រដ្ឋលេខាធិការដ្ឋានអាកាសចរស៊ីវិលរំពឹងថា ភាគហ៊ុនិកថ្មីរបស់កម្ពុជាអង្គរ អ៊ែរ នឹង «មានសមត្ថភាព និងលទ្ធភាពជាងមុន»

រដ្ឋលេខាធិការដ្ឋានអាកាសចរស៊ីវិល បានបញ្ជាក់ថា ក្រុមហ៊ុន អាកាសចរណ៍ជាតិវៀតណាម (Vietnam Airlines) គឺពិតជាបាននិងកំពុងដំណើរការលក់ភាគហ៊ុនរបស់ខ្លួន ដែលមាននៅក្នុងក្រុមហ៊ុនអាកាសចរណ៍កម្ពុជាអង្គរ អ៊ែរ ទៅឲ្យអ្នកវិនិយោគថ្មីពិតប្រាកដមែន។ ទោះយ៉ាងណា រដ្ឋលេខាធិការដ្ឋានអាកាសចរស៊ីវិល រំពឹងថា ភាគហ៊ុនិកថ្មីរបស់ ក្រុមហ៊ុន កម្ពុជាអង្គរ អ៊ែរ ដែលនឹងចូលខ្លួនមកជំនួសក្រុមហ៊ុន Vietnam Airlinesនោះ នឹងពោរពេញដោយសមត្ថភាព និងលទ្ធភាពជាងមុន។

រដ្ឋលេខាធិការដ្ឋានអាកាសចរស៊ីវិលរំពឹងថា ភាគហ៊ុនិកថ្មីរបស់កម្ពុជាអង្គរ អ៊ែរ នឹង ”មានសមត្ថភាព និងលទ្ធភាពជាងមុន” (រូបភាព៖https://www.planespotters.net)

ក្រុមហ៊ុនអាកាសចរណ៍ Vietnam Airlines ត្រូវបានគេដឹងថា មានកាន់កាប់ភាគហ៊ុន ៤៩% នៃក្រុមហ៊ុន កម្ពុជា អង្គរ អ៊ែរ ដែលជាអាកាសចរណ៍ជាតិរបស់កម្ពុជា ហើយភាគហ៊ុន ៥១% គឺកាន់កាប់ដោយរដ្ឋាភិបាលកម្ពុជា។

ឆ្លើយតបជាមួយនឹងសំណួររបស់អ្នកសារព័ត៌មានខេមបូណូមីស នៅក្នុងសន្និសីទព័ត៌មាន នៅថ្ងៃទី ១៦ ខែមេសានេះ លោក ស៊ិន ចាន់សិរីវុត្ថា អគ្គនាយករងបច្ចេកទេសនៃរដ្ឋលេខាធិការដ្ឋានអាកាសចរស៊ីវិល បានបញ្ជាក់ឲ្យដឹងថា លោកក៏បានទទួលព័ត៌មានអំពីការលក់ភាគហ៊ុនរបស់ក្រុមហ៊ុនកម្ពុជាអង្គរ អ៊ែរនេះដែរ។ ប៉ុន្ដែ លោកថា ការលក់នេះ គឺលក់តែភាគហ៊ុនរបស់ក្រុមហ៊ុន Vietnam Airlines និងភាគហ៊ុនរបស់វិស័យឯកជនដែលមាននៅក្នុងនោះប៉ុណ្ណោះ ប៉ុន្ដែសម្រាប់ចំណែក ភាគហ៊ុនរបស់រាជរដ្ឋាភិបាលកម្ពុជា គឺនៅតែរក្សាទុកដដែល មិនប៉ះពាល់ទេ។

លោក ចាន់សិរីវុត្ថា មានប្រសាសន៍ថា «ជាការពិតណាស់ យើងបានទទួលព័ត៌មានដូចអ្នកកាសែតដែរ គឺយើងដឹងថា ក្រុមហ៊ុនកម្ពុជាអង្គរ អ៊ែរ បានលក់ភាគហ៊ុនថ្មីឲ្យទៅអ្នកវិនិយោគថ្មីទៅហើយ យើងអត់ដឹងលម្អិតទេ តែយើងដឹងថា ការលក់ភាគហ៊ុននេះ គឺមានមែន! គឺយើងគិតថា ភាគហ៊ុនគាត់ គឺភាគហ៊ុន Cambodia Angkor Air ហ្នឹង គឺមានភាគហ៊ុនរដ្ឋ, ភាគហ៊ុនឯកជន និងភាគហ៊ុនរបស់ Vietnam Airlines ការបង្កើតរួមគ្នា។ អញ្ចឹង គាត់ទិញភាគហ៊ុន Vietnam Airlines, ភាគហ៊ុនឯកជន [តែ] ភាគហ៊ុនរដ្ឋនៅដដែល»។

លោកបានគូសបញ្ជាក់ទៀតថា «ហើយរចនាសម្ព័ន្ធ ក៏អត់ទាន់មានការផ្លាស់ប្តូរដែរ គឺយើងនៅរក្សារចនាសម្ព័ន្ធដដែល រហូតដល់មានការផ្ទេរ នូវចំណេះចេះដឹង និងឯកសារពាក់ព័ន្ធ ទៅអ្នកគ្រប់គ្រងថ្មី។ អញ្ចឹងគាត់នៅរក្សាធនធានមនុស្សទាំងអស់! ផ្លាស់ប្ដូរតែភាគហ៊ុនទេ!»។

បើតាមការគូសបញ្ជាក់របស់មន្ត្រីជាន់ខ្ពស់នៃរដ្ឋលេខាធិការដ្ឋានអាកាសចរស៊ីវិលដដែលនេះ បានឲ្យដឹងទៀតថា តាមព័ត៌មានដែលលោកបានដឹងមក គឺការលក់ភាគហ៊ុនរបស់កម្ពុជាអង្គរ អ៊ែរនេះ គឺធ្វើឡើងដោយតម្លាភាព ហើយលោករំពឹងថា ភាគហ៊ុនិកថ្មីរបស់ក្រុមហ៊ុននេះ នឹងមានសមត្ថភាព និងលទ្ធភាពកាន់តែប្រសើរ ដើម្បីបន្ដដឹកនាំក្រុមហ៊ុនកម្ពុជាអង្គរ អ៊ែរបន្ដទៀត។

«យើងដឹងថា ដំណើរការលក់ភាគហ៊ុននេះ តាមព័ត៌មានក្រៅផ្លូវការ គឺគាត់មានការរៀបចំដេញថ្លៃស្រួលបួលណាស់! Transparent (តម្លាភាព), Accountable (គណនេយ្យភាព) គឺគាត់ប្រើក្រុមហ៊ុនដូចជា KPMG ក៏មិនដឹង Pircewaterhouse ក៏មិនដឹង ជា Adviser (អ្នកផ្ដល់ដំបូន្មាន) ដើម្បីទទួលត្រួតពិនិត្យវាយតម្លៃថា តើក្រុមហ៊ុនណាមានលក្ខណៈសម្បត្តិគ្រប់គ្រាន់ ក្នុងការទទួលយកភាគហ៊ុនថ្មីនេះបាទ! អញ្ចឹងមានក្រុមហ៊ុនច្រើនដាក់ដេញថ្លៃ… អញ្ចឹងក្រុមហ៊ុនឈ្នះហ្នឹងយើងគិតថា គាត់អាចមានសមត្ថភាព លទ្ធភាពគ្រប់គ្រាន់ ដើម្បីបន្តដំណើរការក្រុមហ៊ុនហ្នឹងតទៅទៀត!»។ នេះបើតាមប្រសាសន៍លើកឡើងរបស់ លោក ស៊ិន ចាន់សិរីវុត្ថា។

ព័ត៌មាននៃការលក់ភាគហ៊ុនចេញនេះ ត្រូវបានបង្ហាញឲ្យដឹងនៅក្នុងកំណត់ហេតុក្រោយសវនកម្ម បន្ថែមលើរបាយការណ៍ហិរញ្ញវត្ថុបូកសរុបឆ្នាំ២០១៩ របស់ក្រុមហ៊ុន Vietnam Airlines ដែលផ្សព្វផ្សាយកាលពីពេលថ្មីៗនេះ ដោយក្នុងនោះ ក៏មានការពន្យល់អំពីផលប៉ះពាល់ពីវីរុសកូវីដ-១៩ ដែល Vietnam Airlines បានទទួលរងផងដែរ។ នេះបើតាមការចុះផ្សាយរបស់សារព័ត៌មាន VN Express ។

ស្ថានភាពវិវត្តន៍ចុងក្រោយនៃវិស័យអាកាសចរណ៍កម្ពុជា

បញ្ហា Covid-19 បាននិងកំពុងធ្វើឲ្យប៉ះពាល់ដល់សេដ្ឋកិច្ចទូទាំងពិភពលោក ពិសេស គឺវិស័យទេសចរណ៍តែម្ដង ក្នុងចំណោមនោះ វិស័យអាកាសចរណ៍ក៏ទទួលរងទុក្ខខ្លាំងណាស់ដែរ។

ជាក់ស្ដែង សម្រាប់កម្ពុជា បើតាមស្ថិតិពីរដ្ឋលេខាធិការដ្ឋានអាកាសចរស៊ីវិលបានឲ្យដឹងថា នៅខែ មករាឆ្នាំ២០២០ ចំនួនភ្ញៀវធ្វើដំណើរនៅតាមអាកាសយានដ្ឋានទាំងបីរបស់កម្ពុជា គឺរាជធានីភ្នំពេញ, ខេត្តសៀមរាប និងព្រះសីហនុ មានការថយចុះ រហូតដល់ទៅជាង ២០% ខណៈដែលកាលពីខែកុម្ភៈ ធ្លាក់ចុះជាង ៥០%, ខែមីនាធ្លាក់ចុះជាង ៧០%។ ដោយឡែក សម្រាប់ខែមេសានេះ ពោលគឺក្នុងរយៈពេលតែ៤ថ្ងៃ ដំបូងប៉ុណ្ណោះ មានការដាំក្បាលចុះជាង ៩០% ទៅហើយ ហើយសម្រាប់រយៈពេល ពេញ ១ខែ មេសានេះ ក៏មិនទាន់ដឹងថា នឹងបន្ដធ្លាក់ចុះប៉ុន្មានទៀតនោះដែរ។ នេះបើតាមការបញ្ជាក់របស់លោក ស៊ិន ចាន់សិរីវុត្ថា។

លោកបន្ថែមថា មកដល់ខែ មេសានេះ មានជើងហោះហើរនៅសល់ប្រមាណតែជិត ១០% ប៉ុណ្ណោះ ដែលនៅបន្ដប្រតិបត្តិការ ខណៈដែលប្រមាណ៩០%ទៀត ត្រូវបានផ្អាក។ ជើងហោះហើរដែលនៅបន្ដនោះ មានទិសដៅធ្វើដំណើរដូចជា កូរ៉េ ជប៉ុន និងចិនជាដើម។

ក្រៅពីក្រុមហ៊ុនអាកាសចរណ៍ក្នុងស្រុកចំនួន ៦ ក្រុមហ៊ុន កម្ពុជាមានក្រុមហ៊ុនអាកាសចរណ៍បរទេសហោះហើរចេញចូលចំនួន ៣៩ ក្រុមហ៊ុន។

អគ្គនាយករងបច្ចេកទេស រដ្ឋលេខាធិការដ្ឋានអាកាសចរស៊ីវិល បញ្ជាក់ថា បើទោះបីជា បញ្ហាអូសបន្លាយនៃ មេរោគ Covid-19 បានធ្វើឲ្យប៉ះពាល់ដល់វិស័យអាកាសចរណ៍អស់រយៈពេលជាច្រើនខែមកហើយក្ដី ប៉ុន្ដែ មកទល់នឹងពេលនេះ មិនទាន់មានក្រុមហ៊ុនណាមួយ ប្រកាសក្ស័យធននៅឡើយទេ ប៉ុន្ដែ លោកជឿជាក់ថា ក្រុមហ៊ុនអាកាសចរណ៍ក្នុងស្រុកនិងបន្ដរស់បាន ព្រោះតែមានវិធានការគាំទ្រពីរដ្ឋ។

លោក ចាន់ សិរីវុត្ថា គូសបញ្ជាក់ថា រដ្ឋបានដាក់ចេញនូវវិធានការណ៍ដោះស្រាយ សម្រាប់ក្រុមហ៊ុនអាកាសចរណ៍ក្នុងស្រុក ៦ក្រុមហ៊ុន ដោយផ្ដល់ការលើកលែងពន្ធអប្បរមាចំនួន ១០% រយៈពេល ៣ខែ និងមានការពន្យារពេលសងបំណុលរដ្ឋ ដែលជាទូទៅក្រុមហ៊ុនអាកាសចរណ៍ក្នុងស្រុក មានសេវាមួយ គឺជួយប្រមូលចំណូលពីវិស័យការអាកាសចរណ៍ជំនួសរដ្ឋ ដែលបំណុលនេះ មានប្រហែលជាង ១១លានដុល្លារអាមេរិក។

ការធ្លាក់ចុះនៃ វិស័យអាកាសចរណ៍ដ៏គំហុក នៅប៉ុន្មានខែមកនេះ ត្រូវបានអ្នកជំនាញ អះអាងថា ដោយសារតែបញ្ហា Covid-19 ផង គួបផ្សំនឹងបញ្ហាអ្នកដំណើរបារម្ភពីបញ្ហាសុវត្ថិភាពផង និងវិធានការណ៍រឹតត្បឹតការធ្វើដំណើររបស់បណ្ដាប្រទេសមួយចំនួន៕

None