ឯកឧត្តម ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកកម្ម និងសំណង់បានលើកឡើងថា គិតតាំងពីឆ្នាំ២០០០មកដល់បច្ចុប្បន្នមានប្រទេសចំនួន២២ហើយ បានបោះទុនវិនិយោគវិស័យសំណង់នៅកម្ពុជា គិតជាទឹកប្រាក់ សរុបប្រមាណ ៩ពាន់លានដុល្លារ ស្មើនឹង ៦១៤ គម្រោងក្នុងនោះចិន និងកូរ៉េខាងត្បូងនៅតែជាប្រទេសនាំមុខគេ។
ឯកឧត្តមបញ្ជាក់ថា ក្នុងរយៈពេល២០ឆ្នាំមកនេះ ចិនបានបោះទុនវិនិយោគក្នុងវិស័យសំណង់ នៅកម្ពុជា ៣២៦ គម្រោង ជាមួយនឹងទុនវិនិយោគជាង ៥ពាន់លានដុល្លារ ខណៈប្រទេសកូរ៉េខាងត្បូងមាន គម្រោងវិនិយោគ៦០គម្រោង មានទុនវិនិយោគ ១.៨០០លានដុល្លារ, ប្រទេសជប៉ុន មាន ៥៤ គម្រោង មានទុន ២៦៦លានដុល្លារ, ថៃមាន៣៦ គម្រោងដែលមានទុនវិនិយោគ ២៥៥លានដុល្លារ និង សិង្ហបុរីមាន ១៨គម្រោង ដែលមានទុនវិនិយោគ ១៨០លានដុល្លារ។
អត្ថបទទាក់ទង!
ឯកឧត្តម ឡៅ ទព្វសីហាបញ្ជាក់ទៀតថា ការវិនិយោគវិស័យសំណង់នៅកម្ពុជានៅតែដំណើរការល្អជាធម្មតាទាំងវិនិយោគក្នុងស្រុក និងបរទេស ដែលជាក់ស្តែងក្នុងរយៈពេល៨ខែដើមឆ្នាំ២០២០នេះដំណើរការនៃការស្នើសុំលិខិតអនុញ្ញាតសាងសង់ គឺនៅតែឃើញមានជាបន្តបន្ទាប់ទៅលើគម្រោងវិនិយោគអគារលំនៅដ្ឋាន អគារស្នាក់នៅរូម អគារពាណិជ្ជកម្ម និងគម្រោងឧស្សាហកម្មរោងចក្រ នៅក្នុងរាជធានីភ្នំពេញ និងតាមបណ្តាខេត្តសក្តានុពល រួមមានខេត្តកណ្តាល ខេត្តព្រះសីហនុ សៀមរាប បាត់ដំបង និងកំពតជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
