ក្រសួងការបរទេសរុស្ស៊ី បានបង្ហោះវីដេអូឃ្លីបសុន្ទរកថា បើកកិច្ចពិភាក្សារបស់លោក Lavrov រដ្ឋមន្ត្រីការបរទេសរុស្ស៊ី អំឡុងពេលលោកជួបជាមួយប្រធានាធិបតីអ៊ីរ៉ង់ លោក អ៊ីប្រាហីម រ៉ៃស៊ី(Ebrahim Raisi) ដែលក្នុងនោះលោកបាននិយាយថា ទីក្រុងមូស្គូកំពុងសម្របខ្លួន និងឆ្លើយតបទៅនឹងអ្វីដែលលោកហៅថា ជាគោលនយោបាយឈ្លានពានរបស់លោកខាងលិច។
បន្ថែមពីលើកិច្ចពិភាក្សានុយក្លេអ៊ែរ កាលពីខែមុនរដ្ឋាភិបាលទីក្រុងមូស្គូបានអះអាងថា រុស្ស៊ី និងអ៊ីរ៉ង់ ក៏បានពិភាក្សាអំពីការផ្លាស់ប្តូរការផ្គត់ផ្គង់ប្រេង និងឧស្ម័នទៅវិញទៅមក និងក៏ដូចជាការបង្កើតមជ្ឈមណ្ឌលដឹកជញ្ជូនរួមគ្នាមួយផងដែរ។
គួរជម្រាបដែរថា ប្រទេសទាំងពីរគឺកំពុងស្ថិតនៅក្រោមការដាក់ទណ្ឌកម្មរបស់លោកខាងលិច និងសហរដ្ឋអាមេរិករៀងៗខ្លួន។ យ៉ាងណាមិញប្រទេសទាំងសុទ្ធតែមានទឹកមាត់ប្រៃលើការចរចាជាអន្តរជាតិ ដោយសារតែភាពសម្បួរហូរហៀបៃប្រេងបំរុង និងឧស្ម័នដ៏ធំបំផុតរបស់ពិភពលោក។
ខណៈពេលដែលទីក្រុងមូស្គូកំពុងប្រឈមនឹងទណ្ឌកម្មរបស់លោកខាងលិច ទីក្រុងតេអេរ៉ង់ក៏បាននិងកំពុងតស៊ូ ដើម្បីរក្សាស្ថិរភាពសេដ្ឋកិច្ចរបស់អ៊ីរ៉ង់ឱ្យនៅដដែល ដោយសារតែរងទណ្ឌកម្មរបស់សហរដ្ឋអាមេរិកដូចគ្នា។ ទណ្ឌកម្មនោះបានដាក់ទៅលើអ៊ឺរ៉ង់ឡើងវិញ បន្ទាប់ពីទីក្រុងវ៉ាស៊ីនតោនក្រោមអាណត្តិលោកដូណាល់ត្រាំ បានចាកចេញពីកិច្ចព្រមព្រៀងនុយក្លេអ៊ែរជាមួយអ៊ីរ៉ង់ក្នុងឆ្នាំ២០១៨ ក្រោមហេតុផលអ៊ឺរ៉ង់មិនគោរពតាមកិច្ចព្រមព្រៀង។
គួរបញ្ជាក់ថា អំឡុងពេលនៃដំណើរទស្សនកិច្ចរបស់លោក Lavrov នៅអ៊ឺរ៉ង់ ក្រៅតែពីបញ្ហាកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ ដែលត្រូវយកមកពិភាក្សាជារបៀបវារៈជាចំបងហើយនោះ ការជំរុញកិច្ចសហប្រតិបត្តិការទ្វេភាគី និងថាមពល ភាពតានតឹងជម្លោះជាអន្តរជាតិ និងក្នុងតំបន់ ក៏ត្រូវបានភាគីទាំងពីរលើយកមកពិភាក្សាផងដែរ។ នេះបើតាមប្រព័ន្ធផ្សព្វផ្សាយរដ្ឋរបស់អ៊ីរ៉ង់បានរាយការណ៍៕
