ភាពមិនប្រាកដប្រជារបស់សេដ្ឋកិច្ចថៃ ក៏ដូចជាលើពិភពលោកបានជំរុញឱ្យអត្រាឥណទានមិនដំណើរការនៅក្នុងប្រទេសភូមិផងរបងជាមួយកម្ពុជាមួយនេះកើនឡើងជាបន្តបន្តាប់។ ជាក់ស្តែងបើតាមរបាយការណ៍របស់ការិយាល័យឥណទានជាតិថៃ ឥណទានមិនដំណើរការ ឬឥណទានគ្មានប្រតិបត្តិការទូទាត់សងនៅថៃ បានហក់ឡើងដល់១៥% នៅត្រីមាសទី១ឆ្នាំនេះ ដោយឥណទានមិនដំណើរការទាំងនោះមានតម្លៃសរុបជិត៣០ពាន់លានដុល្លារអាម៉េរិក។
ក្នុងចំណោមឥណទានមិនដំណើរការទាំងនេះ ឥណទានមិនដំណើរការក្នុងកម្ចីយានយន្តបានកើនឡើងរហូតដល់ទៅ៣២% មានតម្លៃប្រមាណ៦ពាន់៥រយលានដុល្លារ ខណៈឥណទានលំនៅឋានកើនឡើងដល់១៨% ដែលមានតម្លៃទឹកប្រាក់ប្រមាណជ៥៤លានដុល្លារ។
ទន្ទឹមនឹងឥណទានមិនដំណើរការមានការកើនឡើង ចំនួនឥណទានដែលជួបការបញ្ហាលំបាកក្នុងការសងត្រឡប់ ក៏មានការកើនឡើងរហូតដល់ជាង៧% ផងដែរ ដោយមានទំហំទឹកប្រាក់សរុបជាង១៧ពាន់៥រយលានដុល្លារ ក្នុងនោះឥណទានលំនៅឋានមានកំណើន១៥% និងឥណទានយានយន្តមានកំណើនប្រមាណ៧%។
អត្តបទគួរអាន
ជុំវិញស្ថានភាពនេះលោក ស៊ូរ៉ាពល អូប៉ាស្យែន (Surapol Opastien) នាយកប្រតិបត្តិនៃការិយាល័យឥណទានជាតិថៃ បានទុកការកើនឡើងឥណទានមិនដំណើរការ និងឥណទានជួបបញ្ហាលំបាកក្នុងការសងត្រឡប់សរុបក្នុងត្រីមាសទី១នៃឆ្នាំនេះ គឺឆ្លុះបញ្ចាំងឱ្យឃើញពីការស្ទុះងើបឡើងវិញមិនស្មើគ្នារបស់សេដ្ឋកិច្ចថៃ។
អ្នកជំនាញរូបនេះកត់សម្គាល់ឃើញថា ប្រាក់ចំណូលរបស់ពលរដ្ឋថៃ នៅមិនទាន់ឃើញពីការស្ទុះងើបឡើងវិញយ៉ាងទូលំទូលាយនៅឡើយទេ ហើយប្រជាជនជាច្រើននៅតែប្រឈមនឹងបន្ទុកការចំណាយប្រចាំថ្ងៃខ្ពស់ ដែលធ្វើឱ្យសមត្ថភាពក្នុងការសងបំណុលរបស់ពួកគេមានការធ្លាក់ចុះ។ លោកជឿជាក់ថា ស្របពេលសេដ្ឋកិច្ចថៃ មានសន្ទុះកំណើនយឺត ចំពេលបំណុលគ្រួសារមានការកើនឡើងចង់ ឬមិនចង់វានឹងធ្វើឱ្យប៉ះពាល់វិស័យធនាគាររបស់ថៃ។
យ៉ាងណាមិញ ដើម្បីកាត់បន្ថយ និងសម្រួលដល់ការដួលរលំរបស់ធនាគារនានា គ្រឹះស្ថានហិរញ្ញវត្ថុនៅក្នុងប្រទេសថៃ កំពុងតែលើកទឹកចិត្តលើការពង្រីកជំនួយហិរញ្ញវត្ថុ និងអនុវត្តវិធានការរៀបចំបំណុលឡើងវិញ។
គិតត្រឹមត្រីមាសទី១ឆ្នាំ២០២៤ នៅទូទាំងប្រទេសថៃមានគណនីឥណទានសរុបដល់ទៅជាង៨៤លានគណនី៕
ដោយ៖ សរ សុជាតិ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
