ការចុះផ្សាយពីទំព័រហ្វេសប៊ុករបស់សហព័ន្ធស្រូវអង្ករកម្ពុជា CRF បានឲ្យដឹងថា សម្រាប់ការប្រកួតគុណភាពអង្ករក្នុងឆ្នាំនេះ អង្ករកម្ពុជាមិនទទួលបានពានជាអង្ករល្អបំផុតលេខ១នោះទេ ក៏ប៉ុន្តែ អង្ករកម្ពុជានៅតែជាប់ជាអង្ករល្អបំផុត (Top Three Finalists) ក្នុងណោមសំណាកអង្ករទាំង២១ប្រភេទ មកពី ៧ប្រទេស។
ប្រទេសដែលបានដាក់អង្ករតំណាងប្រទេសរបស់ខ្លួនសម្រាប់ចូលរួមប្រកួតប្រជែងគុណភាពអង្ករល្អបំផុតប្រចាំឆ្នាំថ្នាក់ពិភពលោកនេះ រួមមាន កម្ពុជា ថៃ វៀតណាម មីយ៉ាន់ម៉ា ស្រីលង្កា ប៉ាគិស្ថាន និង សហរដ្ឋអាមេរិក។ ក្នុងនោះ ប្រទេសថៃនៅតែរក្សាបានតំណែងជាអង្ករល្អបំផុតលើពិភពលោកលំដាប់លេខ១ ខណៈដែលកម្ពុជាទទួលបានចំណាត់ថ្នាក់លេខ២ និងវៀតណាមទទួលបានលេខ៣។
បើតាមការគូសបញ្ជាក់ពីសហព័ន្ធស្រូវអង្ករកម្ពុជា ការជាប់ក្នុងចំណោមកំពូលអង្ករល្អបំផុតទាំងបីនេះ ក៏ជាឱកាសធ្វើទីផ្សារនិងឱកាសរីកចម្រើនសម្រាប់អង្ករកម្ពុជានៅក្នុងថ្ងៃអនាគតផងដែរ ទោះបីជាមិនអាចដណ្ដើមបានតំណែងលេខ១ក៏ដោយ។
តើអ្នកបានអានអត្ថបទនេះឬនៅ?
គិតមកទល់ឆ្នាំនេះ តំណែងលេខ១ ត្រូវបានធ្លាក់មកលើប្រទេសថៃ៣ឆ្នាំជាប់គ្នាហើយ ខណៈដែលកម្ពុជាបានធ្លាក់មកនៅតំណែងលេខ២ អស់រយៈពេល៣ឆ្នាំជាប់គ្នាដូចគ្នា។ យ៉ាងណាក៏ដោយ កម្ពុជាក៏ធ្លាប់គ្រងតំណែងលេខ១ បីឆ្នាំជាប់គ្នាដែរ កាលពីអំឡុងឆ្នាំ២០១២-២០១៤។
លោក Chookiat Ophaswongse តំណាងប្រធានសមាគមអ្នកនាំចេញអង្ករថៃ បានប្រាប់កាសែតបាងកកប៉ុស្តិ៍ ថា ការដាក់ពិន្ទុសម្រាប់ការប្រកួតប្រជែងអង្ករល្អបំផុតលើពិភពលោកនេះ ត្រូវបានចូលរួមដោយចុងភៅល្បីៗ នៃសណ្ឋាគារលំដាប់ខ្ពស់នៅទីក្រុងម៉ាកាវ ហើយការដាក់ពិន្ទុនេះ ធ្វើឡើងតាមរយៈការភ្លក្សនូវរសជាតិអង្ករដែលបានចម្អិន និងសោភ័ណភាពនៃគ្រាប់អង្ករផងដែរ។
លោកបន្តថា ការទទួលបានតំណែងលេខ១នៅឆ្នាំនេះ នឹងជំរុញឲ្យប្រាក់ចំណូលនៃវិស័យស្រូវអង្កររបស់ថៃនឹងមានការកើនឡើង ហើយវាក៏នឹងពង្រីកបន្ថែមនូវតម្រូវការនៃទីផ្សារពិភពលោក និងតម្លៃអង្ករផងដែរ។
លោក Chookiat Ophaswongse បានគូសបញ្ជាក់ទៀតថា តម្លៃអង្ករប្រណីតរបស់ថៃ ហូមម៉ាលី (Hom Mali) នៅលើទីផ្សារ បានមានតម្លៃខ្ពស់ជាងតម្លៃអង្ករក្រអូបប្រណីតរបស់កម្ពុជានិងវៀតណាមរួចទៅហើយ ពោលគឺ អង្ករក្រអូបប្រណីតរបស់ថៃមានតម្លៃ ៨៥០ដុល្លារក្នុងមួយតោន ខណៈដែលអង្ករក្រអូបប្រណីតរបស់កម្ពុជា មានតម្លៃតែជាង ៧៥០ដុល្លារក្នុង ១តោន រីឯអង្ករប្រណីតរបស់វៀតណាមមានតម្លៃត្រឹមតែ ៥៥០ដុល្លារក្នុង១តោនប៉ុណ្ណោះ។
តើអ្នកបានអានអត្ថបទនេះ ឬនៅ?
យ៉ាងណាក៏ដោយ កាលពីអំឡុងដែលកម្ពុជានៅគ្រងតំណែងអង្ករល្អបំផុតលេខ១លើពិភពលោក តម្លៃអង្ករកម្ពុជាក៏បានកើនឡើងប្រកៀកប្រកិតនឹងតម្លៃអង្ករក្រអូបប្រណីតរបស់ថៃដែរ។
សូមបញ្ជាក់ដែរថា បើតាមប្រសាសន៍របស់ឯកឧត្តម សុខ ពុទ្ធិវុធ ប្រធានសហព័ន្ធស្រូវអង្ករកម្ពុជា ធ្លាប់បានគូសបញ្ជាក់ទៀតថា ត្បិតថា ប៉ុន្មានឆ្នាំកន្លងមកនេះ កម្ពុជាមិនបានឈរក្នុងតំណែងលេខ១ក៏ដោយ ប៉ុន្ដែ កម្ពុជាមិនដែលចាកចេញពីកំពូលលំដាប់ទាំងបីនៃអង្ករល្អបំផុតនោះឡើយ ហើយការធ្លាក់មកនៅលេខ២នេះ ក៏មិនមានផលប៉ះពាល់ដល់ការនាំចេញអង្កររបស់កម្ពុជានោះដែរ។
លោកឧកញ៉ា ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា និងជាអគ្គនាយកក្រុមហ៊ុន HCC Group ក៏ធ្លាប់បានលើកឡើងដែរថា បើនិយាយពីគុណភាពអង្ករវិញ គុណភាពអង្កររបស់កម្ពុជា និងថៃគឺមានភាពប្រហាក់ប្រហែលគ្នា ពោលគឺមិនល្អៀងគ្នាខ្លាំងនោះទេ។
យ៉ាងណាក៏ដោយ គិតមកដល់ឆ្នាំនេះ ប្រទេសថៃគ្រងតំណែងលេខ១ បាន ៣ឆ្នាំហើយ យើងនឹងចាំមើលថា តើនៅឆ្នាំក្រោយ ប្រទេសណានឹងអាចប្រជែងតំណែងលេខ១នេះបានវិញម្ដង!!!
None
