ការបើកឡើងវិញនៃប្រទេសចិន ដែលជាប្រទេសមានសេដ្ឋកិច្ចធំបំផុតទី២របស់ពិភពលោកមួយនេះ បានបង្កក្តីបារម្ភដល់ការឡើងថ្លៃតម្លៃប្រេងឥន្ធនៈ លោហធាតុសំខាន់ៗក្នុងវិស័យឧស្សាហកម្ម និងស្បៀងអាហារជាសកលនៅឆ្នាំ២០២៣នេះ។ ការឡើងថ្លៃនេះក៏ដោយសារតែ ចិនដែលមានប្រជាជនច្រើនជាងគេមួយក្នុងពិភពលោក ចាប់ផ្តើមមានតម្រូវការប្រើប្រាស់ច្រើនឡើងវិញភ្លាមៗ។
ជាក់ស្តែង បើយោងតាមទិន្នន័យពីស្ថាប័ន London Metal Exchange បានបង្ហាញថា ចាប់តាំងពីដើមខែមករាឆ្នាំ២០២៣នេះមក តម្លៃទង់ដែង អាលុយមីញ៉ូម និងស័ង្កសី សុទ្ធតែឡើងថ្លៃខ្ពស់បើធៀបនឹងរយៈពេល១១ឆ្នាំចុងក្រោយ ពោលគឺបានកើនឡើងជាមធ្យមក្នុងរង្វង់ ១៣%។ ដោយឡែកសំណប៉ាហាំង ដែលភាគច្រើនប្រើសម្រាប់ផលិតគ្រឿងអេឡិចត្រូនិក បានកើនឡើងតម្លៃក្នុងរង្វង់៣០% ដែលជាការកើនឡើងខ្ពស់បំផុតក្នុងរយៈពេល៣២ឆ្នាំចុងក្រោយ។
ប៉ុន្តែអ្នកជំនាញ ផ្នែកលោហធាតុ និងការរុករករ៉ែនៅវិទ្យាស្ថាន UBS លោក Daniel Major ជឿថា លោហធាតុដូចជាទង់ដែង និងអាលុយមីញ៉ូមជាដើម មិនមែនជាចំណែកសំខាន់ណាស់ណា ទៅរុញច្រានអតិផរណាទាំងមូលឱ្យកើនឡើងនោះទេ។ តែផ្ទុយទៅវិញ ប្រសិនបើ តម្លៃអាហារ និងថាមពលសកលចាប់ផ្តើមឡើងថ្លៃម្តងទៀត នោះវាអាចនាំឱ្យតម្លៃទំនិញប្រើប្រាស់មានកាន់តែខ្ពស់ ដែលនេះហើយទើបជាកត្តាចម្បង ទៅរុញច្រានអតិផរណាឱ្យកើនឡើង។
អត្ថបទគួរអាន
ការបើកដំណើរការឡើងវិញរបស់ប្រទេសចិនអាចបង្កើនតម្រូវការច្រើនលើសលុបសម្រាប់ផលិតផលកសិកម្ម ស្របពេលដែលពិភពលោកនៅតែស្ថិតក្នុងភាពមិនច្បាស់លាស់នៃវិបត្តិស្បៀងអាហារសកលដដែល ដែលបង្កឡើងដោយសង្គ្រាមនៅអ៊ុយក្រែន។ តម្លៃស្រូវសាលីនាពេលអនាគតដែលជាប្រភពអាហារដ៏ចម្បងសម្រាប់មនុស្សជាច្រើន នៅតែស្ថិតក្នុងតម្លៃខ្ពស់ជាង ៥៨% បើធៀបនឹងតម្លៃកាលពីពាក់កណ្តាលឆ្នាំ២០២០។
មួយវិញទៀតកាលពីខែធ្នូ បន្ទាប់ពីប្រកាសបើកប្រទេសវិញភ្លាមៗ ការនាំចូលសណ្តែកសៀងរបស់ចិន ដែលភាគច្រើនប្រើសម្រាប់ការផលិតជាចំណីសត្វនោះ បានកើនឡើង១៨% ធៀបនឹងរយៈពេលដូចគ្នាកាលពីឆ្នាំមុន។
ក្រៅតែពីស្បៀងអាហារ និងលោហធាតុ ការបើកប្រទេសឡើងវិញរបស់ចិន ក៏ជំរុញតម្រូវការថាមពលឱ្យមានច្រើនជាងមុនផងដែរ ពិសេសគឺប្រេងតែម្តង។ ទីភ្នាក់ងារថាមពលអន្តរជាតិ ហៅកាត់ថា IEA បាននិយាយនៅក្នុងរបាយការណ៍មួយកាលពីសប្តាហ៍មុនថា តម្រូវការប្រេងសកលអាចកើនឡើងដល់កម្រិតខ្ពស់គ្រប់ពេលទាំងអស់ ពោលគឺក្នុងរង្វង់ជិត ១០២លានបារ៉ែលក្នុងមួយថ្ងៃនៅឆ្នាំ២០២៣ ដោយសារតែតម្រូវការពីប្រទេសចិន តំណាងឱ្យចំនួនជិតពាក់កណ្តាលនៃការកើនឡើងនេះទៅហើយ។
សេដ្ឋវិទូមកពីស្ថាប័ន Capital Economics និយាយថា តម្លៃប្រេងនឹងកើនឡើង ដោយសារមានតម្រូវការធ្វើដំណើរច្រើននៅប្រទេសចិន។ ស្ថាប័ននេះរំពឹងថា តម្លៃប្រេងនៅទីផ្សារគោលរបស់អង់គ្លេសអាចកើនពី៨៥ដុល្លារ ដល់៩៥ដុល្លារក្នុងមួយបារ៉ែល។ ការកើនឡើងតម្លៃប្រេងនេះហើយ ជាប្រភពទៅរុញឱ្យអត្រាអតិផរណាពិភពលោក កើនឡើងយ៉ាងឆាប់រហ័ស៕
អត្ថបទដោយ៖ សារៀម លក្ខិណា
