ក្រុមអ្នកជំនាញ ក្នុងវិស័យទេសចរណ៍វិញ បានចាត់ទុកថា ភ្ញៀវទេសចរជនជាតិចិន គឺជាទេសចរសក្ដានុពលរបស់កម្ពុជា ដែលកាលពីមិនទាន់មានកូវីដ-១៩ ភ្ញៀវទេសចរជនជាតិចិន គឺឈរលំដាប់កំពូលតារាងដែលបានមកធ្វើដំណើរកម្សាន្ដនៅកម្ពុជា ហើយបើតាមការសិក្សាពីក្រសួងទេសចរណ៍ នាពេលកន្លងមកក៏បានបង្ហញដែរថា ភ្ញៀវទេសចរចិន គឺមានការចំណាយច្រើនជាងគេ សម្រាប់ការធ្វើដំណើរកម្សាន្ដនៅកម្ពុជា។ ដូច្នេះ អ្នកជំនាញ ជឿជាក់ថា ភ្ញៀវទេសចរចិន គឺស័ក្ដិសមបំផុតដើម្បីចូលរួមជួយស្ដារវិស័យទេសចររបស់កម្ពុជាឲ្យងើបរលាស់ខ្លួនចេញវិបត្តិដែលបាននិងកំពុងអូសបន្លាយ ជិត២ឆ្នាំកន្លងមកនេះ។
តាមផែនការរបស់ក្រសួងទេសចរណ៍ បើពុំមានអ្វីប្រែប្រួលនោះទេ កម្ពុជា អាចនឹងចាប់ផ្ដើមបើកទទួលទេសចរបរទេសឡើងវិញ នាចុងវិច្ឆិកា ឆ្នាំ២០២១ ខាងមុខ។
ជុំវិញផែនការបើកទទួលទេសចរបរទេស នៅពេលខាងមុខនេះដែរ ត្រូវបានប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន លើកឡើងកាលពីថ្ងៃទី ១៧ ខែកញ្ញាថា កម្ពុជា ត្រៀមនឹងបើកទេសចរបរទេសឡើងវិញឆាប់ៗ ពោលគឺនៅពេលស្ថានភាពជំងឺកូវីដ-១៩ បានធូរស្បើយ វិស័យសេវាកម្ម គឺនឹងត្រូវចាប់ផ្ដើមបើកឡើងវិញជាបណ្ដើរៗ បន្ទាប់ពីវិស័យអប់រំ។ ក្នុងន័យនេះ សម្ដេចតេជា ហ៊ុន សែន ក៏បានសង្កត់ធ្ងន់ដែរ ថាការបើកឡើងវិញនូវវិស័យសេវាកម្ម គឺមានពីរជំហាន ដែលជំហានទី១ គឺការបើកទេសចរណ៍ក្នុងស្រុក និងជំហានទី២ ហៅថា វ៉ាក់សាំងទេសចរណ៍។ បើតាមការបញ្ជាក់របស់សម្ដេច ហ៊ុន សែន កម្ពុជា នឹងកំណត់ទេសចរចិន ជាអាទិភាពលើផែនការបើកទេសចរអន្តរជាតិឡើងវិញ នាពេលខាងមុខ។
ផ្អែកតាមប្រសាសន៍របស់សម្ដេចតេជោ ហ៊ុន សែន ការបើកទទួលទេសចរបទេសឡើងវិញ គឺតម្រូវឱ្យជនបរទេសទាំងនោះបានចាក់វ៉ាក់សាំងបង្កាកូវីដ-១៩ រួចរាល់ និងត្រូវធ្វើចត្តាឡីស័កតែ ៧ថ្ងៃ ប៉ុណ្ណោះ។ ការធ្វើចត្តាឡីស័ករបស់ជនបរទេសនេះទៀតសោត គឺមិនតម្រូវឲ្យពួកគេស្នាក់នៅបន្ទប់នោះទេ មានន័យថា បើភ្ញៀវទេសចរមកលេងខេត្តណា ត្រូវធ្វើចត្តាឡីស័កនៅខេត្តនោះ ដោយពួកគេអាចដើរកម្សាន្ត ក្នុងខេត្តនោះដោយសេរី គ្រាន់តែមិនត្រូវអនុញ្ញាតឲ្យឆ្លងខេត្តនោះឡើយ។
អត្ថបទទាក់ទង
ពាក់ព័ន្ធ នឹងការកំណត់យកទេសចរជនជាតិចិន ជាអាទិភាពលើផែនការបើកទេសចរអន្តរជាតិឡើងវិញ របស់រាជរដ្ឋាភិបាលកម្ពុជានេះ ត្រូវបានលោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក គាំទ្រយ៉ាងពេញទំហឹង។ អ្នកជំនាញរូបនេះបន្ថែមថា ស្ថិតក្នុងកាលៈទេសៈដ៏លំបាកនេះ គឺមានតែប្រទេសចិនទេ ដែលអាចគ្រប់គ្រងជំងឺកូវីដ-១៩ បានល្អ ដូច្នេះ ទេសចរចិន ស័ក្ដិសមបំផុតសម្រាប់កម្ពុជា ដែលកំណត់យកភ្ញៀវទេសចរចិន ជាទិសដៅអាទិភាព ក្រោយពេលកម្ពុជា បើកទេសចរអន្តរជាតិឡើងវិញ។
សូមបញ្ជាក់ថា រយៈពេលជិត ២ឆ្នាំហើយ ដែលវិស័យទេសចរណ៍ត្រូវជាប់គាំង និងអាក់ខាន ក្នុងការទទួលភ្ញៀវទេសចរអន្តរជាតិ។ ដោយឡែក យោងតាមរបាយការណ៍របស់ក្រសួងទេសចរណ៍ នៅឆមាសទី១ ក្នុងឆ្នាំ២០២១ កម្ពុជា ទទួលបានភ្ញៀវទេសចរអន្តរជាតិ ប្រមាណ១០ម៉ឺននាក់ ថយចុះ ៩១% បើធៀបនឹងរយៈពេលដូចគ្នា កាលពីឆ្នាំមុន។ ទោះយ៉ាងណា នៅរយៈពេលថ្មីៗនេះ វិស័យទេសចរណ៍ ពិសេសចរន្ដទេសចរណ៍ផ្ទៃក្នុងរបស់កម្ពុជាហាក់មានការកម្រើកឡើងវិញជាបណ្ដើរៗហើយ ដែលវាគឺជាការបង្ហាញពីភាពវិជ្ជមានសម្រាប់ការឈានទៅបើកទទួលភ្ញៀវទេសចរអន្តរជាតិឡើងវិញក្នុងពេលឆាប់ៗខាងមុខ៕
None
