បើតាមថ្នាក់ដឹកនាំសភាពាណិជ្ជកម្មកម្ពុជា គោលបំណងនៃការបង្កើតការិយាល័យនេះ គឺដើម្បីផ្សព្វផ្សាយពីច្បាប់ និងគោលនយោបាយវិនិយោគនិងកាលានុវត្តភាពថ្មីៗរបស់កម្ពុជា ដើម្បីទាក់ទាញអ្នកវិនិយោគនៅតាម បណ្តាប្រទេសទាំងនោះ ឲ្យមកបណ្តាក់ទុនវិនិយោគនៅកម្ពុជាកាន់តែច្រើនឡើងបន្ថែមទៀត។ ការពង្រឹងទំនាក់ទំនងទ្វេភាគី និងពាណិជ្ជកម្ម ក៏ស្ថិតក្នុងគោលបំណងនៃការបង្កើតការិយាល័យនេះដែរ។
អនុប្រធានសភាពាណិជ្ជកម្មកម្ពុជា ឧកញ៉ា លឹម ហេង បានបញ្ជាក់ប្រាប់ខេមបូណូមីសថា ទីបំផុតជប៉ុនបានក្លាយជាប្រទេសគោលដៅដំបូងគេសម្រាប់កម្ពុជាក្នុងការបង្កើតការិយាល័យតំណាងសភាពាណិជ្ជកម្មកម្ពុជា។ ការិយាល័យដែលមានឈ្មោះថា ការិយាល័យតំណាងសភាពាណិជ្ជកម្មកម្ពុជាសេនដៃនេះ មានទីតាំងស្ថិតនៅតំបន់សេនដៃប្រទេសជប៉ុន។ ការិយាល័យនេះមានសមាជិកចំនួន១៤រូបដែលជ្រើសតាំងតាមការបោះឆ្នោត ហើយរាល់ប្រតិបត្តិការរបស់ការិយាល័យនេះមិនប្រើប្រាស់ថវិកាជាតិឡើយ។
អត្ថបទគួរអាន
ថ្នាក់ដឹកនាំសភាពាណិជ្ជកម្មកម្ពុជារូបនេះបានបញ្ជាក់ថា គោលបំណងនៃការបង្កើតការិយាល័យនេះ គឺដើម្បីផ្សព្វផ្សាយពីច្បាប់ គោលនយោបាយវិនិយោគ និងកាលានុវត្តន៍ថ្មីៗនៅកម្ពុជាដើម្បីទាក់ទាញវិនិយោគិនបរទេសឲ្យមកបោះទុនរកស៊ីនិងវិនិយោគនៅកម្ពុជាកាន់តែច្រើនឡើងថែមទៀត។ ក្នុងន័យនេះ វិនិយោគិនបរទេសដែលមានបំណងចង់មកបោះទុនវិនិយោគនៅកម្ពុជា អាចសួរព័ត៌មានផ្សេងៗតាមរយៈការិយាល័យតំណាងសភាពាណិជ្ជកម្មកម្ពុជា ដោយមិនចាំបាច់ធ្វើដំណើរមកកម្ពុជាដោយផ្ទាល់ក៏បាន។
ក្រៅពីប្រទេសជប៉ុន កម្ពុជា គ្រោងបង្កើតការិយាល័យតំណាងសភាពាណិជ្ជកម្មកម្ពុជា នៅតាមប្រទេសមានសេដ្ឋកិច្ចរីកចម្រើន និងដៃគូពាណិជ្ជកម្មជាបន្តបន្ទាប់ទៀត។ ក្រៅពីផ្សព្វផ្សាយ និងទាក់ទាញការវិនិយោគ ការបង្កើតការិយាល័យតំណាងសភាពាណិជ្ជកម្មកម្ពុជានេះ ក៏ដើម្បីពង្រឹងទំនាក់ទំនងទ្វេភាគី និងពាណិជ្ជកម្មជាមួយប្រទេសជាដៃគូផងដែរ៕None
