ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជាកត់សម្គាល់ឃើញថា នៅក្នុងរយៈពេលពីរថ្ងៃចាប់ពីថ្ងៃទី ១៣-១៤ខែមីនា ការជួញដូរភាគហ៊ុនកម្ពុជាហាក់បង្ហាញនិន្នាការធ្លាក់ចុះ បន្ទាប់ពីមានព័ត៌មានចុះផ្សាយពីការដួលរលំរបស់ធនាគារធំៗពីរ គឺ Silicon Valley Bank និង Signature Bank នៅសហរដ្ឋអាមេរិក។ ទោះយ៉ាងណា ឯកឧត្តម មិនហ៊ានវាយតម្លៃទេថា ការធ្លាក់ចុះនេះអាចបណ្តាលមកពីការព្រួយបារម្ភរបស់អ្នកវិនិយោគចំពោះការក្ស័យធនរបស់ធនាគារទាំងពីរ ឬក៏ជាការធ្លាក់ចុះធម្មតារបស់ទីផ្សារនោះទេ។ ប៉ុន្ដែ ឯកឧត្តម ហុង សុហួរ កត់សម្គាល់ឃើញថា បើទោះតម្លៃភាគហ៊ុនមានការធ្លាក់ចុះ តែមិនទាន់មានសញ្ញាណាមួយបង្ហាញថា ស្ថានភាពហិរញ្ញវត្ថុរបស់ក្រុមហ៊ុនជួញដូរមានការធ្លាក់ចុះនោះទេ។
សម្រាប់ឯកឧត្តម ហុង សុហួរ ប្រសិនបើការធ្លាក់ចុះការជួញដូរភាគហ៊ុននៅកម្ពុជាបណ្តាលមកពីការព្រួយបារម្ភរបស់អ្នកវិនិយោគចំពោះស្ថានការណ៍ដួលរលំធនាគារធំៗពីរនៅសហរដ្ឋអាមេរិកមែននោះ វាជាសញ្ញាល្អមួយទៅវិញទេសម្រាប់ទីផ្សារជួយដូរភាគហ៊ុននៅកម្ពុជា ដ្បិតវាបានបង្ហាញពីភាពចាស់ទុំ និងភាពអាជីពរបស់អ្នកវិនិយោគ ដែលចេះសិក្សាពីផ្សារហិរញ្ញវត្ថុអន្តរជាតិ។ ព្រោះកន្លងមកបើទោះបីមានបញ្ហាអ្វីកើតឡើងក៏ដោយការជួញដូរភាគហ៊ុននៅកម្ពុជាមិនមានការប្រែប្រួលគូរឲ្យកត់សម្គាល់នោះទេ។
អត្ថបទគួរអាន
ពាក់ព័ន្ធការដួលរលំរបស់ធនាគារធំៗមួយចំនួននៅសហរដ្ឋអាមេរិក លោក កាំង តុងងី អ្នកនាំពាក្យសមាគមមីក្រូហិរញ្ញវត្ថុកម្ពុជាបានគូសបញ្ជាក់ថា លោកមិនទាន់អាចវាយតម្លៃចំពោះផលប៉ះពាល់មកលើវិស័យហិរញ្ញវត្ថុកម្ពុជាដែលបណ្តាលមកពីការដួលរលំរបស់ធនាគារធំៗមួយចំនួននៅសហរដ្ឋអាមេរិកបាននោះទេ ដោយសារវាបានកើតឡើងក្នុងរយៈពេលខ្លីពេក។ អ្នកជំនាញរូបនេះបានបន្តថា បើទោះបីបច្ចុប្បន្នភាពចលាចលនៃវិស័យហិរញ្ញវត្ថុនៅសហរដ្ឋអាមេរិកមិនទាន់បានបង្ហាញសញ្ញានៃផលប៉ះពាល់មកលើវិស័យធនាគារ និងហិរញ្ញវត្ថុកម្ពុជាក៏ពិតមែន ប៉ុន្ដែវាក៏ក្តីព្រួយបារម្ភមួយផងដែរ ដែលទាមទារឲ្យកម្ពុជាត្រូវយកចិត្តទុកដាក់តាមដានលើបញ្ហានេះ។ យ៉ាងណាក៏ដោយ លោក កាំង តុងងី អះអាងថា គ្រឹះស្ថានមីក្រូហិរញ្ញវត្ថុតែងតែមានការប្រុងប្រយ័ត្ន និងត្រៀមសេណារីយ៉ូជានិច្ច ដើម្បីត្រៀមឆ្លើយតបនឹងបញ្ហា ដែលអាចធ្វើឲ្យប៉ះពាល់ដល់ស្ថានភាពហិរញ្ញវត្ថុកម្ពុជា។
ជុំវិញបញ្ហានេះ លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា បានអះអាងថា ការដួលរលំរបស់ធនាគារ Silicon Valley Bank និង Signature Bank នៅសហរដ្ឋអាមេរិកមិនបានធ្វើឲ្យប៉ះពាល់ដល់ប្រព័ន្ធធនាគារនិងស្ថានភាពហិរញ្ញវត្ថុរបស់កម្ពុជានោះទេ ដ្បិតបរិយាកាសអាជីវកម្មស្ថិតនៅដាច់ឆ្ងាយពីគ្នា។ ម្យ៉ាងទៀតធនាគារនៅកម្ពុជាស្ថិតនៅក្នុងបរិយាកាសសេដ្ឋកិច្ច និងក្រោមច្បាប់ និងបទប្បញ្ញត្តិកម្ពុជា ដែលមានធនាគារជាតិនៃកម្ពុជាដែលពោរពេញដោយសមត្ថភាពជាអាណាព្យាបាល។ ដូច្នេះការដួលរលំរបស់ធនាគារទាំងពីរគ្មានអ្វីគួរឲ្យព្រួយបារម្ភសម្រាប់ស្ថានភាពហិរញ្ញវត្ថុកម្ពុជានោះទេ៕
