ក្រុមអ្នកជំនាញបានចាត់ទុកគម្រោងហេដ្ឋារចនាសម្ព័ន្ធនេះ មិនត្រឹមតែជួយបង្កើនល្បឿនអ៊ីនធឺណិតឱ្យកាន់តែលឿនរហ័ស និងជំរុញឱ្យតម្លៃសេវាធ្លាក់ចុះមកកម្រិតសមរម្យប៉ុណ្ណោះទេ ប៉ុន្តែថែមទាំងជាចលករយុទ្ធសាស្ត្រដ៏សំខាន់ ក្នុងការរុញច្រានសេដ្ឋកិច្ចឌីជីថលកម្ពុជាឱ្យសម្រេចបានតាមគោលនយោបាយជាតិរបស់រាជរដ្ឋាភិបាលផងដែរ។
ឯកឧត្តម គង់ ផល្លៈ រដ្ឋលេខាធិការក្រសួងប្រៃសណីយ៍ និងទូរគមនាគមបានគូសបញ្ជាក់ថា ប្រសិនបើមិនមានការប្រែប្រួលទេការអូសខ្សែកាបអ៊ីនធឺណិតក្រោមបាតសមុទ្រពីទីក្រុងហុងកុងមកខេត្តព្រះសីហនុ សម្រាប់បម្រើដល់វិស័យឌីជីថលក្នុងប្រទេសកម្ពុជានឹងអាចដំណើរការនៅក្នុងអំឡុងឆ្នាំ២០២៧។ បើតាមមន្រ្តីជាន់ខ្ពស់រូបនេះ ក្រសួងប្រៃសណីយ៍ និងទូរគមនាគមបានគិតគូរលើការវិនិយោគលើប្រព័ន្ធហេដ្ឋារចនាសម្ព័ន្ធឆ្អឹងខ្នងដ៏សំខាន់នេះទាំងនៅលើដី នៅបាតសមុទ្រ និងកំពុងពិចារណាក្នុងទាញយកប្រព័ន្ធអ៊ីនធឺណិតពីផ្កាយរណបផងដែរក្នុងគោលដៅធ្វើយ៉ាងណា ដើម្បីឱ្យពលរដ្ឋអាចប្រើប្រាស់អ៊ីនធឺណិតក្នុងតម្លៃសមសម្យ។
ដោយឡែកលោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ យល់ឃើញថា ប្រសិនបើគម្រោងអូសខ្សែកាបអ៊ីនធឺណិតក្រោមបាតសមុទ្រអាចដំណើរការបាននៅក្នុងឆ្នាំ២០២៧ មែន នោះនឹងធ្វើឱ្យបណ្ដាញអ៊ីនធឺណិតនៅកម្ពុជាកាន់តែមានភាពប្រសើរឡើង និងអាចមានតម្លៃទាបជាងបច្ចុប្បន្ន ខណៈមកទល់ពេលនេះការប្រើប្រាស់អ៊ីនធឺណិតនៅកម្ពុជា កំពុងក្លាយជាចលករដ៏សំខាន់សម្រាប់ការតភ្ជាប់ហេដ្ឋារចនាសម្ព័ន្ធនានា។ សម្រាប់អ្នកជំនាញរូបនេះ នៅពេលកម្ពុជាមានប្រព័ន្ធអ៊ីនធឺណិតគ្រប់គ្រាន់ និងមានល្បឿនលឿននោះនឹងធ្វើឱ្យសេដ្ឋកិច្ចកម្ពុជាអាចសម្រេចបានស្របតាមគោលនយោបាយរបស់រដ្ឋាភិបាល ដែលបានដាក់ចេញផងដែរ។ តែទោះជាបែបនេះក្ដីលោក សេក សុជាតិ យល់ថា រដ្ឋាភិបាលត្រូវមានការវិនិយោគលើការបណ្ដុះបណ្ដាលលើផ្នែកឌីជីថលឱ្យបានខ្លាំងដោយសារមកទល់ពេលនេះ ការយល់ដឹងរបស់ពលរដ្ឋនៅមានកម្រិតនៅឡើយ។
បើតាមឯកឧត្តម គង់ ផល្លៈ មកទល់ពេលនេះក្រសួងប្រៃសណីយ៍ និងទូរគមនាគម កំពុងរៀបចំសេចក្ដីព្រាងច្បាប់គោលនយោបាយរដ្ឋាភិបាល ឌីជីថល ដែលកំពុងស្ថិតក្នុងដំណាក់កាលពិគ្រោះយោបល់ និងត្រួតពិនិត្យនៅឡើយ។ មន្រ្តីជាន់ខ្ពស់រូបនេះបានគូសបញ្ជាក់ថា នៅក្នុងគោលនយោបាយនេះ ក៏មានការគិតគូរលើការកសាងមជ្ឈមណ្ឌលរក្សាទិន្នន័យជាតិធំមួយសម្រាប់ការពារសុវត្ថិភាពទិន្នន័យរបស់អ្នកប្រើប្រាស់ផងដែរ៕
អត្ថបទ៖ បូ ដូឡា,រូបភាព ឯកសារ
