តួលេខពីក្រសួងឧស្សាហកម្ម និងពាណិជ្ជកម្មវៀតណាម ដែលបានចេញផ្សាយដោយភ្នាក់ងារព័ត៌មានវៀតណាម VNA បានបង្ហាញថា ការនាំចេញរបស់កម្ពុជាទៅកាន់ប្រទេសវៀតណាមនៅ៣ខែដំបូងនៃឆ្នាំ២០២១នេះ បានហក់ឡើងខ្លាំងមិនធ្លាប់មាន ដោយមានទឹកប្រាក់នាំចេញដល់ទៅជិត១ពាន់៥រយលានដុល្លារ ជាមួយកំណើន៤៤៣%ឯណោះ ខណៈដែលការនាំចូលពីវៀតណាមមកវិញមានជាង១ពាន់២រយលានដុល្លារ កើនជិត១៦%។
តាមតួលេខនេះ បង្ហាញឲ្យឃើញថា នៅត្រីមាសទី១នេះ កម្ពុជាសម្រេចបានអតិរេកពាណិជ្ជកម្មជាមួយវៀតណាមប្រមាណ ២៥០លានដុល្លារអាមេរិក ដែលអាចនិយាយបានថា វាជាលើកដំបូងហើយ ដែលកម្ពុជាសម្រេចបានអតិរេកពាណិជ្ជកម្មជាមួយប្រទេសក្បែរខាងមួយនេះ។
ឯកឧត្តម ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្មធ្លាប់អះអាងកន្លងមកថា កត្តាដែលជំរុញឲ្យការនាំចេញរបស់កម្ពុជាទៅវៀតណាមកើនឡើងយ៉ាងគំហុកនេះ ដោយសារកត្តាតម្រូវការ និងការដឹកជញ្ជូន គួបផ្សំនឹងការជួយសម្របសម្រួលនៅតាមព្រំដែនរបស់ភាគីវៀតណាម។ ការលើកលែងពន្ធនាំចូលលើផលិតផលមួយចំនួនពីប្រទេសនេះ ក៏ជាកត្តារួមចំណែកក្នុងកំណើននេះដែរ។
អត្ថបទទាក់ទង!
បើតាមអ្នកនាំពាក្យរូបនេះ ផលិតផលដែលជួយជំរុញឲ្យការនាំចេញរបស់កម្ពុជាទៅវៀតណាមកើនឡើងខ្លាំងនេះ គឺភាគច្រើនជាផលិតផលកសិកម្ម។
នៅក្នុងជំនួបរវាងឯកអគ្គរាជទូតកម្ពុជាប្រចាំប្រទេសវៀតណាម និងរដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាម នាពេលថ្មីៗនេះ ភាគីនៃប្រទេសទាំងពីរ ក៏បានឯកភាពគ្នាធ្វើឲ្យប្រសើរឡើងនូវនីតិវិធីគយនៅតាមច្រកព្រំដែនរវាងគ្នា ដើម្បីឲ្យប្រាកដថា ខ្សែចង្វាក់ផ្គត់ផ្គង់ នឹងមិនត្រូវបានរំខាន ពិសេសតម្រូវការផលិតផលចាំបាច់ដូចជាផ្នែកវេជ្ជសាស្ត្រ និងស្បៀងអាហារ នៅអំឡុងពេលមេរោគរាតត្បាតនេះ។
របាយការណ៍ដដែលនេះ បានឲ្យដឹងទៀតថា នៅត្រីមាសទី១នេះ បើគិតពីទំហំពាណិជ្ជកម្មរវាងប្រទេសកម្ពុជានិងវៀតណាម សម្រេចបានដល់ទៅប្រមាណ២ពាន់៧រយលានដុល្លារអាមេរិក កើនឡើងជាង១០០% ធៀបនឹងរយៈពេលដូចគ្នាកាលពីឆ្នាំមុន។
ការនាំចេញរបស់កម្ពុជាទៅវៀតណាមសម្រេចបានដល់ទៅ ៤៤៣% នៅ៣ខែដំបូងនៃឆ្នាំនេះ គឺត្រូវបានជំរុញខ្លាំង ដោយការនាំចេញផលិតផលគ្រាប់ស្វាយចន្ទីមានដល់ទៅ៧១១លានដុល្លារ កើនជិត៥០០%, កៅស៊ូមានជាង៣០០លានដុល្លារ កើនជិត(មួយពាន់ភាគរយ) ១០០០%, បន្លែមានជាង១៣លានដុល្លារ កើនជិត៥០% និងការនាំចេញដែក និងដែកថែប មានជាង១០លានដុល្លារ កើនជាង២០០%។
របាយការណ៍ក្រសួងកសិកម្មកម្ពុជាថ្មីៗនេះ ក៏បានបង្ហាញដែរថា កម្ពុជានៅ៤ខែដំបូងនៃឆ្នាំ២០២១ សម្រេចបានការនាំចេញផលិតផលកសិកម្មសរុបប្រមាណជិត៤លានតោន កើនឡើងជាង ៨៧% ដោយក្នុងនោះ ការនាំចេញទៅកាន់ទីផ្សារចំនួន៥៤ប្រទេស គិតជាទឹកប្រាក់សរុបមានជាង២ពាន់លានដុល្លារ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
