ក្រុមហ៊ុន វីរៈប៊ុនថាំ៖ ទំនិញជាង៥០០តោន ដែលជាប់គាំង ត្រូវបានដឹករំដោះចេញបន្តបន្ទាប់!

នៅប៉ុន្មានថ្ងៃមកនេះ គេសង្កេតឃើញថា អ្នកប្រើប្រាស់បណ្ដាញសង្គមបានផុសរិះគន់ខ្លាំងៗ ទាក់ទងនឹងសេវាដឹកជញ្ជូនទំនិញ ដែលផ្ញើឆ្លងខេត្ត-ក្រុង មានសភាពយឺតយ៉ាវ រហូតដល់ធ្វើឲ្យមុខទំនិញខ្លះត្រូវបានខូចខាតពេលទៅដល់ដៃអ្នកទទួល។

ជុំវិញនឹងបញ្ហានេះ លោក សួរ វីរៈ អគ្គនាយកក្រុមហ៊ុន វីរៈ ប៊ុនថាំ អេចប្រេស (VIRAK BUNTHAN EXPRESS) បានប្រាប់ក្រុមការងារ សារព័ត៌ាមាន ខេមបូណូមីស ថាក្រុមហ៊ុនរបស់លោកបានជួបប្រទះនូវការលំបាកច្រើននៅអំឡុងពេលនៃការបិទខ្ទប់រាជធានីភ្នំពេញ និងក្រុងតាខ្មៅនេះ ដោយសារតែ បញ្ញើទំនិញមានការកើនឡើងខ្លាំង តែការដឹកជញ្ជូនពីទីតាំងមួយទៅទីតាំងមួយទៀតមានការរាំងស្ទះខ្លាំង។

អគ្គនាយកក្រុមហ៊ុនដឹកជញ្ជូនរូបនេះ បានទទួលស្គាល់ថា ការដឹកជញ្ជូនពិតមានការយឺតយ៉ាវខ្លាំង និងបានធ្វើឲ្យទំនិញរបស់អតិថិជនមួយចំនួនខូចគុណភាព នោះក៏ព្រោះតែទំនិញមានច្រើន ហើយការដឹកជញ្ជូនរាំងស្ទះដោយសារវិធានការបិទខ្ទប់។

លោក សួរ វីរៈ បានបន្ថែមថា ចំពោះការដឹកជញ្ជូនក្នុងរាជធានីភ្នំពេញ មិនសូវមានការលំបាកពេកទេ ដោយសារមានការយោគយល់ពីអាជ្ញាធរ ប៉ុន្តែអ្វីដែលលំបាកខ្លាំង គឺបញ្ញើទំនិញពីខេត្តមករាជធានីភ្នំពេញ និងពីភ្នំពេញទៅខេត្តវិញ។ ប៉ុន្ដែ លោកសួរ វីរៈ បញ្ជាក់ថា បញ្ហានេះ ត្រូវបានដោះស្រាយមួយចំនួនធំ ដោយសាររាជរដ្ឋាភិបាលសម្រេចបិទបញ្ចប់ការហាមឃាត់ការធ្វើដំណើរឆ្លងខេត្ត។

សូមជម្រាបថា ការបន្តអូសបន្លាយពេលនៃការឆ្លងរាលដាលជំងឺកូវីដ ១៩ ជាពិសេសការឆ្លងនៅក្នុងសហគមន៍ នៅតែបន្តអូសបន្លាយ ដោយក្នុងមួយថ្ងៃៗ ក្រសួងសុខាភិបាលរកឃើញអ្នកឆ្លងថ្មីរាប់រយនាក់ ដែលភាគច្រើននៅរាជធានីភ្នំពេញ ខណៈដែលចំនួនអ្នកស្លាប់មានការកើនឡើងជាបន្តបន្ទាប់ផងដែរ៕