លោក វ៉ា រុតសាន ទីប្រឹក្សាក្រសួងពាណិជ្ជកម្ម និងជាមន្ត្រីជំនាញរៀបចំគោលនយោបាយស្វាយចន្ទីជាតិកម្ពុជា និងក៏ជាម្ចាស់ចំការស្វាយចន្ទី ជាង ១០០ហិកតាស្ថិតនៅខេត្តកំពង់ចាម បានគូសបញ្ជាក់ ថា តួលេខនាំចេញ ដែលបានបង្ហាញដោយក្រសួងកសិកម្មនេះ ហាក់ដូចជាខុសគ្នានឹងតួលេខ ដែលបានកត់ត្រាដោយសមាគមស្វាយចន្ទីខេត្តកំពង់ធំ ពោលគឺបើតាមតួលេខពីសមាគម គឺច្រើនជាងនេះរហូត៤ ម៉ឺនតោនឯណោះ។
លោក វ៉ា រុតសាន អះអាងទៀតថា ត្បិតតែផលិតកម្មស្វាយចន្ទីឆ្នាំនេះមិនសូវទទួលបានទិន្នផលល្អ រួមទាំងទីផ្សារតម្លៃមានការធ្លាក់ចុះក៏ពិតមែន ប៉ុន្តែបរិមាណនៃការនាំចេញនៅក្នុងឆ្នាំនេះគឺនៅតែបង្ហាញពីកើនឡើង ខណៈផ្ទៃដីបង្កបង្កើនផលបន្តពង្រីកជារៀងរាល់ឆ្នាំ។
អត្ថបទទាក់ទង!
លោកបន្ថែមថា ក្នុងឆ្នាំនេះប្រជាកសិករអ្នកដាំស្វាយចន្ទីពុំទទួលបានផលចំណេញច្រើន ដោយសារតែ នៅរដូវប្រមូលផលបាន គឺចំពេលដែលមានការផ្ទុះឡើងនៃជំងឺកូវីដ-១៩ ដែលជាហេតុធ្វើ តម្លៃគ្រាប់ស្វាយចន្ទីមានការធ្លាក់ចុះថ្លៃជាបន្តបន្ទាប់ និងក្នុងអំឡុងពេលនោះ ប្រជាកសិករក៏បង្ខំចិត្តលក់ចេញក្នុងតម្លៃថោកជុំវិញ ១.១០០ដុល្លារក្នុង១តោន។
អ្នកជំនាញផ្នែកកសិកម្មរូបនេះ បញ្ជាក់ទៀតថា ការថមថយទិន្នផលគ្រាប់ស្វាយចន្ទីនៅឆ្នាំនេះ ក៏ដោយសារតែបំរែបំរួលអាកាសធាតុពោលគឺមានសន្សើមប្រៃធ្លាក់ច្រើនដង ដែលធ្វើឲ្យផ្កាស្វាយចន្ធីខូចច្រើន និងកាន់តែធ្វើឲ្យផលិតកម្មចន្ទីប្រឈមខ្លាំងទៀតនោះ គឺការធ្លាក់ថ្លៃនៃតម្លៃគ្រាប់ស្វាយចន្ទី ។ ទោះយ៉ាងណា ឈ្មួញកណ្តាលធំៗ ដែលបានទិញគ្រាប់ស្វាយចន្ទីស្តុកទុករហូតមកដល់ពេលនេះ គឺទទួលបាលផលចំណេញច្រើនអាចលក់បានក្នុងតម្លៃជិត ២ពាន់ដុល្លារក្នុង១តោន ខណៈទីផ្សារស្វាយចន្ធីធំរបស់កម្ពុជាគឺ វៀតណាម។
សូមជម្រាបថា តាមរបាយការណ៍ពីក្រសួងកសិកម្ម កាលពីឆ្នាំ ២០១៩ កន្លងទៅ កម្ពុជាសម្រេចការនាំចេញគ្រាប់ស្វាយចន្ទីទៅទីផ្សារអន្តរជាតិសរុបប្រមាណជាង ២០ម៉ឺនតោន។
ជាការលើកកម្ពស់ទៅដល់ឧស្សាហកម្មផលិតគ្រាប់ស្វាយចន្ទីនេះ បច្ចុប្បន្នក្រសួងពាណិជ្ជកម្មបាននិងកំពុងបង្កើតក្រុមការងារអន្តរក្រសួងរៀបចំគោលនយោបាយស្វាយចន្ទីជាតិកម្ពុជា ដូចទៅនឹងគោលនយោបាយដំឡូងមីដែរ ដែលគោលនយោបាយនេះនឹងជួយឲ្យកាន់តែប្រសើរឡើងសម្រាប់ឧស្សាហកម្មមួយនេះ ខណៈបច្ចុប្បន្នទើបតែមានរោងចក្រកែច្នៃគ្រាប់ចន្ទីមិនដល់១០ផងនោះ។
អ្នកជំនាញ ជឿជាក់ថា នៅក្នុងរយៈពេល ៥ឆ្នាំខាងមុខ ផ្អែកតាមសេចក្តីព្រាងគោលនយោបាយស្វាយចន្ទីធ្វើយ៉ាងណាជំរុញឲ្យផលិតផលស្វាយចន្ទីខ្មែរដែលមានអាចបញ្ចូលនៅក្នុងផលិតកម្មកែច្នៃគ្រាប់ស្វាយចន្ទីក្នុងស្រុកឲ្យកើនដល់២០ភាគរយ៕
None
