បើតាមធនាគារពិភពលោក កត្តាដែលបណ្ដាលឲ្យឱនភាពពាណិជ្ជកម្មកម្ពុជាកើនខ្លាំង គឺដោយសារតែ កំណើននៃការនាំចូលរបស់របរសំខាន់ៗមួយចំនួន ជាពិសេសគឺមាសតែម្ដង ដែលគេប្រើជាទ្រព្យសម្បត្តិសន្សំ។ តួយ៉ាង ការនាំចូលមាសនៅ៩ខែដំបូងឆ្នាំ២០២១ មានការកើនឡើងយ៉ាងគំហុកដល់ទៅ ជាង៤ពាន់លានដុល្លារអាមេរិកឯណោះ ដែលវាបានឆ្លុះបង្ហាញឲ្យឃើញពីការការពារប្រឆាំងនឹងការប្រែប្រួលតម្លៃ និងអតិថរណា ដែលកំពុងកើនឡើង។
របាយការណ៍ថ្មីចុងក្រោយមួយរបស់ធនាគារពិភពលោក បានឲ្យដឹងថា នៅ៩ខែដំបូងឆ្នាំ២០២១ការនាំចេញទំនិញរបស់កម្ពុជាសម្រេចបានត្រឹមតែប្រមាណ ១២ពាន់៧រយលានដុល្លារអាមេរិក មានការធ្លាក់ចុះប្រមាណ ៣,៥% បើធៀបនឹងរយៈពេលដូចគ្នាកាលពីឆ្នាំមុន ស្របពេលដែលការនាំចូលវិញសម្រេចបានដល់ទៅ ជាង ២០ពាន់លានដុល្លារ កើនដល់ទៅជាង ៥៣%ឯណោះ។ កំណើនការនាំចូលគំហុក ប៉ុន្ដែការនាំចេញធ្លាក់ចុះនេះ បានធ្វើឲ្យកម្ពុជាមានឱនភាពពាណិជ្ជកម្មដល់ទៅ ៧ពាន់លានដុល្លារឯណោះ។ ហេតុអ្វីក៏ការនាំចូលកើនខ្លាំងយ៉ាងដូច្នេះ? នោះក៏ដោយសារតែ កម្ពុជាបានបង្កើនការនាំចូលនូវផលិតផលសំខាន់ៗមួយចំនួន ពិសេសគឺការនាំចូលមាសតែម្ដង ដោយគ្រាន់តែការនាំចូលមាសមួយមុខប៉ុណ្ណោះ មានតម្លៃដល់ទៅជាង ៤ពាន់លានដុល្លារអាមេរិក គិតត្រឹម៩ខែដំបូងឆ្នាំ២០២១នេះ ពោលគឺកើនឡើងដល់ទៅជាង១០ដង បើធៀបនឹងរយៈពេលដូចគ្នាកាលពីឆ្នាំមុន។ ការនាំចូលមាសកើនឡើងយ៉ាងខ្លាំងនេះ បានឆ្លុះបញ្ចាំងពីការការពារប្រឆាំងនឹងការប្រែប្រួលតម្លៃ និងអតិផរណានៅកម្ពុជាដែលកំពុងកើនឡើងផងដែរ។
ហេតុអ្វីក៏កម្ពុជាចាំបាច់ត្រូវការនាំចូលមាសច្រើនយ៉ាងដូច្នេះ? បើតាមលោក លី សូដេត សេដ្ឋវិទូប្រចាំធនាគារពិភពលោកបានអះអាងថា ហេតុផល គឺដោយសារតែតម្លៃមាសនៅតែមានភាពល្អប្រសើរ ដូច្នេះ អ្នកវិនិយោគលើមាស ឈ្មួញជួញដូរមាស នៅតែមើលឃើញពីឱកាសនាំចូលមាស។ មិនតែប៉ុណ្ណោះ មាសគឺជាវត្ថុមានតម្លៃមួយប្រភេទ ដែលអាចការពារហានិភ័យ ប្រឆាំងនឹងអតិផរណា ដែលកំពុងមានការកើនឡើង។ ម្យ៉ាងវិញទៀត តម្លៃមាស ត្រូវបានគេមើលឃើញ គឺនៅតែមានភាពល្អប្រសើរ គិតតាំងពីឆមាសទី២ឆ្នាំ២០២០មកម្ល៉េះ។
អត្ថបទគួរអាន
ក្រៅពីមាស កម្ពុជាក៏មានការនាំចូលក្រណាត់សម្រាប់ផលិតកម្មរោងចក្រកាត់ដេរ និងការនាំចេញកើនឡើងផងដែរ ដោយនៅ៩ខែដំបូងឆ្នាំនេះ ការនាំចូលក្រណាត់មានតម្លៃដល់ទៅជាង ៣ពាន់៥រយលានដុល្លារ កើនឡើងជាង២៥%។
ជាមួយគ្នានេះដែរ បើមើលទៅលើទុនបម្រុងអន្តរជាតិសរុប របស់កម្ពុជា ក៏មានការធ្លាក់ចុះតិចតួចដែរមកនៅត្រឹមជាង១៩ពាន់លានដុល្លារគិតត្រឹមខែកញ្ញាឆ្នាំ២០២១ ដែលអាចរាប់រងការនាំចូលបានរយៈពេល១០ខែ ធ្លាក់ចុះពីប្រមាណ ជាង២១ពាន់លានដុល្លារកាលពីចុងឆ្នាំ២០២០។ ដោយឡែក ចំពោះអតិផរណាវិញ ក៏មានការកើនឡើងដល់ ៣,៤%ផងដែរ គិតក្នុងខែសីហាឆ្នាំ២០២១ ដោយសារតែការងើបឡើងខ្លាំងនៃតម្លៃប្រេង ហើយបើធៀបនឹងឆ្នាំ២០១៩ អតិផរណាមានក្នុងអត្រា ៣,១%ប៉ុណ្ណោះ។ រីឯ អត្រាប្ដូរប្រាក់វិញនៅមានស្ថិរភាពជារួមប្រមាណ ៤.១០០រៀលក្នុងមួយដុល្លារអាមេរិក។
យ៉ាងណាក៏ដោយចុះ នៅឆ្នាំ២០២១នេះ ធនាគារពិភពលោកនៅតែរក្សាការព្យាករកំណើនសេដ្ឋកិច្ចកម្ពុជាក្នុងអត្រាកំណើន ២,២% ដដែល ខណៈដែលឆ្នាំ២០២២ព្យាករថា នឹងកើនឡើង៤,៥%៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
