ក្រសួងសុខាភិបាលកម្ពុជា អនុញ្ញាឲ្យប្រើប្រាស់វ៉ាក់សាំង Covaxin របស់ឥណ្ឌាក្នុងក្របខណ្ឌបន្ទាន់

វ៉ាក់សាំងឈ្មោះថា Covaxin គឺជាវ៉ាក់សាំងទី១ របស់ប្រទេសឥណ្ឌា ដែលផលិតដោយខ្លួនឯង ហើយទទួលបានការទទួលស្គាល់ និងអនុញ្ញាតឲ្យប្រើប្រាស់ជាផ្លូវការ ពីអង្គការសុខភាពពិភពលោក(WHO)។ វ៉ាក់សាំង Covaxin មិនទាមទារលក្ខខណ្ឌរក្សាទុកខ្ពស់ ដូចវ៉ាក់សាំងរបស់អឺរ៉ុបនោះទេ គឺគេអាចរក្សាទុកវាក្នុងសីតុណ្ហភាពចន្លោះពី២ ទៅ៨អង្សារ ដែលវាសាកសមនឹងប្រទេសដែលមានចំណូលទាប និង មធ្យម ក្នុងការស្តុកទុក និងចាក់ជូនដល់ពលរដ្ឋខ្លួន។ ជាមួយគ្នានេះ វ៉ាក់សាំង Covaxin  តម្រូវឲ្យចាក់ពីរដូស ដែលទាមទារឱ្យរក្សាក្នុងគម្លាត ពីដូសទី១ រហូតដល់ដូសទី២ រយៈពេលជាង ១ខែ។

តាមពិតទៅ រដ្ឋាភិបាលឥណ្ឌា បានអនុម័តប្រើប្រាស់វ៉ាក់សាំង Covaxin នេះ តាំងពីខែមករា ដើមឆ្នាំ២០២១ ម្លេះ មុនពេលដែលអង្គការ WHO ប្រកាសទទួលស្គាល់ទៅទៀត។ គិតមកទល់ពេលនេះ ឥណ្ឌាបានប្រើប្រាស់វ៉ាក់សាំង កូវ៉ាក់ស៊ីននេះ ចាក់ជូនពលរដ្ឋខ្លួនបាន ជាង១២០លានដូសហើយ ដែលស្មើនឹង ១១% នៃពលរដ្ឋឥណ្ឌាសរុប។

ការអនុម័តឲ្យប្រើប្រាស់វ៉ាក់សាំងថ្មីនេះ ត្រូវបានគេរំពឹងថា នឹងជួយជំរុញដល់ការចែកចាយវ៉ាក់សាំងបង្ការកូវីដ-១៩ ឲ្យកាន់តែច្រើនដល់ប្រទេសក្រីក្រ ក្នុងនាមឥណ្ឌាជាដៃគូដ៏សំខាន់មួយរបស់យន្តការ Covax នៃអង្គការសុខភាពពិភពលោក ទទួលបន្ទុកបែងចែកវ៉ាក់សាំងដោយស្មើភាព។

សូមបញ្ជាក់ថា គិតមកទល់ពេលនេះ អង្គការសុខភាពពិភពលោក បានទទួលស្គាល់វ៉ាក់សាំងបង្ការកូវីដ-១៩ សរុបចំនួន៨ រួមមាន វ៉ាក់សាំងរបស់អាមេរិក Pfizer/BioNtech, Moderna  Johnson&Johnson AstraZeneca របស់អង់គ្លេស និង Sinopharm និង Sinovac របស់ចិន ហើយចុងក្រោយគឺ កូវ៉ាក់ស៊ីន Covaxin របស់ឥណ្ឌានេះឯង៕