លោក Albert Bourla នាយកប្រតិបត្តិក្រុមហ៊ុន Pfizer បាននិយាយថា ក្រុមហ៊ុនបានបើកឱកាសឲ្យប្រជាជាតិទាំងអស់ អាចស្នើសុំបញ្ជាទិញវ៉ាក់សាំងពីក្រុមហ៊ុនបាន ហើយក្រុមហ៊ុននឹងបែងចែកវ៉ាក់សាំងទាំងនោះទៅឲ្យប្រទេសដែលបានបញ្ជាទិញទាំងអស់នោះ។ ប៉ុន្ដែ ជាក់ស្ដែង ប្រទេសដែលមានចំណូលខ្ពស់ គឺមានការបញ្ជាទិញវ៉ាក់សាំងច្រើនជាងគេ។ លោក Albert បន្ថែមថា លោកមានការបារម្ភចំពោះរឿងនេះ ហើយលោកក៏បានព្យាយាមទាក់ទងទៅកាន់ប្រទេសចំណូលមធ្យម និងទាបជាច្រើន តាមរយៈការសរសេរលិខិត ទូរស័ព្ទ និងផ្ញើសារ ទៅកាន់ពួកគេ ដើម្បីទទូចឲ្យពួកគេបញ្ជាកក់ទុកវ៉ាក់សាំងសម្រាប់ប្រទេសរបស់ខ្លួន ព្រោះថាការផ្គត់ផ្គត់គឺមានកំណត់។
នាយកប្រតិបត្តិក្រុមហ៊ុនផលិតវ៉ាក់សាំងរូបនេះបានគូសបញ្ជាក់ទៀតថា មានប្រទេសចំណូលទាប និងមធ្យមជាច្រើន ដែលលោកបានទាក់ទងទៅ តែពួកគេបានបែរជាសម្រេចចិត្តដាក់ការបញ្ជាទិញជាមួយក្រុមហ៊ុនផលិតវ៉ាក់សាំងដទៃទៀតទៅវិញ។ លោកបន្ថែមថា មានប្រទេសខ្លះ មិនបានអនុម័តឲ្យមានការប្រើប្រាស់វ៉ាក់សាំង Pfizer ថែមទៀតផង។
អត្ថបទទាក់ទង!
តាមអ្វីដែលលោក Albert នាយកប្រតិបត្តិក្រុមហ៊ុន Pfizer បានបញ្ជាក់នៅក្នុងលិខិត សម្រាប់តម្លៃនៃវ៉ាក់សាំងដែលលក់ចេញ គឺមានគំរូកំណត់តម្លៃផ្សេងៗគ្នា។ តួយ៉ាងសម្រាប់តម្លៃលក់ជូនប្រទេសចំណូលមធ្យម ត្រូវបានស្នើឲ្យលក់ក្នុងតម្លៃពាក់កណ្ដាល នៃតម្លៃដែលលក់ទៅឲ្យប្រទេសចំណូលខ្ពស់ប៉ុណ្ណោះ ខណៈដែលការលក់ទៅឲ្យប្រទេសចំណូលទាបវិញ គឺលក់កាន់តែទាបជាងនេះទៅទៀត។
ក្រុមហ៊ុនអាមេរិក Pfizer និងក្រុមហ៊ុនអាល្លឺម៉ង់ BioNTch នឹងចេញលក់វ៉ាក់សាំង Pifzer ចំនួន ៣ពាន់លានដូសនៅឆ្នាំនេះ ទៅកាន់ប្រទេស ១១៦ប្រទេស ហើយក្នុងនោះ មានវ៉ាក់សាំង ៤៥០លានដូសហើយ មកទល់ពេលនេះត្រូវបានលក់ទៅឲ្យប្រទេសដែលមានប្រាក់ចំណូលខ្ពស់ ដែលជាអ្នកចំណាយច្រើនបំផុត ហើយសម្រាប់នៅអាមេរិកវ៉ាក់សាំង Pfizer ២ដូសតម្លៃ ៣៩ដុល្លារ។
នាយកប្រតិបត្តិក្រុមហ៊ុន Pfizer រំពឹងថា នៅក្នុងផែនការចេញលក់វ៉ាក់សាំង ៣ពាន់លានដូសនៅឆ្នាំនេះ នឹងមាន៤០% ឬស្មើនឹងជាង១ពាន់លានដូស នឹងត្រូវលក់ទៅឲ្យប្រទេសចំណូលមធ្យម និងប្រទេសចំណូលទាប ហើយក៏សង្ឃឹមថា តុល្យភាពនៃការផ្គត់ផ្គង់នឹងមានឡើង ចាប់ពីពាក់កណ្ដាលឆ្នាំចុងក្រោយនៃឆ្នាំ២០២១នេះ ហើយនឹងអាចឈានទៅផ្គត់ផ្គង់វ៉ាក់សាំងបានគ្រប់គ្រាន់សម្រាប់ប្រទេសទាំងអស់នៅត្រឹមឆ្នាំ២០២២។ នៅឆ្នាំក្រោយក្រុមហ៊ុនផលិតវ៉ាក់សាំងនេះ ក៏មានផែនការនឹងពង្រីកការផលិតឲ្យបានដល់ ៤ពាន់លានដូសផងដែរ។ បើតាមឯកសាររបស់ក្រុមហ៊ុនបង្ហាញថា ប្រទេសកូឡុំប៊ី បានទិញវ៉ាក់សាំង Pfizer តម្លៃ១២ដុល្លារអាមេរិក ក្នុងមួយដូស ខណៈដែលនៅអាហ្វ្រិកខាងត្បូងយល់ព្រមទិញក្នុងតម្លៃ១០ដុល្លារក្នុងមួយដូស។
សូមបញ្ជាក់ថា ក្រុមហ៊ុន Pfizer រកបានប្រាក់ចំណូលពីការលក់វ៉ាក់សាំងរបស់ខ្លួនប្រមាណ ៣ពាន់៥រយលានដុល្លារអាមេរិក នៅក្នុងរយៈពេល៣ខែដំបូងនៃឆ្នាំ២០២១ ហើយនៅពេញមួយឆ្នាំ២០២១នេះ ក្រុមហ៊ុន Pfizer រំពឹងថា នឹងទទួបានប្រាក់ចំណូលដល់ទៅជាង ៧០ពាន់លានដុល្លារអាមេរិក។
ថ្មីៗនេះដែរ សហភាពអឺរ៉ុប ក៏បានឯកភាពនឹងបន្ដកិច្ចសន្យា ក្នុងការទិញវ៉ាក់សាំង Pfizerចំនួន ១ពាន់៨រយលានដូសនៅត្រឹមឆ្នាំ២០២៣ផងដែរ ខណៈដែលអឺរ៉ុប កំពុងខ្វះខាតវ៉ាក់សាំងយ៉ាងច្រើន ដោយសារតែក្រុមហ៊ុន AstraZeneca របស់អង់គ្លេសមិនអាចផលិតបានគ្រប់តាមកិច្ចសន្យា៕
None
