ចិនគ្រោងបោះផ្សាយលក់មូលបត្របំណុលដ៏មហិមា១៤០ពាន់លានដុល្លារ ដើម្បីសង្គ្រោះសេដ្ឋកិច្ចដែលកំពុងដាំក្បាលចុះ

យោងតាមសេចក្ដីជូនដំណឹងមួយនៅលើគេហទំព័ររបស់ក្រសួងហិរញ្ញវត្ថុចិន រដ្ឋាភិបាលក្រុងប៉េកាំងនឹងបោះផ្សាយលក់មូលបត្របំណុលរយៈពេល៣០ឆ្នាំ ជុំទី១ នៅថ្ងៃសុក្រ ទី១៧ ខែឧសភា ដ៏ខ្លីខាងមុខនេះ ខណៈដែលមូលបត្របំណុលរយៈពេល២០ឆ្នាំ នឹងត្រូវបោះផ្សាយលក់នៅថ្ងៃទី២៤ ខែឧសភា ហើយមូលបត្របំណុលរយៈពេល៥០ឆ្នាំ នឹងត្រូវបោះផ្សាយលក់នៅថ្ងៃទី១៤ ខែមិថុនា។

មជ្ឈដ្ឋានទូទៅបានរំពឹងទុករួចមកហើយថា នឹងមានចំណាត់ការនេះ នៅពេលដែលនាយករដ្ឋមន្រ្តីចិន លោក លី ឈាង (Li Qiang) បានប្រកាសពីផែនការបោះផ្សាយលក់មូលបត្របំណុលពិសេសរយៈពេលវែងថ្មីៗរបស់រដ្ឋាភិបាលក្នុងទំហំទឹកប្រាក់១៣៨ពាន់លានដុល្លារអាម៉េរិក អំឡុងពេលលោកបញ្ចេញរបាយការណ៍ការងាររដ្ឋាភិបាលរបស់លោកកាលពីខែមីនា។

ទោះជាយ៉ាងណា តាមរយៈសេចក្តីជូនដំណឹងដែលបានចេញផ្សាយកាលពីថ្ងៃចន្ទ ដើមសប្ដាហ៍នេះ ក្រសួងហិរញ្ញវត្ថុរបស់ចិន មិនបានបញ្ជាក់ពីចំនួននៃការបោះផ្សាយលក់មូលបត្របំណុលនោះទេ។

លោក លី ឈាង បានប្រកាសថា ប្រទេសចិន កំពុងតែរក្សាគោលដៅកំណើនផលិតផលក្នុងស្រុកសរុប (GDP) ក្នុងរង្វង់៥% សម្រាប់ឆ្នាំ២០២៤ នេះ ទោះបីជាមានការព្យាករមួយចំនួនបានចង្អុលបង្ហាញថា សេដ្ឋកិច្ចចិន នឹងសម្រេចបានកំណើនទាបជាងនេះ ចំពេលមានការព្រួយបារម្ភអំពីវិបត្តិអចលនទ្រព្យដាំក្បាលចុះដ៏អូសបន្លាយ និងតម្រូវការអ្នកប្រើប្រាស់ធ្លាក់ចុះយ៉ាងណាក៏ដោយចុះ។

របាយការណ៍ការងាររបស់នាយករដ្ឋមន្ត្រីរូបនេះ បានគូសបញ្ជាក់ថា ការបោះផ្សាយលក់មូលបត្របំណុលទាំងនេះ គឺជាពិសេសសម្រាប់ការអនុវត្តយុទ្ធសាស្ត្រជាតិសំខាន់ៗ និងការកសាងសមត្ថភាពសន្តិសុខក្នុងវិស័យសំខាន់ៗរបស់ប្រទេសចិន៕

ដោយ: តែម សុខុម