តាមរយៈការចុះផ្សាយសារព័ត៌មានធំៗ នៅក្នុងស្តូបឧទ្យានអនុស្សាវរីយ៍សន្តិភាពហ៊ីរ៉ូស៊ីម៉ាកាលពីថ្ងៃអាទិត្យនោះ មានតំណាងមកពីប្រទេសចំនួន ១១១ បានចូលរួមនៅពិធីប្រារព្ធខួបលើកទី៧៨ឆ្នាំនេះ។ មិនខុសពីឆ្នាំ២០២២ទេ ប្រទេសរុស្ស៊ី និងបេឡារុស្សមិនត្រូវបានអញ្ជើញឱ្យមកចូលរួមទេ ដោយសារធ្វើសង្គ្រាមនៅអ៊ុយក្រែន។
ព្រឹត្តិការណ៍នេះកើតឡើងដើម្បីនឹករលឹកទៅដល់ជនរថគ្រោះដែលជាប្រជាជនជប៉ុនរាប់សែននាក់ ដែលបានបាត់បង់ជីវិតត្រឹមតែមួយពព្រិចភ្នែក ដោយសារគ្រាប់បែនបរមាណូរបស់អាមេរិក និងចំពេលដែលរុស្ស៊ីកំពុងព្រមានដោយលើកសេណារីយ៉ូប្រើប្រាស់នុយក្លេអ៊ែរនៅក្នុងសង្គ្រាមអ៊ុយក្រែន។
នៅថ្ងៃទី៦ ខែកក្កដា វេលាម៉ោង៨៖១៥នាទី ជាពេលដែលគ្រាប់បែកត្រូវបានទម្លាក់កាលពី៧៨ឆ្នាំមុន ហើយក្នុងឱកាសប្រារព្ធខួបលើកទី៧៨ នៃព្រឹត្តិការណ៍សោកនាកម្មនេះ ក៏មានមនុស្សប្រមាណ៥ម៉ឺននាក់បានចូលរួមដោយភាពស្មឹងស្មាត និងស្ងប់ស្ងាត់ ដើម្បីរំលឹកចំពោះអ្នកដែលរងគ្រោះ។
អត្ថបទគួរអាន
អភិបាលក្រុងហ៊ីរ៉ូស៊ីម៉ា លោក Kazumi Matsui បាននិយាយនៅក្នុងពិធីនេះថា «មេដឹកនាំនៅជុំវិញពិភពលោកត្រូវតែប្រឈមមុខនឹងការពិតដែលថា ការគំរាមកំហែងនុយក្លេអ៊ែរឥឡូវនេះកំពុងបន្លឺឡើងសម្រាប់អ្នកបង្កើតគោលនយោបាយមួយចំនួន ដោយពួកគេគិតថា មានតែប្រើទ្រឹស្តីនុយក្លេអ៊ែទប់ស្គាត់នុយក្លេអ៊ែរទេ ទើបអាចបញ្ជៀសសង្គ្រាមនុយក្លេអ៊ែរបាន។ គំនិតនេះលោកកាហ្ស៊ូមីថា«ជាគំនិតឆោតល្ងង់»។
ទោះយ៉ាងណា នាយករដ្ឋមន្ត្រីជប៉ុនថា ផ្លូវទៅកាន់ពិភពលោកដែលគ្មានអាវុធនុយក្លេអ៊ែរ គឺកាន់តែមិនអាចទៅរួច ដោយសារបច្ចុប្បន្ននេះរុស្ស៊ីកំពុងប្រើវាដើម្បីគំរាមកំហែងអ៊ុយក្រែន។ ប៉ុន្តែលោកថា វាមិនមែនជារឿងដែលថា មិនអាចទប់ស្កាត់បាននោះទេ ឱ្យតែពិភពលោកស្ថិតនៅលើផ្លូវជាមួយគ្នា ដើម្បីគោលដៅគ្មាននុយក្លេអ៊ែរ។ ក្នុងនោះ អគ្គលេខាធិការអង្គការសហប្រជាជាតិ លោក Antonio Guterres ក៏បានសម្តែងការគាំទ្រដែរ។
យោងតាមមជ្ឈមណ្ឌលស្រាវជ្រាវនៃសាកលវិទ្យាល័យ Nagasaki សម្រាប់ការលុបបំបាត់អាវុធនុយក្លេអ៊ែរ (RECNA) ឱ្យដឹងថា ប្រទេសដែលមានអាវុធនុយក្លេអ៊ែរចំនួនប្រាំបួននៅលើពិភពលោកមានក្បាលគ្រាប់បរមាណូសរុបចំនួន ១២,៥២០ គ្រាប់ គិតត្រឹមខែមិថុនា។ ទោះបីជា នោះជាការថយចុះនៃក្បាលគ្រាប់ចំនួន ២០០ គ្រាប់ ឬប្រហែល ២% ពីមួយឆ្នាំទៅមួយឆ្នាំក្តី រុស្ស៊ីមានក្បាលគ្រាប់ចំនួនច្រើនជាងប្រទេសផ្សេងទៀត ក្នុងចំនួន ៥,៨៩០ គ្រាប់ ហើយបាននិងកំពុងគំរាមកំហែងម្តងហើយម្តងទៀត ក្នុងការប្រើប្រាស់អាវុធនុយក្លេអ៊ែរយុទ្ធសាស្ត្រនៅអ៊ុយក្រែន។ ទន្ទឹមនឹងនេះ ប្រទេសចិនបានបង្កើនស្តុកនុយក្លេអ៊ែររបស់ខ្លួនប្រហែល២០%បន្ថែមទៀត ដល់៤១០គ្រាប់នៅឆ្នាំមុន៕
