លោក វី វាសនា ជំនួយការប្រធានសមាគមស្ករត្នោតកំពង់ស្ពឺ បានបញ្ជាក់ឲ្យដឹងថា ស្ថានភាពទីផ្សារស្ករត្នោតកំពង់ស្ពឺនៅឆ្នាំនេះ មានភាពទូលំទូលាយ និងមានតម្រូវការខ្ពស់ផងដែរ រហូតសឹងតែមិនមានស្ករត្នោតគ្រប់គ្រាន់សម្រាប់ផ្គត់ផ្គង់តម្រូវការបញ្ជាទិញ។ ជាក់ស្តែង ក្នុងឆ្នាំ២០២២នេះ ទិន្នផលស្ករត្នោតកំពង់ស្ពឺដែលអាចផលិតបានមានប្រមាណ ១០០តោនប៉ុណ្ណោះ ខណៈតម្រូវការទីផ្សារមានដល់ជាង ១៥០តោនឯណោះ។ បើតាម លោក វី វាសនា នៅរយៈពេល១០ខែឆ្នាំ ២០២២ នេះ សមាគមស្ករត្នោតកំពង់ស្ពឺ បាននាំចេញស្ករត្នោតកំពង់ស្ពឺ ប្រភេទស្ករម្សៅទៅកាន់តីផ្សារអន្តរជាតិបានចំនួន ៧៦ តោន និង ជាង២តោន សម្រាប់ស្ករសាច់។ ដោយឡែក ចំពោះការផ្គត់ផ្គង់ទីផ្សារក្នុងស្រុកវិញ នៅរយៈពេល១០ខែឆ្នាំនេះ សម្រេចបានជាង ៣០ តោនសម្រាប់ស្ករម្សៅ និង ៧តោន សម្រាប់ស្ករសាច់ផងដែរ។ ទន្ទឹមនឹងតម្រូវការកើនឡើង តម្លៃស្ករត្នោតកំពង់ស្ពឺឆ្នាំនេះ ក៏បានកើនឡើងជាងឆ្នាំមុនបន្តិចផងដែរ ពោលគឺតម្លៃស្ករត្នោតកំពង់ស្ពឺ ប្រភេទស្ករសាច់ កើនពី ៥០០០រៀលក្នុងមួយគីឡូក្រាម ទៅ ៥៥០០ រៀលក្នុងមួយគីឡូក្រាម រីឯ ប្រភេទស្ករម្សៅ កើនពី ៦៨០០រៀលក្នុងមួយគីឡូក្រាម ទៅ ៧១០០ រៀលក្នុងមួយគីឡូក្រាម។
ជាមួយគ្នានេះ លោក វី វាសនា ក៏បានបញ្ជាក់ឱ្យដឹងដែរថា មានក្រុមហ៊ុនមកពីប្រទេសចិនបានទាក់ទងសមាគមស្ករត្នោតកំពង់ស្ពឺ ដើម្បីធ្វើការនាំចេញចំនួនប្រមាណ២០តោន ទៅប្រទេសចិន តែយ៉ាងណាក៏ដោយចុះ បច្ចុប្បន្នខាងក្រុមហ៊ុន និងសមាគមផ្ទាល់ គឺមិនទាន់បានធ្វើការចុះកុងត្រាសម្រាប់នាំចេញនៅឡើយនោះទេ ខណៈនៅខែធ្នូខាងមុននេះ ក្រុមហ៊ុន និងសមាគមនឹងជួបពិភាក្សាគ្នា អំពីចំនួនដែលបញ្ជាទិញសម្រាប់នាំចេញ និងឈានដល់ការចុះកុងត្រាជាមួយគ្នាដើម្បីនាំចេញនៅឆ្នាំ២០២៣។
អត្ថបទគួរអាន
ទោះយ៉ាងណា បើតាមជំនួយការប្រធានសមាគមស្ករត្នោតកំពង់ស្ពឺរូបនេះ បានអះអាងថា សមាគមក៏មានជួបនូវបញ្ហាប្រឈមមួយចំនួនក្នុងការផលិតស្ករត្នោតនេះដែរ ពោលគឺតំបន់របស់សមាគមស្ករត្នោតកំពង់ស្ពឺ គឺស្ថិតក្នុងស្រុកចំនួន៣ គឺអង្គស្នួល ខេត្តកណ្តាល និង ស្រុកឧដុង្គ និងស្រុកសំរោងទង ខេត្តកំពង់ស្ពឺ ខណៈដែលស្រុកទាំងបីនេះ បច្ចុប្បន្នស្ថិតនៅតំបន់កំពុងអភិវឌ្ឍ ដែលធ្វើឱ្យដើមត្នោតមួយចំនួនត្រូវបាន ឈូសឆាយចោល ដែលធ្វើឱ្យបាត់បង់នូវវត្ថុធាតុដើមសម្រាប់ការផលិត ខណៈអ្នកប្រកបរបរឡើងត្នោតមួយចំនួនក៏បានបោះបង់ខ្លះៗផងដែរ ហើយបច្ចុប្បន្នសមាគមស្ករត្នោតកំពង់ស្ពឺ មានសមាជិកចំនួន ១៥៧ គ្រួសារ ដែលជាអ្នកប្រកបរបរឡើងត្នោត។
សូមបញ្ជាក់ថា តាមសមាគមស្ករត្នោតកំពង់ស្ពឺ បច្ចុប្បន្ន មានក្រុមហ៊ុនប្រមាណ ១១ក្រុមហ៊ុន ដែលបានប្រមូលទិញស្ករត្នោតកំពង់ស្ពឺ ដើម្បីនាំចេញទៅកាន់ទីផ្សារអន្តរជាតិ។ ខណៈទីផ្សារសំខាន់ៗ សម្រាប់នាំចេញស្ករត្នោតកំពង់ស្ពឺ មានដូចជា សហគមន៍អឺរ៉ុប,តៃវ៉ាន់,ជប៉ុន,វៀតណាម និងថៃ ជាដើម៕
