អ្នកជំនាញក្នុងវិស័យដឹកជញ្ជូនជឿជាក់ថា វិស័យដឹកជញ្ជូនតាមផ្លូវដែករបស់កម្ពុជានឹងមានការប្រកួតប្រជែងថែមមួយកម្រិតទៀត ប្រសិនបើកម្ពុជា អាចសម្រេចបានលទ្ធផលដូចអ្វីដែលបានគ្រោងទុក។ វិស័យដឹកជញ្ជូនតាមផ្លូវដែកជាវិស័យមួយដ៏មានសក្តានុពលមួយ បន្ទាប់ពីការដឹកជញ្ជូនតាមផ្លូវទឹក ព្រោះវាអាចដឹកជញ្ចូនទំនិញបានរាប់រយ ឬអាចឈានពាន់តោនក្នុងមួយជើង និងមានតម្លៃសមរម្យ។
នាសន្និសីទសារព័ត៌មានស្តីពី «ផែនការគ្រប់គ្រង និងវិធានការដោះស្រាយបញ្ហាសុវត្ថិភាពចរាចរណ៍ផ្លូវដែក»កាលពីពេលថ្មីៗ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនបានគូសបញ្ជាក់ថា កម្ពុជាមានផែនការលើកកម្ពស់គុណភាព និងអភិវឌ្ឍន៍គម្រោងផ្លូវដែកចំនួន៨គម្រោងនៅទូទាំងប្រទេស ដើម្បីជួយសម្រួលដល់ការដឹកជញ្ជូនទំនិញ និងលើកកម្ពស់ការប្រកួតប្រជែងការដឹកជញ្ជូនអ្នកដំណើរ និងទំនិញតាមផ្លូវដែករបស់កម្ពុជា ជាពិសេស ដើម្បីរួមចំណែកជួយទាក់ទាញការវិនិយោគពីបរទេស។ បើតាមការគូសបញ្ជាក់របស់ឯកឧត្តម ប៉េង ពោធិ៍នា ក្នុងចំណោមគម្រោងទាំង៨នេះ មាន៣គម្រោងស្ថិតក្នុងផែនការអភិវឌ្ឍន៍រយៈពេលមធ្យមពីឆ្នាំ២០២៣-២០២៧ និង៥គម្រោងស្ថិតក្នុងផែនការអភិវឌ្ឍន៍រយៈពេលវែងពីឆ្នាំ២០២៨-២០៣៣។
អត្ថបទគួរអាន
ពាក់ព័ន្ធបញ្ហានេះដែរ លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា យល់ឃើញថា ការដឹកជញ្ជូនទំនិញតាមផ្លូវរថភ្លើង គឺជាអ្វីដែលសមាជិកសមាគមចង់បាន ដ្បិតវាមានតម្លៃទាប និងអាចលឿនជាងការដឹកជញ្ជូនតាមផ្លូវទឹក។ អ្នកជំនាញរូបនេះជឿជាក់ថា ក្រោយរាជរដ្ឋាភិបាលលើកកម្រិតគុណភាព និងអភិវឌ្ឍន៍គម្រោងផ្លូវរថយន្តរួចរាល់ដូចអ្វីដែលបានគ្រោងទុកវានឹងជួយលើកធ្វើឱ្យវិស័យដឹកជញ្ជូនតាមផ្លូវដែករបស់កម្ពុជាកាន់តែមានភាពល្អប្រសើរ និងប្រកួតប្រជែងបន្ថែមទៀត ជាពិសេសជួយសម្រួលដល់ការដឹកជញ្ជូន និងជំរុញការនាំចេញកសិផលរបស់កម្ពុជាទៅកាន់ទីផ្សារអន្តរជាតិឱ្យកាន់តែច្រើនបន្ថែមទៀត។
បើតាមការលើកឡើងរបស់ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនផ្លូវដែកមិនត្រឹមតែជួយលើកកម្ពស់ការដឹកជញ្ជូន និងបង្កើនភាពប្រកួតប្រជែងលើវិស័យដឹកជញ្ជូន និងទាក់ទាក់ការវិនិយោគសម្រាប់កម្ពុជាប៉ុណ្ណោះទេ ថែមទាំងជួយកាត់បន្ថយការកកស្ទះចរាចរណ៍ និងគ្រោះថ្នាក់នៅតាមផ្លូវផងដែរ។ ជាមួយគ្នានេះ ដើម្បីរួមចំណែកជួយលើកកម្ពស់ការដឹកជញ្ជូន និងកាត់បន្ថយគ្រោះថ្នាក់ចរាចរណ៍នៅលើផ្លូវដែក ដែលតែងតែកើតមានជារឿយៗ ក្រសួងសាធារណការ និងដឹកជញ្ជូននឹងបង្កើនការបំពាក់ហេដ្ឋារចនាសម្ព័ន្ធការពារសុវត្ថិភាព ការបំពាក់ស្លាកសញ្ញាចរាចរណ៍នៅតាមដងផ្លូវដែក និងការផ្សព្វផ្សាយអប់រំពីចរាចរណ៍ផ្លូវដែក សំដៅជួយបង្កើនការយល់ដឹងដល់ប្រជាពលរដ្ឋ។
បើតាមការអះអាងរបស់ឯកឧត្តម ប៉េង ពោធិ៍នា កត្តាដែលបង្កឱ្យកើតមានគ្រោះថ្នាក់ចរាចរណ៍រវាងរថភ្លើង និងម៉ូតូ ឬរថយន្ត អាចបណ្តាលមកពីកំណើនផ្លូវប្រសព្វរវាងផ្លូវដែកនិងផ្លូវថ្នល់ ការរីកលូតលាស់របស់ព្រៃឈឺធ្វើឱ្យបារាំងស្លាកសញ្ញាចរាចរណ៍ និងកត្តាអ្នកបើកបរខ្វះការប្រុងប្រយ័ត្ន និងមិនគោរពច្បាប់ចរាចរណ៍ជាដើម៕
None
