ថ្លែងក្នុង ពិធីសម្ពោធដាក់ឲ្យប្រើប្រាស់ជាផ្លូវការអគារមជ្ឈមណ្ឌលសូត្រខ្មែរ នៃសាកលវិទ្យាល័យភូមិន្ទ ភ្នំពេញនាពេលថ្មីៗនេះ ឯកឧត្តម បណ្ឌិត ម៉ីកល្យាណ ប្រធានក្រុមប្រឹក្សាភិបាលនៃសាកលវិទ្យាល័យភូមិន្ទភ្នំពេញ បានលើកឡើងថា កម្ពុជាមានការផលិតសូត្រតាំងពី២ពាន់ឆ្នាំមុនមែន តែការផលិតរបស់យើងនាពេលកន្លងមក គឺជាលក្ខណៈបុរាណនៅឡើយ។ ដូច្នេះហើយ ទើបសាកលវិទ្យាល័យភូមិន្ទភ្នំពេញ បានសហការជាមួយដៃគូពាក់ព័ន្ធ បង្កើតជាមជ្ឈមណ្ឌលសិក្សាស្រាវជ្រាវ បែបវិទ្យាសាស្ត្រនេះឡើង ដើម្បីជំរុញដល់សមត្ថភាពផលិតសូត្រនៅកម្ពុជា។
តាមឯកឧត្តម បណ្ឌិត ម៉ី កល្យាណ បច្ចុប្បន្នតម្រូវការសូត្រមានច្រើន ប៉ុន្ដែ ការផលិតក្នុងស្រុករបស់យើងនៅមានតិចតួចណាស់ ពោលគឺ បច្ចុប្បន្នទើបតែមានការដាំដុះដើមមន ប្រមាណ ១០០ហិកតាទេ ខណៈដែលកម្ពុជាត្រូវការដាំដើមមនដល់ទៅ ៤ម៉ឺនហិកតាឯណោះ ដើម្បីអាចផលិតសូត្របាន៤០០ តោនដែលជាតម្រូវការប្រចាំឆ្នាំ។
អត្ថបទទាក់ទង!
តែយ៉ាងណា ឯកឧត្តមគូសបញ្ជាក់ថា អ្វីៗ ត្រូវការចាប់ផ្ដើមពីជំហានទីមួយទៅ។ បច្ចុប្បន្ន ការដាំដុះដើមមន និងការចិញ្ចឹមដង្កូវនាងគឺកំពុងមាននៅទីតាំង ៧កន្លែង នៅខេត្តកំពង់ស្ពឺ កំពង់ឆ្នាំ និងមណ្ឌលគីរី ហើយក៏នឹងពង្រីកបន្ថែមទៅកាន់ខេត្តផ្សេងៗទៀតផងដែរ។
ឯកឧត្តមបណ្ឌិត ម៉ី កល្យាណ បានបញ្ជាក់ដែរថា ការស្រាវជ្រាវ និងផលិតសូត្រដោយមានការពិសោធន៍បែបវិទ្យាសាស្ត្រនេះ គឺមិនត្រឹមតែជាការរក្សានូវកេរ្ដ៍ដំណែលផលិតបែបវប្បធម៌ប៉ុណ្ណោះទេ ប៉ុន្ដែ វាក៏ជាការជួយដល់សេដ្ឋកិច្ចជាតិដែរ ដូច្នេះ ហើយលោកសង្ឃឹមថា ប្រជាពលរដ្ឋនឹងជួយរួមចំណែកដាំដុះដើមមន និងចិញ្ចឹមដង្កូវនាង ដើម្បីជាការរកចំណូលសម្រាប់គ្រួសារផង និងជួយដល់វិស័យផលិតសូត្រខ្មែរផងដែរ។
អគារមជ្ឈមណ្ឌលផលិតសូត្រខ្មែរ ទើបបើកសម្ពោធដាក់ឲ្យដំណើរការ នៅក្នុងសាកលវិទ្យាល័យ ភូមិន្ទភ្នំពេញ
បន្ថែមពីនេះទៀត មជ្ឈមណ្ឌលផលិតសូត្រខ្មែរ ក៏មានគោលដៅ ធ្វើការស្រាវជ្រាវពីដើមមន ដង្កូវនាង និងសរសៃសូត្រ ដើម្បីផលិតនូវផលិតផលនានា ដូចជាសាប៊ូ គ្រឿងសម្អាង និងអាហារបំប៉នជាដើម។
ឯកឧត្តមបណ្ឌិត ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងដែរថា វិស័យសូត្រនេះមានសារៈសំខាន់ណាស់ និងផ្តល់ប្រយោជន៍ជាច្រើនចំពោះប្រជាកសិករ ដូចជា៖ ទី១ ផ្តល់ការងារនិងប្រាក់ចំណូលបន្ថែមដល់កសិករ។ ទី២ផ្តល់លទ្ធភាពឲ្យចាស់ជរា ស្ត្រី និងជនពិការអាចចូលរួមបាន។ ទី៣ កាត់បន្ថយចំណាកស្រុក។ ទី៤ មិនប៉ះពាល់ដល់បរិស្ថាន និងទី៥ គឺអភិរក្ស និងលើកស្ទួយប្រពៃណីទំនៀមទម្លាប់ខ្មែរយើង។
សរសៃសូត្រដែលបានផលិតចេញ ដាក់តាំងបង្ហាញ
ឯកឧត្តម រដ្ឋមន្ត្រី បន្ថែមទៀតថា មជ្ឈមណ្ឌលស្រាវជ្រាវសូត្រខ្មែរ ដែលទើបបើកដំណើរការនាពេលថ្មីៗនេះ មាន បច្ចេកទេស និងការបង្កាត់ពូជដង្កូវនាង ដែលស័ក្ដិសមនឹងបរិយាកាស ដែលវានឹងជួយបង្កើនផលិតផលកាន់តែប្រសើរ និងគុណភាពក៏កាន់តែខ្ពស់ឡើងផងដែរ។
គួរបញ្ជាក់ថា អគារមជ្ឈមណ្ឌលសូត្រខ្មែរដែលទើបបើកសម្ពោធដាក់ឲ្យប្រើប្រាស់នេះ ត្រូវបានសាងសង់ឡើងក្រោមជំនួយឥតសំណងរបស់ប្រជាជន និងរាជរដ្ឋាភិបាលជប៉ុន តាមរយៈស្ថានទូតជប៉ុនប្រចាំកម្ពុជា ដោយជប៉ុន បានផ្ដល់ទឹកប្រាក់លើគម្រោងនេះ ចំនួនប្រមាណ ៩ម៉ឺនដុល្លារអាមេរិក។ ក្រៅពីជំនួយថវិកាពីប្រទេស ជប៉ុន ក៏មានការជួយឧបត្ថម្ភជាសម្ភារបរិក្ខា និងសម្ភារស្រាវជ្រាវមួយចំនួន ទៀត ពីអង្គការ UNDP ផងដែរ ដែលស្មើនឹងទឹកប្រាក់ប្រមាណ ជាង ១ម៉ឺន ៦ពាន់ដុល្លារអាមេរិក។
ដើមមនដែលដាំដុះសម្រាប់ការចិញ្ចឹមដង្កូវនាង ដើម្បីផលិតសរសៃសូត្រ
ឯកឧត្ដម ហូរីណូអ៊ុជិ ហ៊ីដេហ៊ីសា ឯកអគ្គរាជទូតនៃប្រទេសជប៉ុនប្រចាំកម្ពុជា បានគូសបញ្ជាក់ដែរថា ជំនួយអភិវឌ្ឍរបស់ជប៉ុនលើការផលិតសូត្រខ្មែរនេះ មានគោលបំណងឲ្យកម្ពុជាផលិតដង្កូវនាង ដែលគ្មានជំងឺ ហើយផ្គត់ផ្គង់ទៅដល់កសិករប្រមាណ ៥០ គ្រួសារ ព្រមទាំងផ្ទេរបច្ចេកទេស ទៅដល់កសិករទាំងនេះ ដើម្បីឲ្យពួកគាត់អាចចិញ្ចឹមដង្កូវនាងប្រកបដោយស្ថិរភាព និងអាចង្កើនប្រាក់ចំណូលទាំងកសិករ និងភាគីពាក់ព័ន្ធនៃឧស្សាហកម្មសូត្រ។
ដើមមន សម្រាប់ចិញ្ចឹមដង្កូវនាង ដើម្បីផលិតជាសរសៃសូត្រ
តាមអ្នកជំនាញ បានបញ្ជាក់ថា កន្លងមកកម្ពុជាបានបញ្ជាទិញផលិតផលសូត្រនេះ ពីប្រទេសជិតខាង ដូចជា វៀតណាម ថៃ និងចិនជាដើម។ ក្នុងពិភពលោក ប្រទេសចិន ត្រូវបាន គេដឹងថា គឺជាអ្នកផលិតសូត្រធំជាងគេ ដែលមានរហូតដល់៨០% នៃការផលិតសរុបនៅទូទាំងពិភពលោក។ ទោះយ៉ាងណា និន្នាការផលិតសូត្រនៅទូទាំងពិភពលោក រួមទាំងប្រទេសចិនផង កំពុងបង្ហាញពីការធ្លាក់ចុះ ដែលបានញ៉ាំងឲ្យតម្លៃសូត្រកំពុងងើបឡើងខ្ពស់ជាលំដាប់។ អ្នកជំនាញ បញ្ជាក់ទៀតថា ការផលិតសូត្រនេះ គឺមានទីផ្សារ តួយ៉ាងគ្រាន់តែចាប់ផ្ដើមការស្រាវជ្រាវ និងផលិតសូត្រជាលើដំបូងរបស់មជ្ឈមណ្ឌលផលិតសូត្រកម្ពុជា ឃើញថា មានអ្នកបញ្ជាទិញខ្លះហើយ៕
None
