ការនាំចេញរបស់កម្ពុជាទៅថៃធ្លាក់ចុះ២៨% ខណៈនាំចូលពីថៃកើន ១៤% នៅ៩ខែឆ្នាំនេះ

ទិន្នន័យពីនាយកដ្ឋានគយថៃបានបង្ហាញឲ្យឃើញថា ការនាំចេញទំនិញពីកម្ពុជាទៅកាន់ទីផ្សារថៃ នៅ៩ក្នុងឆ្នាំ២០២១ សម្រេចបាន៦៨៧លានដុល្លារ ធ្លាក់ចុះ២៨% បើធៀបនឹងរយៈពេលដូចគ្នា កាលពីឆ្នាំមុខ ដែលមានទឹកប្រាក់ចំនួន៩៥៨លានដុល្លារ។ ប៉ុន្តែបើយើងមើលទៅលើតួលេខនាំចូលពីថៃមកកម្ពុជាវិញ គឺនៅតែបង្ហាញសញ្ញាវិជ្ជមាន ជាមួយទំហំទឹកប្រាក់ជាង៥ពាន់២រយលានដុល្លារកើនឡើង១៤% បើធៀបនឹង៩ខែកាលពីឆ្នាំ២០២០ ដែលមានតែជាង៤ពាន់៦រយលានដុល្លារ តែប៉ុណ្ណោះ។ 

ការធ្វើពាណិជ្ជកម្មរវាងប្រទេសទាំងពីរនៅ៩ខែក្នុងឆ្នាំ២០២១ មានទំហំជាង៥ពាន់៩រយលានដុល្លារមានការកើនឡើង១៨% បើធៀបនឹងទំហំពាណិជ្ជកម្មនៅ៩ខែកាលពីឆ្នាំ២០២០ ដែលសម្រេចបានប្រមាណ៥ពាន់លានដុល្លារតែប៉ុណ្ណោះ។ ដោយឡែកបើយើងក្រឡេកមកមើលទំហំពាណិជ្ជកម្មរវាងប្រទេសទាំងពីរនៅក្នុងខែកញ្ញា សម្រេចបាន៧៣២លានដុល្លារ កើនឡើង៤៨% បើធៀបនឹង៤៩៥លានដុល្លារកាលពីឆ្នាំមុន។ 

បើតាមទិន្នន័យរបស់អគ្គនាយកដ្ឋានគយថៃខាងលើ មុខទំនិញដែលកម្ពុជានាំចេញទៅថៃ រួមមានផលិតផលវាយនភណ្ឌ កសិផល ត្បូងថ្មមានតម្លៃ វត្ថុធាតុដើម និងប្រភេទពាក់កណ្តាលសម្រេច ខណៈកម្ពុជានាំចូលទំនិញពីថៃវិញរួមមានថាមពល ត្រី សាច់ រថយន្ត ជីសរីរាង្គ ស៊ីម៉ង់តិ៍ គ្រឿងឧបភោគ-បរិភោគ គ្រឿងសំអាង និងសម្ភារៈសំណង់៕