បើតាមក្រសួងសេដ្ឋកិច្ច និងហិរញ្ញវត្ថុ ក្រៅតែពីការជួយជំរុញដល់ការធ្វើពិពិធកម្មទីផ្សារនាំចេញ នឹងជំរុញដល់ការនាំចេញផលិតផលរបស់កម្ពុជាហើយនោះ កិច្ចព្រមព្រៀងនេះ ក៏នឹងជួយពន្លឿនដំណើរការនៃការធ្វើសមាហរណកម្មសេដ្ឋកិច្ចកម្ពុជាទៅក្នុងតំបន់ និងសកលលោក តាមរយៈការពង្រឹងការចូលរួមរបស់កម្ពុជានៅក្នុងខ្សែច្រវាក់ផលិតកម្មតំបន់ និងសកលលោក ក៏ដូចជាប្រែក្លាយកម្ពុជាជាប្រទេសមានសក្ដានុពលទាក់ទាញវិនិយោគធ្វើជាមូលដ្ឋានផលិតកម្ម សម្រាប់នាំចេញទៅកាន់ទីផ្សារចិនផងដែរ។
ជាមួយគ្នានេះដែរ ក្រសួងពាណិជ្ជកម្មបញ្ជាក់ថា តាមរយៈកិច្ចព្រមព្រៀងនេះ កំណើននាំចេញពីកម្ពុជាត្រូវបានរំពឹងថា នឹងកើនឡើងលើសពីអត្រាកំណើននៃឆ្នាំកន្លងទៅ ប្រមាណជាង ២០% គិតជាមធ្យមក្នុងមួយឆ្នាំ។ ទន្ទឹមនឹងនេះ កំណើនវិនិយោគពីបរទេសក៏ត្រូវបានរំពឹងថា នឹងកើនឡើងខ្លាំងផងដែរ។
អត្ថបទទាក់ទង!
ជុំវិញទៅនឹងកិច្ចព្រមព្រៀងនេះ ឯកឧត្តម ងិន ឆាយ ប្រតិភូរាជរដ្ឋាភិបាលទទួលបន្ទុកជា អគ្គនាយកនៃអគ្គនាយកដ្ឋានកសិកម្ម នៃក្រសួងកសិកម្មធ្លាប់បានឲ្យដឹងដែរថា បើទោះបីជាកិច្ចព្រមព្រៀងពាណិជ្ជកម្មសេរីរវាងកម្ពុជា និងចិន ត្រូវបានចុះហត្ថលេខាក៏ពិតមែន ប៉ុន្ដែ ផលិតផលកសិកម្មកម្ពុជា ត្រូវតែគោរពទៅតាមលក្ខខណ្ឌស្ដង់ដារភូតគាមអនាម័យ ទើបអាចនាំចេញបាន។ ប៉ុន្ដែ ឯកឧត្តមជាក់ថា តាមរយៈបទពិសោធន៍នៃចំណងមិត្តភាពដ៏ជិតស្និទ្ធរវាងរដ្ឋាភិបាលប្រទេសទាំងពីរ ភាគីកម្ពុជា និងចិននឹងអាចពន្លឿនការងារត្រួតពិនិត្យ និងវាយតម្លៃ ដើម្បីអនុញ្ញាតឲ្យកសិផលរបស់កម្ពុជាអាចនាំចេញទៅកាន់ទីផ្សារចិនបានកាន់តែឆាប់រហ័ស។
គួរបញ្ជាក់ថា កន្លងមកនេះ ប្រទេសចិន និងកម្ពុជា បានប្ដេជ្ញានឹងខិតខំជំរុញទំហំពាណិជ្ជកម្មទ្វេភាគី ឲ្យបានដល់ ១០ពាន់លានដុល្លារអាមេរិក នៅឆ្នាំ២០២៣ខាងមុខនេះផងដែរ ខណៈដែលកាលពីឆ្នាំ២០១៩ទំហំពាណិជ្ជកម្មរវាងប្រទេសទាំងពីរ សម្រេចបានដល់ប្រមាណជាង ៨ពាន់លានដុល្លារ កើនឡើង២៧% ធៀបនឹងឆ្នាំ២០១៨៕
None
