច្ចព្រមព្រៀងពាណិជ្ជកម្មសេរីជាមួយចិន

ការបង្ហាញពីចំណាប់អារម្មណ៍របស់បង់ក្លាដេសក្នុងការធ្វើកិច្ចព្រមព្រៀងពាណិជ្ជកម្មសេរីជាមួយចិននេះ គឺត្រូវបានលើកឡើងដោយរដ្ឋមន្ត្រីក្រសួងពាណិជ្ជកម្មបង់ក្លាដេសនៅក្នុងកិច្ចប្រជុំតាមអនឡាញមួយនៅថ្ងៃពុធសប្ដាហ៍នេះ។

រដ្ឋមន្ត្រីក្រសួងពាណិជ្ជកម្មបង់ក្លាដេស លោក ទីពូ ម៉ុនស៊ី Tipu Munshi បាននិយាយថា កាលពីខែតុលាឆ្នាំ២០១៦ ក្រសួងពាណិជ្ជកម្មនៃប្រទេសទាំងពីរ មានការចុះហត្ថលេខាលើអនុស្សារណៈយោគយល់គ្នា ក្នុងការដាក់ចេញនូវការសិក្សាពីលទ្ធភាពនៃកិច្ចព្រមព្រៀងពាណិជ្ជកម្មសេរីរវាងចិន និងបង់ក្លាដេស។

រដ្ឋមន្ត្រីក្រសួងពាណិជ្ជកម្មបង់ក្លាដេស បាននិយាយទៀតថា កិច្ចព្រមព្រៀងពាណិជ្ជកម្មសេរីចិន និងបង់ក្លាដេស នឹងជួយបង្កើនសមត្ថភាពប្រកួតប្រជែង និងការចូលទៅក្នុងទីផ្សារ សម្រាប់ផលិតផល និងសេវាកម្មរបស់បង់ក្លាដេស ព្រមទាំងពង្រឹងនូវទំនុកចិត្តរបស់វិនិយោគិន និងការកសាងបាននូវសេដ្ឋកិច្ចប្រកបដោយចីរភាព។

លោក Tipu Munshi បន្ថែមថា បើទោះបីជាមានដំណើរការខ្លះត្រូវបានធ្វើឡើងរួចហើយក៏ដោយ តែភាគីទាំងពីរនៅតែត្រូវការកិច្ចខំខិតប្រឹងប្រែងជាច្រើនទៀត ដើម្បីបញ្ចប់ការចរចា និងឈានទៅសម្រេចការចុះហត្ថលេខាលើកិច្ចព្រមព្រៀងពាណិជ្ជកម្មសេរីនេះនៅក្នុងពេលខាងមុខ។ អ្វីដែលសំខាន់នោះ គឺបង់ក្លាដេសសង្ឃឹមថា កិច្ចព្រមព្រៀងនេះ នឹងជួយខ្លួនក្នុងការប្រឈមទៅនឹងការបញ្ចប់នៃឋានៈជាប្រទេសមានការអភិវឌ្ឍតិចតួចផងដែរ។

សូមបញ្ជាក់ថា រដ្ឋាភិបាលចិន នាពេលកន្លងមកក៏បានសម្រេចផ្ដល់ជូនបង់ក្លាដេស សម្រាប់ការនាំចេញដោយគ្មានកូតាទៅកាន់ប្រទេសចិន ដោយមានអនុគ្រោះពន្ធគយដល់ទៅ ៩៧% នៃបន្ទាន់ពន្ធគយចិន ចាប់តាំងពីដើមខែកក្កដាឆ្នាំ២០២០មក។

តាមរយៈការអនុគ្រោះនេះ មុខទំនិញបង់ក្លាដេសជាង៨ពាន់មុខ នឹងបានទទួលការលើកលែងពន្ធគយ និងមិនមានកំណត់កូតា សម្រាប់ការនាំចេញទៅកាន់ប្រទេសចិន៕