ឧកញ៉ា ស៊ិន ចន្ធី អគ្គនាយកក្រុមហ៊ុន ឡាញហល អ៊ិចប្រេស បានគូសបញ្ជាក់ថា ទោះបីវិស័យដឹកជញ្ជូនរបស់កម្ពុជា នៅតែរក្សាបានកំណើនវិជ្ជមានជាបន្តបន្ទាប់មកទល់ពេលនេះ ប៉ុន្តែវិស័យនេះ បានប្រឈមមុខនូវបញ្ហាមួយចំនួនដែលបានកើតមានឡើងនាពេលថ្មីៗនេះ ដូចជាបញ្ហាបិទច្រកព្រំដែនរវាងកម្ពុជា-ថៃ និងបញ្ហាសម្ពាធពន្ធបដិការរបស់អាម៉េរិក ជាដើម។ ជាការកត់សម្គាល់របស់អ្នកជំនាញរូបនេះ បច្ចុប្បន្នវិនិយោគិនកំពុងសម្រុកនាំចេញទំនិញទៅកាន់ទីផ្សារអាម៉េរិក ឱ្យបានមុនថ្ងៃទី១ ខែសីហា ដែលអត្រាពន្ធបដិការរបស់អាម៉េរិក ដាក់មកលើកម្ពុជា ចំនួន៣៦% នឹងចូលជាធរមាន ហើយចង់ ឬមិនចង់វានឹងធ្វើឱ្យប៉ះពាល់ដល់ការនាំចេញទំនិញរបស់កម្ពុជា ទៅកាន់ទីផ្សារអាម៉េរិក។ សម្រាប់អ្នកជំនាញរូបនេះ អត្រាពន្ធបដិការចំនួន៣៦%នេះ ជាកម្រិតមួយដែលអាចជះផលលំបាកមួយចំនួនសម្រាប់សេដ្ឋកិច្ចកម្ពុជា ប៉ុន្តែអ្នកជំនាញរូបនេះជឿជាក់ថា រាជរដ្ឋាភិបាលកម្ពុជានឹងអាចចរចាបញ្ចុះអត្រាពន្ធបដិការជាមួយសហរដ្ឋអាម៉េរិកបន្ថែមទៀត ដ្បិតថាទាំងវិស័យឯកជន និងរាជរដ្ឋាភិបាលបានសហការគ្នាយ៉ាងយកចិត្តទុកដាក់ ដើម្បីដោះស្រាយលើបញ្ហានេះ។
ស្រដៀងគ្នានេះដែរ លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា បានគូសបញ្ជាក់ថា នៅក្នុងរយៈពេល៦ខែកន្លងមកនេះ វិស័យដឹកជញ្ជូនកម្ពុជា ពុំមានការប្រែប្រួលគួរឱ្យកត់សម្គាល់នោះទេ។ ប៉ុន្តែអ្នកជំនាញរូបនេះជឿជាក់ថា វិស័យដឹកជញ្ជូនរបស់កម្ពុជានឹងរងផលប៉ះពាល់មួយចំនួន ក្រោយអាម៉េរិក ដែលជាទីផ្សារនាំចេញដ៏ធំរបស់កម្ពុជា អនុវត្តការយកពន្ធបដិការ ហើយរាជរដ្ឋាភិបាលកម្ពុជា មិនអាចចរចាបញ្ចុះពន្ធឱ្យទាបជាងអត្រា៣៦% ទេនោះ។ យ៉ាងណាក៏ដោយ លោករំពឹងថា រាជរដ្ឋាភិបាលកម្ពុជានឹងមានលទ្ធភាពខ្ពស់ក្នុងការចរចាបញ្ចុះពន្ធជាមួយអាម៉េរិក បន្ថែមទៀត។
សូមជម្រាបថា នៅក្នុងរយៈពេល៦ខែ ឆ្នាំ២០២៥នេះ ការដោះដូរពាណិជ្ជកម្មរវាងកម្ពុជា ជាមួយទីផ្សារអន្តរជាតិ សម្រេចបានទឹកប្រាក់ជាង៣០ពាន់លានដុល្លារ កើនឡើងជាង១៧% បើធៀបនឹងរយៈពេលដូចគ្នាកាលពីឆ្នាំមុន ក្នុងនោះការនាំចេញរបស់កម្ពុជា មានទំហំជាង១៤ពាន់លានដុល្លារកើនឡើងជាង១៦% ខណៈកម្ពុជា នាំចូលមកវិញមានទំហំជាង១៦ពាន់លានដុល្លារកើនឡើងជាង១៨%។
សហរដ្ឋអាម៉េរិក ជាទីផ្សារនាំចេញធំជាងគេរបស់កម្ពុជា នៅរយៈពេល៦ខែកន្លងមកនេះ ជាមួយទំហំទឹកប្រាក់ជាង៥ពាន់លានដុល្លារ កើនឡើងជាង២៥% បើធៀបនឹងរយៈពេលដូចគ្នាកាលពីឆ្នាំមុន។ នេះបើតាមរបាយការណ៍ពីអគ្គនាយកដ្ឋានគយ និងរដ្ឋាករ៕
