សហភាពអឺរ៉ុប កាលពីខែមករា បានចាប់ផ្ដើមយកពន្ធលើការនាំចេញអង្ករពីកម្ពុជានិងមីយ៉ាន់ម៉ា ទៅកាន់ទីផ្សារអឺរ៉ុប សម្រាប់រយៈពេលបីឆ្នាំ ដើម្បីការពារកសិករអឺរ៉ុប ដូចជា ប្រទសអ៊ីតាលី ជាដើម។
របាយការណ៍បច្ចុប្បន្នភាពសេដ្ឋកិច្ចកម្ពុជា របស់ធនាគារពិភពលោក បានបង្ហាញថា បន្ទាប់ពីអឺរ៉ុបចាប់ផ្ដើមយកពន្ធលើអង្ករកម្ពុជា នៅក្នុងខែកុម្ភៈនេះមក កម្ពុជាបាននាំចេញអង្ករបានត្រឹមតែចំនួន ១០.០៨០តោនប៉ុណ្ណោះ ទៅទីផ្សារអឺរ៉ុប ពោលគឺធ្លាក់ចុះ ៥៧,៨ភាគរយ។
នៅឆ្នាំ២០១៨កន្លងទៅ កម្ពុជាបាននាំចេញអង្ករចំនួន ២៧ម៉ឺនតោន ឬស្មើនឹង ៤៣ភាគរយនៃការនាំចេញអង្ករសរុបរបស់ខ្លួន ទៅកាន់អឺរ៉ុប។ ផ្ទុយទៅវិញ ប្រទេសចិនបានបង្កើនកូតានាំចេញអង្ករពីកម្ពុជា ពីចំនួន ៣០ម៉ឺនតោន នៅឆ្នាំ២០១៨ ទៅដល់ ៤០ម៉ឺនតោន នៅឆ្នាំ២០១៩នេះ។
របាយការណ៍ធនាគារពិភពលោក បាននិយាយដូច្នេះថា «សរុបមក ការថយចុះនៃការនាំចេញអង្កររបស់កម្ពុជា ទៅកាន់សហភាពអឺរ៉ុប ត្រូវបានប៉ះប៉ូវដោយការកើនឡើងនៃការនាំចេញអង្ករទៅកាន់ទីផ្សារចិន។»
តើបានអានអត្ថបទនេះ ឬនៅ?
របាយការណ៍ដដែល និយាយថា ការនាំចេញអង្ករពីកម្ពុជាទៅប្រទេសចិនបានកើនឡើង ៤៥,៦ភាគរយ ហើយជាលទ្ធផល បានធ្វើឲ្យកម្ពុជាមានកំណើនការនាំចេញអង្ករទាំងអស់ ចំនួន ២ភាគរយ ក្នុងរយ:ពេល ២ខែនៃដើមឆ្នាំ២០១៩នេះ។ តួលេខផ្លូវការបង្ហាញថា កម្ពុជាសម្រេចបានទឹកប្រាក់ ចំនួន ៤១៣,៥លានដុល្លារ ពីការនាំចេញអង្ករនៅឆ្នាំ២០១៨។
បន្ទាប់ពីសហភាពអឺរ៉ុបប្រកាសយកពន្ធមក អង្ករកម្ពុជាត្រូវបង់ពន្ធ ១៧៥អឺរ៉ូ ក្នុងមួយតោន ក្នុងឆ្នាំទី១ ហើយនិងធ្លាក់មកនៅត្រឹម ១៥០អឺរ៉ូ ក្នុងមួយតោន នៅឆ្នាំទី២ និង ១២៥ អឺរ៉ូ នៅក្នុងឆ្នាំទី៣។
ទោះបីជាមានការផ្សាយថា សហព័ន្ធស្រូវអង្ករកម្ពុជាបានស្នើសុំឱ្យតុលាការទូទៅនៃសហភាពអឺរ៉ុបលុបចោលបទបញ្ជារបស់សហភាពអឺរ៉ុប ដែលបានដាក់វិធានការការពារពាណិជ្ជកម្ម ប្រឆាំងនឹងការនាំចូលអង្ករពីកម្ពុជាក៏ដោយ ក៏មិនទាន់មានការប្រកាសជាផ្លូវការអ្វីនៅឡើយទេ ជុំវិញបញ្ហានេះ។
ក្រសួងពាណិជ្ជកម្មកម្ពុជា ធ្លាប់បាននិយាយថា ក្រសួងកំពុងពិគ្រោះយោបល់ថា ត្រូវធ្វើយ៉ាងម៉េចបន្តទៀត ទាក់ទងនឹងវិធានការសហភាពអឺរ៉ុបមកលើអង្ករកម្ពុជា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
