អង្គការសម្រាប់សហប្រតិបត្តិការសេដ្ឋកិច្ច និង ការអភិវឌ្ឍ បានបង្ហាញថា វិស័យដឹកជញ្ជូន និងឡូជីស្ទិក គឺជាមូលដ្ឋានគ្រឹះដ៏សំខាន់ សម្រាប់ការអភិវឌ្ឍទីផ្សារផ្ទៃក្នុងរួមគ្នានៃតំបន់អាស៊ាន ដែលបច្ចុប្បន្នស្នើនឹង ៥% នៃ ផលិតផលក្នុងស្រុកសរុបរបស់អាស៊ាន និងផ្តល់ការងារជាង ១៧លានកន្លែង។ ក៏ប៉ុន្តែ នៅតាមបណ្តាប្រទេសសមាជិកអាស៊ានមួយចំនួន តម្លៃនៃការដឹកជញ្ជូន បានកើនឡើងខ្ពស់ដល់ទៅ ២០% នៃ តម្លៃទំនិញសរុប ដែលលើសពីតម្លៃជាមធ្យមនៅលើសកលលោកដល់ទៅ ២ដង។
ការពិចារណាឡើងវិញទៅលើ បទប្បញ្ញត្តិស្តីពីការវិនិយោគផ្ទាល់ពីបរទេស នៅក្នុងវិស័យឡូជីស្ទិក គឺជារឿងសំខាន់ ដើម្បីជួយឲ្យប្រទេសក្នុងតំបន់អាចរីកចម្រើនជាងនេះ ព្រោះថា សមាជិកអាស៊ានមួយចំនួន នៅតែរឹតបន្តឹងលើការវិនិយោគពីបរទេស និង ធ្វើឲ្យមានផលលំបាក សម្រាប់ការវិនិយោគរបស់ក្រុមហ៊ុនបរទេស និង ក្នុងស្រុក។
អត្ថបទគួរអាន
តាមការព្យាករណ៍របស់អង្គការសម្រាប់សហប្រតិបត្តិការសេដ្ឋកិច្ច និងការអភិវឌ្ឍ បានបង្ហាញថា បើសិនជា ឧបសគ្គពាណិជ្ជកម្ម និងការវិនិយោគផ្ទាល់ពីបរទេស ត្រូវបានកាត់បន្ថយឲ្យស្របតាមស្តង់ដារអន្តរជាតិ វានឹងជួយជំរុញកំណើនផលិតផលក្នុងស្រុកសរុបនៃតំបន់អាស៊ាន ដល់ទៅ ១៧% ក្នុងរយៈពេលមធ្យម និង វែង។
អង្គការស្រាវជ្រាវខាងលើនេះបានបញ្ជាក់យ៉ាងច្បាស់ថា បើសិនជា ឧបសគ្គនៃការប្រកួតប្រជែងក្នុងវិស័យឡូជីស្ទិកអាស៊ាន ដែលរកឃើញដោយអង្គការសម្រាប់សហប្រតិបត្តិការសេដ្ឋកិច្ច និងការអភិវឌ្ឍ ត្រូវបានដកចេញនោះ សេដ្ឋកិច្ចរបស់តំបន់អាស៊ាន អាចនឹងចំណេញជាង ៤ពាន់ ៥រយលានដុល្លារអាមេរិក ក្នុងមួយឆ្នាំ ដោយមិនទាន់រាប់បញ្ចូលនូវ លទ្ធផលផ្សេងៗ រួមមាន ការបង្កើនការងារ, ឧបសគ្គកាន់តែទាបសម្រាប់សហគ្រាសធុនតូច និងមធ្យម និងការកើនឡើងនូវពាណិជ្ជកម្មឆ្លងព្រំដែនជាដើម។
អគ្គលេខាធិការនៃអង្គការសម្រាប់សហប្រតិបត្តិការសេដ្ឋកិច្ច និងការអភិវឌ្ឍ OECD បាននិយាយថា ការស្រាវជ្រាវនេះ គឺដើម្បីបង្កើនភាពរឹងម៉ាំ និងគុណភាពនៃការក្រោកឡើងវិញនៃសេដ្ឋកិច្ច, ជំរុញការបើកចំហសេដ្ឋកិច្ច និងការកែទម្រង់នៃការប្រកួតប្រជែងទៅវិញទៅមក ដែលវានឹងក្លាយជាកត្តាសំខាន់ ក្នុងការជំរុញអាជីវកម្មថ្មីៗ និងបង្កើនការងារ ជាពិសេសសម្រាប់សហគ្រាសធុនតូច និងមធ្យម ដែលស្មើនឹង ៩០% នៃសហគ្រាសទាំងអស់ក្នុងតំបន់អាស៊ាន៕អត្ថបទ៖ វណ្ណ វុឌ្ឍវិវឌ្ឍន៍
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
