ថ្លែងលើកឡើងនៅក្នុងសម័យប្រជុំពេញអង្គរដ្ឋសភា លើកទី៥ នីតិកាលទី៦ ឯកឧត្តម ប៉ាន សូរស័ក្តិ រដ្ឋមន្រ្តីពាណិជ្ជកម្ម និងជារដ្ឋមន្រ្តីសេដ្ឋកិច្ចអាស៊ានសម្រាប់កម្ពុជាបានគូសបញ្ជាក់ថា កម្ពុជារំពឹងពង្រីកទីផ្សាររបស់ខ្លួនទៅកាន់ប្រទេសជប៉ុន ព្រមទាំងឱកាសក្នុង ការទាក់ទាញវិនិយោគិនជប៉ុនចូលមកបណ្តាក់ទុនកាន់តែច្រើន តាមរយៈកិច្ចព្រមព្រៀងស្តីពីភាពជាដៃគូសេដ្ឋកិច្ចទូលំទូលាយរវាងរដ្ឋជាសមាជិកសមាគមប្រជាជាតិអាស៊ីអាគ្នេយ៍ (អាស៊ាន) និងជប៉ុន ដែលទើបត្រូវបានអង្គរដ្ឋសភាជាតិអនុម័តយល់ព្រមជាផ្លូវការ កាលពីថ្ងៃចន្ទ។
ឯកឧត្តមរដ្ឋមន្ត្រីបញ្ជាក់ថា ការធ្វើឱ្យពាណិជ្ជកម្មអាស៊ាន-ជប៉ុន នឹងមានភាពល្អប្រសើរឡើង ឆ្លើយតបទៅនឹងការវិវត្តនៃសេដ្ឋកិច្ចពិភពលោក តាមរយៈការធ្វើសេរីភាវូបនីយកម្មលើពាណិជ្ជកម្មសេវាកម្ម បម្លាស់ទីរូបវន្តបុគ្គល និងការវិនិយោគ។
អត្ថបទទាក់ទង
ឯកឧត្តមរដ្ឋមន្ត្រី អះអាងថា កិច្ចព្រមព្រៀងស្តីពីភាពជាដៃគូសេដ្ឋកិច្ចទូលំទូលាយ នឹងផ្ដល់នូវប្រយោជន៍ជាសារវ័ន្ដដល់សង្គមជាតិទាំងមូល និងជំរុញកំណើនសេដ្ឋកិច្ចនៃប្រទេសកម្ពុជាឱ្យកាន់តែប្រសើរឡើង តាមរយៈការមកបណ្តាក់ទុនរបស់វិនិយោគិនជប៉ុននៅកម្ពុជាដោយនឹងនាំបច្ចេកវិទ្យាកាន់តែមានភាពល្អប្រសើរនៅកម្ពុជា។
លើសពីនេះទៀត កម្ពុជាក៏នឹងអាចមានកាលានុវត្តភាពកាន់តែច្រើនក្នុងការទទួលបានផលប្រយោជន៍ពីពិធីសារអនុវត្តកញ្ចប់សន្យាទី១០ ក្រោមកិច្ចព្រមព្រៀងក្របខ័ណ្ឌអាស៊ានស្ដីពីសេវាកម្ម ដោយសារអាស៊ាន គឺជាទីផ្សារតំបន់ដ៏ធំមួយ ព្រមទាំងអាចទាក់ទាញអ្នកវិនិយោគ និងធុរជនពីប្រទេសនានាក្នុងអាស៊ាន មកវិនិយោគលើវិស័យសេវាកម្មក្នុងប្រទេសកម្ពុជា ក៏ដូចជាជួយបង្កើតឱកាសសម្រាប់ធុរជនកម្ពុជា ដែលមានបំណងពង្រីកទីផ្សារសេវាកម្មរបស់ខ្លួនទៅកាន់ប្រទេសនានាក្នុងអាស៊ានផងដែរ។
ទន្ទឹមជាមួយគ្នានេះ កម្ពុជាក៏នឹងអាចប្រមូលចំណូលពន្ធអាករកាន់តែច្រើនឡើងជាចំណូលជាតិ ដោយអនុលោមទៅតាមច្បាប់សារពើពន្ធកម្ពុជា ពីការធ្វើអាជីវកម្មពាណិជ្ជកម្មសេវាកម្មរបស់សមាជិកអាស៊ានផ្សេងទៀតនៅកម្ពុជា។
យោងតាមអង្គការពាណិជ្ជកម្មក្រៅប្រទេសជប៉ុន ហៅកាត់ថា JETRO គិតតាំងពីដើមឆ្នាំ មកដល់ត្រឹមដំណាច់ខែសីហា ឆ្នាំ២០២០នេះ ទឹកប្រាក់នៃការនាំចេញទៅជប៉ុនរបស់កម្ពុជាជាង ១ពាន់លានដុល្លារ ខណៈជប៉ុននាំចូលមកកម្ពុជាវិញប្រមាណជាង ៣០០លានដុល្លារ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
