មេ Facebook ខាតបង់ប្រាក់ ២៩ ពាន់លានដុល្លារក្នុងមួយថ្ងៃ ខណៈមេAmazonរកបាន ២០ពាន់លានដុល្លារ

លោក Mark Zuckerberg បានខាតបង់នូវទ្រព្យសម្បត្តិសុទ្ធ ២៩ ពាន់លានដុល្លារកាលពីថ្ងៃព្រហស្បតិ៍ ដោយភាគហ៊ុនរបស់ក្រុមហ៊ុន Meta Platforms Inc (FB.O) ដែលជាក្រុមហ៊ុនមេរបស់ Facebook បានធ្លាក់ចុះខ្លាំងបំផុត ខណៈដែលមហាសេដ្ឋីលោក Jeff Bezos ស្ថាបនិកក្រុមហ៊ុន Amazon នឹងកើនទ្រព្យសម្បត្តិ២០ ពាន់លានដុល្លារបន្ថែមទៀត។ នេះបើតាមការចុះផ្សាយរបស់សារព៌ត៍មាន Reuters។

លោក Mark Zuckerberg ខាតប្រាក់ ២៩ពាន់លានដុល្លារ ខណៈ លោក Jeff Bezos កើនទ្រព្យសម្បត្តិ២០ពាន់លានដុល្លារ

ភាគហ៊ុនរបស់ Meta បានធ្លាក់ចុះ ២៦% ដោយបានបាត់បង់ថវិការច្រើនជាង ២០០ ពាន់លានដុល្លារ ដែលនេះគឺជាការបាត់បង់ដ៏ធំមិនធ្លាប់មានក្នុងទីផ្សារសម្រាប់ក្រុមហ៊ុនអាមេរិក។ ទន្ទឹមនឹងនេះ វាបានធ្វើអោយប៉ះពាល់ដល់ទ្រព្យសម្បត្តិរបស់ស្ថាបនិក និងជានាយកប្រតិបត្តិក្រុមហ៊ុន Meta គឺលោក Zuckerberg មកនៅត្រឹម ៨៥ ពាន់លានដុល្លារ នេះបើតាមទស្សនាវដ្ដី Forbes។ ក្នុងនោះលោក Zuckerberg មានភាគហ៊ុនប្រហែល ១២,៨% នៃក្រុមហ៊ុនមេរបស់ Facebookមួយនេះ។

ដោយឡែក លោក Bezos ដែលជាស្ថាបនិក និងជាប្រធានក្រុមហ៊ុនលក់ទំនិញអេឡិចត្រូនិក Amazon វិញមានភាគហ៊ុនប្រមាណ ១០% នៃក្រុមហ៊ុន Amazon។

ទ្រព្យសម្បត្តិសុទ្ធរបស់លោក Bezos បានកើនឡើង ៥៧% មានដល់ទៅ ១៧៧ពាន់លានដុល្លារក្នុងឆ្នាំ២០២១ ដែលកើនឡើងមកពីការរីកដុះដាលរបស់ក្រុមហ៊ុន Amazon ក្នុងអំឡុងពេលរាតត្បាត នៅពេលដែលមនុស្សពឹងផ្អែកខ្លាំងលើការទិញទំនិញតាមអ៊ីនធឺណិត ហើយលោកក៏ត្រូវបានគេស្គាល់ថា ជាមហាសេដ្ឋីមានជាងគេបំផុតទី៣របស់ពិភពលោកផងដែរ។ នេះបើយោងតាមទស្សនាវដ្ដី Forbes។

គួបញ្ចាក់ថា ការធ្លាក់ចុះទ្រព្យសម្បត្តិមួយថ្ងៃរបស់ Zuckerberg គឺជាតួរលេខខាតបង់ដ៏ធំបំផុត ហើយបន្ទាប់ពីការខាតបង់នេះ នាយកប្រតិបត្តិក្រុមហ៊ុន Meta រូបនេះ បានធ្លាក់នៅលំដាប់ទី ១២ ក្នុងបញ្ជីមហាសេដ្ឋីពិភពលោកវិញផងដែរ៕