អ្នកឧកញ៉ា ហ៊ុន ឡាក់ អ្នកជំនាញកសិកម្ម និងជាអ្នកនាំចេកអំបូងលឿងទៅកាន់ទីផ្សារអន្តរជាតិ បានគូសបញ្ជាក់ថា បរិមាណនាំចេញចេកអំបូងលឿង នៅរយៈពេល១១ខែ ឆ្នាំ២០២៤ មានចំនួនជាង ២៣ម៉ឺន៥ពាន់តោន និងមានការថយចុះជាង១០% បើធៀបនឹងរយៈពេលដូចគ្នាក្នុងឆ្នាំ២០២៣។ បើតាមអ្នកវិនិយោគក្នុងវិស័យកសិកម្ម រូបនេះ ការថយចុះនេះ កើតឡើងដោយតែការប្រែប្រួលអាកាសធាតុ បានធ្វើឱ្យទិន្នផលចេកមានការថយចុះស្ទើរតែទូទាំងប្រទេស និងគួបផ្សំជាមួយតម្លៃចេកនៅលើទីផ្សារអន្តរជាតិ បានធ្លាក់ថ្លៃផងនោះ ជាហេតុធ្វើឱ្យម្ចាស់ចម្ការមួយចំនួនរារែកក្នុងការបង្កើនការដាំដុះដំណាំចេកនៅឆ្នាំនេះ។
ដោយឡែក លោកស្រី ហេង ដាវី ម្ចាស់កសិដ្ឋានចម្ការចេកនៃក្រុមហ៊ុន ឡុង ស្រេង ស្ថិតក្នុងស្រុកស្ទឹងត្រង់ ខេត្តកំពង់ចាម បានឱ្យដឹងថា តម្លៃចេកអំបូងលឿងនៅក្នុងឆ្នាំនេះ បានធ្លាក់ថ្លៃបន្តិចបន្តួចដោយសារមានការប្រកួតប្រជែងពីបណ្ដាប្រទេសផ្សេងៗ។ ទោះយ៉ាងណា ម្ចាស់កសិដ្ឋាន ដែលមានផ្ទៃដីដាំដុះចេកប្រមាណ៥០០ ហិកតា រូបនេះ បានអះអាងថា ក្រុមហ៊ុន នៅតែមានផែនការនាំចេញចេកអំបូងលឿងទៅកាន់ទីផ្សារអន្តរជាតិ ឲ្យបានជាង២ម៉ឺនតោន នៅឆ្នាំ២០២៥។
បើតាមរបាយការណ៍របស់ក្រសួងពាណិជ្ជកម្ម បានឱ្យដឹងថា នៅរយៈពេល១១ខែ ក្នុងឆ្នាំ២០២៤នេះ ការនាំចេញផ្លែចេកស្រស់របស់កម្ពុជា ទៅទីផ្សារអន្តរជាតិ មានទំហំតម្លៃសរុប ១៣៨លានដុល្លារ បានថយចុះ១១% បើធៀបនឹងរយៈពេលដូចគ្នាក្នុងឆ្នាំ២០២៣។ ក្នុងនោះ ប្រទេសចិន គឺជាទីផ្សារធំជាងគេ ដែលទិញចេកពីកម្ពុជា ក្នុងទំហំ ១៣១លានដុល្លារ បន្ទាប់មកទីផ្សារប្រទេសជប៉ុន មានទំហំថវិកាជាង៥លានដុល្លារ។ ក្រៅពីនេះក៏មានទីផ្សារប្រទេសវៀតណាម ថៃ និងសាធារណរដ្ឋកូរ៉េ ផងដែរ៕
អត្ថបទ៖ បូ ដូឡា
