ឆ្លើយតបទៅនឹងការសន្យារបស់សហភាពអឺរ៉ុបថា នឹងគាំទ្រពេញទំហឹងដល់ប្រទេសកម្ពុជាដើម្បីបង្កើនសមត្ថភាពប្រកួតប្រជែងលើគុណភាពនិងធ្វើពិពិធកម្មទីផ្សារកម្ពុជាកំពុងតែផ្ដោតការយកចិត្តទុកដាក់កាន់តែខ្លាំងលើការនាំចេញអង្ករទីផ្សារអឺរ៉ុប។
ឯកឧត្តម បណ្ឌិត ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មបានឲ្យដឹងថា ទិសដៅធំក្នុងចំណោមទិសដៅសំខាន់បំផុតដែលកម្ពុជាបានធ្វើការនាំចេញអង្ករទៅកាន់ទីផ្សារអន្តរជាតិនោះ គឺសហគមន៍អឺរ៉ុប ជាទីផ្សារធំទី១ និងបន្ទាប់មកប្រទេសចិន និងម៉ាឡេស៊ី។
ឯកឧត្តម George Edgar ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជាបានផ្តល់បទសម្ភាសន៍ដល់ ភីអិនអិន ថា ប្រទេសកម្ពុជាមានសក្តានុពលគ្របដណ្តប់ស្ទើរតែគ្រប់វិស័យ ប៉ុន្តែសក្តានុពលដែលលេចធ្លោជាងគេ សម្រាប់ថ្ងៃអនាគត គឺការកែច្នែផលិតផលកសិកម្ម។
ឯកឧត្តមឯកអគ្គរដ្ឋទូតសហភាពអឺរ៉ុប បានលើកឡើងបន្ថែមទៀតថា សហភាពអឺរ៉ុបមានកិច្ចសហប្រតិបត្តិការទ្វេភាគីជាមួយកម្ពុជា ជាច្រើនក្នុងអំឡុងឆ្នាំ២០១៤ និងបន្តដល់ឆ្នាំ២០២០ ដែលមានទំហំទឹកប្រាក់ ៤១០លានអឺរ៉ូ សម្រាប់អភិវឌ្ឍប្រទេសកម្ពុជានៅក្នុងវិស័យអប់រំ វិស័យជលផល និងវិស័យអភិបាលកិច្ចល្អ និងចុងក្រោយក៏បានជួយរៀបចំប្រព័ន្ធចុះបញ្ជីបោះឆ្នោតនៅកម្ពុជាផងដែរ។
យោងតាមរបាយការណ៍ពីលេខាធិការដ្ឋានច្រកចេញចូលតែមួយ សម្រាប់បំពេញបែបបទនាំចេញអង្ករ បង្ហាញថា ការនាំចេញអង្ករទៅកាន់ទីផ្សារអន្តរជាតិកាលពីឆ្នាំ២០១៦ មានចំនួនជាង ៥៤ម៉ឺនតោន ក្នុងនោះ ៦៣ភាគរយនាំចេញទៅសហគមអឺរ៉ុប។
ប៉ុន្តែ បើពិនិត្យមើលតួលេខការនាំចេញនៅដើមឆ្នាំនេះវិញ ទំហំនៃការនាំចេញអង្ករទៅទីផ្សារអឺរ៉ុបមានការថមថយបន្តិចនៅត្រីមាសទី១ ឆ្នាំ២០១៧នេះ ពោលគឺថយពី៦៤ភាគរយ មកនៅត្រឹមជាង ៥០ភាគរយ។ ប៉ុន្តែ យ៉ាងណានៅឆ្នាំនេះ ឯកឧត្តមបណ្ឌិត ហ៊ាន វណ្ណហន រំពឹងថា ការនាំអង្ករទៅទីផ្សារអឺរ៉ុបនៅមានកំណើនខ្ពស់ដូចឆ្នាំទៅមុនដដែល៕
