តើឥណ្ឌាពិតជាមានលក្ខណសម្បត្តិគ្រប់គ្រាន់ ដើម្បីជំនួសតំណែងខ្សែចង្វាក់ផ្គត់ផ្គង់ ដូចលោកខាងលិចមើលឃើញ មែនឬយ៉ាងណា?
ស្របពេលដែលស្ថាប័នមូលនិធិរូបិយវត្ថុអន្តរជាតិ IMF បានព្យាករណ៍ទម្លាក់សេដ្ឋកិច្ចចិនមកត្រឹម ៤,៤%នៅឆ្នាំក្រោយ ស្ថាប័នដដែលនេះព្យាករណ៍សេដ្ឋកិច្ចឥណ្ឌាថា នឹងមានកំណើនដល់ទៅ ៦,១%។ IMF ក៏បានទាយទុកមកផងដែរថា ឥណ្ឌានឹងឡើងមកអង្គុយកៅអីសេដ្ឋកិច្ចធំបំផុតរបស់ពិភពលោកលំដាប់ទី៣ នៅត្រឹមឆ្នាំ២០២៧។
ក្រៅពីកត្តាសេដ្ឋកិច្ច កត្តាអំណោយផលមួយទៀតគឺកត្តា ភូមិសាស្ត្រនយោបាយ។ ឥណ្ឌាជាសមាជិករបស់សម្ព័ន្ធចតុភាគី Quad ដែលមានជប៉ុន អាមេរិក និងអូស្ត្រាលីជាសមាជិកដែរ ជាហេតុធ្វើឱ្យរដ្ឋាភិបាលក្រុងញូដេលី ងាយស្រួលធ្វើការជាមួយប្រទេសលោកខាងលិច។
នៅប៉ុន្មានឆ្នាំចុងក្រោយ ឥណ្ឌាមើលឃើញពីកំណើនគួរកត់សម្គាល់មួយ ក្នុងវិស័យវិនិយោគផ្ទាល់ពីបរទេស។ ជាក់ស្តែង ការវិនិយោគផ្ទាល់ពីបរទេសអំឡុងឆ្នាំ២០២០ និង២០២១ មានតម្លៃជាង ៨០ពាន់លានដុល្លារអាមរិក។ ខណៈនៅជិត១១ខែឆ្នាំ២០២២នេះ ការវិនិយោគមានតម្លៃជិត ៤០ពាន់លានដុល្លារ ច្រើនជាងពីរដងអត្រាខ្ពស់បំផុតដែលបានកត់ត្រាកាលពីឆ្នាំ២០១៧។
ស្របពេលដែល លោកខាងលិចមួយចំនួនផ្តើមលែងទុកចិត្តប្រទេសចិន កំណែទម្រង់របស់រដ្ឋាភិបាលក្រុងញូដេលី ក៏បានធ្វើបានធ្វើឱ្យប្រទេសនេះ កាន់តែទាក់ទាញសម្រាប់ដៃគូ។ ជាក់ស្តែង នាយករដ្ឋមន្ត្រីណារីនដ្រា ម៉ូឌី បានដាក់ចេញនូវកំណែទម្រង់ទីផ្សារ និងការបង់ពន្ធ ពង្រឹងបច្ចេកវិទ្យាឌីជីថល និងកែលម្អហេដ្ឋារចនាសម្ព័ន្ធក្នុងប្រទេសជាច្រើន។
អត្ថបទគួរអាន
ស្ថាប័ន Morgan Stanley ដែលជាក្រុមហ៊ុនគ្រប់គ្រងការវិនិយោគ និងសេវាកម្មហិរញ្ញវត្ថុរបស់អាមេរិក បានប៉ាន់ស្មានថា ការផលិតដែលតំណាងឱ្យមួយផ្នែកធំនៃ GDP ឥណ្ឌា អាចកើនឡើងពី រង្វង់ជាង១៥%ក្នុងពេលបច្ចុប្បន្ន ដល់២១%នៅឆ្នាំ២០៣១។ ចំនួននេះជាកំណើនទ្វេដង ធ្វើឱ្យឥណ្ឌាជាប្រទេសមានចំណែកទីផ្សារធំលំដាប់ទី៥ នៃការនាំចេញសរុបរបស់ពិភពលោក។
ក្រុមហ៊ុនលំដាប់អន្តរជាតិជាច្រើនបានកត់សម្គាល់ពីតួលេខនាំចេញដ៏លេចធ្លោមួយនេះ។ ជាក់ស្តែង ក្រុនហ៊ុនអ្នកផ្គត់ផ្គង់របស់ Apple គឺ Foxconn បានបង្កើនការផលិតរបស់ខ្លួនក្នុងរោងចក្រដែលមានស្រាប់ នៅទីក្រុងឆេនណៃ (Chennai) ប្រទេសឥណ្ឌា ក្រោយពីកូវីដ១៩នៅចិនបង្អាក់សកម្មភាពផលិតក្នុងរោងចក្រខ្លួននៅប្រទេសចិន។
ក្រៅពី Foxconn សូម្បីតែក្រុមហ៊ុនតៃវ៉ាន់ដែលជាអ្នកផ្គត់ផ្គង់មួយទៀតរបស់ Apple គឺ Pegatron ក៏បានចាប់ផ្តើមដំណើរការដំឡើងទូរសព្ទ iPhone 14 ដែលជាម៉ូឌែលចុងក្រោយ នៅក្នុងប្រទេសឥណ្ឌាផងដែរ។ ក្រៅតែពី Apple ក្រុមហ៊ុនបច្ចេកវិទ្យាយក្ស Google និង Samsung ក៏គ្រោងនឹងរើផលិតកម្មមួយចំនួនទៅកាន់ប្រទេសឥណ្ឌាផងដែរ ដោយមួយផ្នែកត្រូវបានទាក់ទាញដោយអត្ថប្រយោជន៍ពីគម្រោងផ្តល់ទុនលើកទឹកចិត្តរបស់រដ្ឋាភិបាលឥណ្ឌា ដែលនឹងឧបត្ថម្ភធនលើការលក់ទំនិញក្នុងវិស័យជាច្រើន ដែលកំពុងមានការប្រកួតប្រជែងខ្ពស់។
ទោះយ៉ាងណាសូមកុំភ្លេចថា នៅមានប្រមាណ៧០%ទៀតនៃគ្រឿងបង្គុំរបស់ Apple សុទ្ធតែត្រូវផ្គត់ផ្គង់ចេញពីប្រទេសចិន។ ដូច្នេះហើយ ការឈប់ពឹងផ្អែកទាំងស្រុងទៅលើប្រទេសចិន មិនថាតែក្រុមហ៊ុនរបស់អាមេរិកនោះទេ គឺទំនងជាមិនអាចធ្វើឡើងក្នុងពេលឆាប់ៗឡើយ។ បន្ថែមពីលើនេះទៀត បច្ចុប្បន្នចិនតំណាងឱ្យប្រមាណ ៨០%នៃផលិតកម្មបន្ទះសូឡារបស់ពិភពលោក ហើយចិនក៏ជាអ្នកផលិតបន្ទះឈីប និងគ្រឿងបង្គុំផ្សេងទៀតធំបំផុតលំដាប់ទី៤ផងដែរ ដែលបានតំណាងឱ្យជាង ១៥%នៃផលិតកម្មសរុបរបស់សកលលោកក្នុងទិន្នន័យឆ្នាំ២០២០៕
