រដ្ឋាភិបាលប្រទេសទាំងពីរ កម្ពុជា និងវៀតណាម ធ្លាប់បានកំណត់គោលដៅបង្កើនទំហំពាណិជ្ជកម្មទ្វេភាគីរវាងគ្នា ឲ្យបានកើនដល់ទៅ ៥ពាន់លានដុល្លារអាមេរិក នៅត្រឹមបំណាច់ឆ្នាំ ២០១៥ ប៉ុន្តែ រហូតមកដល់ក្នុងឆ្នាំ ២០១៧ ក៏នៅតែមិនបានសម្រេចតាមទិសដៅ ពោលបានត្រឹមតែ ៣,៨ពាន់លានដុល្លារអាមេរិកប៉ុណ្ណោះ។
រហូតមកដល់ ៧ខែ ដើមឆ្នាំ ២០១៨នេះ ទំហំពាណិជ្ជកម្មទ្វេភាគីរវាងកម្ពុជា និងប្រទេសវៀតណាមសម្រេចបានប្រមាណ ២,៧ ពាន់លានដុល្លារអាមេរិក ឃើញថា កើនឡើងប្រមាណ ១៨ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៧។ ប៉ុន្តែយ៉ាងណាក៏ដោយ មិនទាន់ដល់គោលដៅនោះទេ។ នេះបើយោងតាមរបាយការណ៍ផ្លូវការរបស់ ក្រសួងពាណិជ្ជកម្ម។
អត្ថបទទាក់ទង!
ជុំវិញទៅនឹងការដែលមិនទទួលបានជោគជ័យនៅទិសដៅបង្កើនទំហំពាណិជ្ជកម្មឲ្យបានដល់ ៥ពាន់លានដុល្លារអាមេរិកនៅត្រឹមឆ្នាំ២០១៥ មិនមានហេតុផលណាមួយច្បាស់លាស់ដែលត្រូវបកស្រាយនោះទេ ប៉ុន្តែបើតាម រដ្ឋមន្ត្រីក្រសួងពាណិជ្ជកម្មកម្ពុជា ឯកឧត្តម ប៉ាន សូរស័ក្តិ បានអំពាវនាវសុំឲ្យវិស័យឯកជនកម្ពុជា-វៀតណាម ខិតខំបង្កើនការវិនិយោគទៅវិញទៅមក ដើម្បីឈានទៅសម្រេចបាននូវទំហំពាណិជ្ជកម្មទ្វេភាគីចំនួន ៥ពាន់លានដុល្លារអាមេរិក ដែលបានកំណត់កាលពីឆ្នាំ ២០១៥ និង កំណើនសេដ្ឋកិច្ចសម្រាប់ប្រជាជននៃប្រទេសទាំងពីរ។
រដ្ឋមន្ត្រីពាណិជ្ជកម្ម បានគូសបញ្ជាក់ទៀតថា បច្ចុប្បន្នវៀតណាម គឺជាដៃគូវិនិយោគធំលំដាប់ ទី៥ របស់កម្ពុជា ក្នុងនោះ ការវិនិយោគរបស់ក្រុមហ៊ុនវៀតណាម នៅប្រទេសកម្ពុជា មានប្រមាណ ២០៦គម្រោង ដែលមានទឹកប្រាក់វិនិយោគប្រមាណជាង ៣ពាន់លានដុល្លារអាមេរិក ខណៈក្រុមហ៊ុនរបស់កម្ពុជា វិនិយោគនៅប្រទេសវៀតណាម មានត្រឹមតែ ១៨គម្រោង មានទឹកប្រាក់វិនិយោគប្រមាណជិត ៦០លានដុល្លារប៉ុណ្ណោះ។
សូមបញ្ជាក់ថា មុខទំនិញសំខាន់ៗដែលប្រទេសវៀតណាម នាំចូលមកកាន់ប្រទេសកម្ពុជា កាលពីឆ្នាំ ២០១៧ មានដូចជា គ្រឿងសម្ភារសំណង់ ដែកថែប និង ដែកផ្សេងៗ តម្លៃជាង ៥០០លានដុល្លារ ប្រេងឥន្ធនៈតម្លៃជិត ៤០០លានដុល្លារ និង ជីកសិកម្ម សម្លៀកបំពាក់ គ្រឿងម៉ាស៊ីន និង ផលិតផលប្លាស្ទិក។
ដោយឡែក មុខទំនិញសំខាន់ៗរបស់កម្ពុជា ដែលនាំចេញទៅវៀតណាម ភាគច្រើន ជាឈើហុប និងផលិតផលធ្វើពីឈើ ដែលមានតម្លៃជាង ២០០លានដុល្លារ ស្វាយចន្ទីតម្លៃជិត ១៧០លានដុល្លារ និងកៅស៊ូតម្លៃជាង ១៣០លានដុល្លារ និង ស្រូវ ជាដើម។
អត្ថបទគួរឲ្យចាប់អារម្មណ៍!
គួរបញ្ជាក់ជាថ្មីថា កាលពីឆ្នាំ ២០១៧ ការដោះដូរពាណិជ្ជកម្មរវាងកម្ពុជា និងវៀតណាម មានទំហំជាទឹកប្រាក់ប្រមាណ ៣.៨០០ លានដុល្លារ គឺកើនឡើងជិត ៣០ភាគរយ បើប្រៀបធៀបនឹងឆ្នាំ ២០១៦ កន្លងទៅ៕
