តើវិស័យអចលនទ្រព្យកម្ពុជា មានការប្រែប្រួលយ៉ាងណានៅក្នុងរយៈពេល៣ខែកន្លងមកនេះ?

ឧកញ៉ា សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានគូសបញ្ជាក់ថា ទីផ្សារទិញលក់ក្នុងវិស័យអចលនទ្រព្យនៅក្នុងរយៈពេល៣ខែ ឆ្នាំ២០២៥ នេះ ហាក់មានកំណើនវិជ្ជមានច្រើន បើធៀបនឹងរយៈពេលដូចគ្នាកាលពីឆ្នាំមុន ប៉ុន្តែសម្រាប់តម្លៃអចលនទ្រព្យវិញហាក់ពុំមានការប្រែប្រួលគួរឱ្យកត់សម្គាល់នោះទេ ពោលគឺស្ថិតក្នុងតម្លៃទាបនៅឡើយ។

បើតាមការបញ្ជាក់របស់ប្រធានសមាគមរូបនេះ ទីផ្សារទិញលក់អចលនទ្រព្យដែលមានសញ្ញាល្អប្រសើរនៅដើមឆ្នាំ២០២៥នេះ មានដូចជាទីផ្សារខុនដូរ និងទីផ្សារលំនៅឋាន ដែលមានតម្លៃក្នុងរង្វង់១០ ទៅ២០ម៉ឺនដុល្លារ។ ឧកញ៉ា សន សៀប បានចាត់ទុកទីផ្សារអចលនទ្រព្យដែលបម្រើដល់វិស័យឧស្សាហកម្ម គឺជាទីផ្សារដែលមានភាពរឹងមាំល្អជាងគេនាពេលបច្ចុប្បន្ននេះ ដោយសារមានតម្រូវការច្រើនលើការបើករោងចក្រសហគ្រាស តំបន់ឧស្សាហកម្ម និងតំបន់សេដ្ឋកិច្ចពិសេសជាដើម ពិសេសទីតាំងនៅក្នុងខេត្តដែលមានកំពង់ផែតែម្តង។ ទន្ទឹមនេះ សម្រាប់អចលនទ្រព្យដែលបម្រើដល់វិស័យកសិកម្ម ក៏មានសញ្ញាវិជ្ជមានផងដែរ នៅដើមឆ្នាំនេះ។ យ៉ាងណាមិញសម្រាប់អចលនទ្រព្យដែលនៅបន្តរងផលលំបាករួមមានប្រភេទបុរីលំនៅឋាន អគារការិយាល័យ និងអគារពាណិជ្ជកម្មជាដើម។

​​ជាមួយគ្នានេះ ឧកញ៉ា ចេង ខេង អគ្គនាយកក្រុមហ៊ុន CPL បានគូសបញ្ជាក់ថា ចរន្តទិញលក់អចលនទ្រព្យនៅដើមឆ្នាំ២០២៥នេះ ពិតជាបានបញ្ហាញសញ្ញាល្អប្រសើរច្រើនបើធៀបនឹងឆ្នាំមុន ពិសេសសម្រាប់អ្នកដែលយល់ច្បាស់អំពីតម្លៃលក់ក្នុងទីផ្សារអចលនទ្រព្យបច្ចុប្បន្នតែម្តង​។ ជាក់ស្តែង សម្រាប់ក្រុមហ៊ុន CPL គឺមានអតិថិជនច្រើនបានមកទទួលសេវាកម្មទិញលក់អចលន្រព្យ ជាមួយនឹងគម្រោងធំៗ នៅក្នុងវិស័យឧស្សាហកម្ម ពីសំណាក់វិនិយោគិនបរទេស ដូចជាចិន និងអឺរ៉ុប។

​តាមរយៈស្ថានភាពល្អប្រសើររបស់វិស័យអចលនទ្រព្យកម្ពុជា នៅដើមឆ្នាំនេះ ក្រុមអ្នកជំនាញមានក្តីរំពឹងខ្ពស់ និងជឿជាក់ថា វិស័យអចលនទ្រព្យកម្ពុជា នៅក្នុងឆ្នាំ២០២៥នេះ នឹងកាន់តែមានភាពល្អប្រសើរថែមទៀត ដ្បិតថា អ្នកដែលមកវិនិយោគក្នុងវិស័យអចលនទ្រព្យកម្ពុជា នៅឆ្នាំនេះ សុទ្ធសឹងតែជាអ្នកដែលមានតម្រូវការពិតប្រាកដ៕