ថ្លែងនាពិធីបើកសិក្ខាសាលាស្ដីពី«ការផ្សព្វផ្សាយរបាយការណ៍ស្ថិរភាពហិរញ្ញវត្ថុឆ្នាំ២០២១» នៅថ្ងៃទី១៧ ខែមិថុនា ឆ្នាំ២០២២ លោកជំទាវ ជា សិរី ឧបការីទេសាភិបាល និងជាអគ្គនាយកបច្ចេកទេសធនាគារជាតិនៃកម្ពុជា បានគូសបញ្ជាក់ដូច្នេះ សកម្មភាពសេដ្ឋកិច្ចកម្ពុជា និងពិភពលោកនៅក្នុងឆ្នាំ២០២១ បានបន្តងើបឡើង បើទោះជាប្រឈមនឹងការលេចឡើងនូវប្រភេទមេរោគបំប្លែងថ្មីនៃជំងឺកូវីដ-១៩ និងការកើនឡើងនៃអត្រាអ្នកឆ្លងក៏ដោយ។ ប៉ុន្តែ ការងើបឡើងវិញនេះមានភាពខុសគ្នាទៅតាមប្រទេសនីមួយៗនិងនៅមានភាពផុយស្រួយ នៅឡើយ។ លោកជំទាវបានកត់សម្គាល់ថា សម្រាប់កម្ពុជា ភាពអំណោយផលនៃស្ថានភាពសេដ្ឋកិច្ចពិភពលោក គួបផ្សំនឹងជោគជ័យនៃយុទ្ធនាការចាក់វ៉ាក់សាំងបង្ការជំងឺកូវីដ-១៩ ទូទាំងប្រទេស បានជំរុញដល់ការងើបឡើងវិញនៃកំណើនសេដ្ឋកិច្ច ជាមួយនឹងអត្រាកំណើន ៣% នៅឆ្នាំ២០២១ បន្ទាប់ពីបានធ្លាក់ចុះ -៣,១% ក្នុងឆ្នាំ២០២០។
យ៉ាងណាក៏ដោយ ជាមួយកំណើនអត្រា៣% នៅឆ្នាំ២០២១នេះ លោកជំទាវជា សិរី បានគូសបញ្ជាក់ថា ត្រូវបានគាំទ្រជាចម្បងដោយកំណើននៃនាំចេញសម្លៀកបំពាក់ ផលិតផលកសិកម្ម និងផលិតផលកម្មន្តសាលមិនមែនកាត់ដេរ ក៏ដូចជា ពាណិជ្ជកម្មលក់ដុំនិងរាយ ផងដែរ។ ខណៈវិស័យទេសចរណ៍វិញ នៅតែបន្តទទួលរងផលប៉ះពាល់ខ្លាំង ដោយសារការធ្លាក់ចុះនៃភ្ញៀវទេសចរអន្តរជាតិប្រមាណ -៨៥% ក្នុងឆ្នាំ២០២១។ បើតាមលោកជំទាវ ជា សិរី អត្រាប្តូរប្រាក់បន្តមានស្ថិរភាព ជាមធ្យម ៤.០៩៩ រៀល ក្នុង១ដុល្លារអាមេរិក ទោះបីជា បានថយថ្លៃប្រមាណ ១% ប៉ុណ្ណោះ ធៀបនឹងឆ្នាំ២០១៩ ដោយលោកជំទាវចាត់ទុកថា ស្ថិរភាពនេះ បានរួមចំណែកដ៏សំខាន់ក្នុងការរក្សាបានអត្រាអតិផរណាឱ្យស្ថិតក្នុងកម្រិតទាបប្រមាណ ២,៩%នៅឆ្នាំ២០២១ ទោះបីជាពេលវេលាដែលមានការរាតត្បាតកូវីដ១៩ខ្លាំងក៏ដោយ។
បើយោងតាមរបាយការណ៍ស្ថិរភាពហិរញ្ញវត្ថុឆ្នាំ២០២១ របស់ធនាគារជាតិនៃកម្ពុជា បានបង្ហាញថា ទ្រពសកម្ម និងប្រាក់បញ្ញើនៃប្រព័ន្ធធនាគារបានកើនឡើងក្នុងរង្វង់ប្រមាណ ១៨% ដូចគ្នា ខណៈឥណទានបានកើនឡើងជាង២៣,%។ ស្របតាមគោលនយោបាយរបស់ធនាគារជាតិនៃកម្ពុជា គ្រឹះស្ថានធនាគារនិងមីក្រូហិរញ្ញវត្ថុ បានរៀបចំឥណទានឡើងវិញសរុប ៣១ម៉ឺនគណនី ឬគិតជាចំនួនទឹកប្រាក់ស្មើនឹង ២០ទ្រីលានរៀល ឬប្រហែល៥ពាន់លានដុល្លារអាមេរិក ដែលស្មើនឹង១០% នៃឥណទានសរុប ចាប់តាំងពីការរាលដាលនៃជំងឺកូវីដ-១៩។
បើតាមលោកជំទាវ ជា សិរី ក្រៅពីគ្រឹះស្ថានធនាគារនិងមីក្រូហិរញ្ញវត្ថុ វិស័យហិរញ្ញវត្ថុ មិនមែនធនាគារ បានបន្តរីកចម្រើនជាលំដាប់ ដូចជា ទីផ្សារភាគហ៊ុនកម្ពុជា ជាដើម។ លើសពីនោះ ប្រព័ន្ធទូទាត់ឌីជីថល មានការរីកចម្រើនយ៉ាងឆាប់រហ័ស ព្រមទាំងបានជួយសម្រួលដល់លំហូរប្រតិបត្តិការជួញដូរទំនិញនិងសេវាកម្ម ទោះបីក្នុងអំឡុងពេលបិទខ្ទប់ដែលបណ្តាលមកពីការរាលដាលនៃជំងឺកូវីដ-១៩ ដែលរហូតមកដល់ពេលនេះចំនួននៃប្រជាជនកម្ពុជា បានប្រើប្រាស់ប្រព័ន្ធទូទាត់ឌីជីថល មានរហូតជាង ១៣លានគណនី ឬស្មើនឹង៨០% នៃប្រជាជនសរុប។
ស្ថិតក្នុងស្ថានភាពដ៏លំបាកនេះ រាជរដ្ឋាភិបាលនិងធនាគារជាតិនៃកម្ពុជា បានសហការយ៉ាងជិតស្និទ្ធ ដើម្បីស្តារសេដ្ឋកិច្ចឡើងវិញ តាមរយៈដាក់ចេញនូវគោលនយោបាយម៉ាក្រូ ប្រុងប្រយ័ត្ន រូបិយវត្ថុ និងសារពើពន្ធ ប្រកបដោយប្រសិទ្ធភាព។ រាជរដ្ឋាភិបាលកម្ពុជា បានដាក់ចេញវិធានការអន្តរាគមន៍ ដើម្បីជួយដល់គ្រួសារក្រីក្រនិងអាជីវកម្មដែលងាយរងគ្រោះ ដោយសារវិបត្តិជំងឺកូវីដ-១៩។ ជាមួយគ្នានេះ ធនាគារជាតិនៃកម្ពុជាបានរក្សាលក្ខខណ្ឌរូបិយវត្ថុសមស្រប ដើម្បីជំរុញលំហូរឥណទានឱ្យបន្តគាំទ្រសកម្មភាពសេដ្ឋកិច្ច ព្រមទាំងបានអនុញ្ញាតឱ្យមានការរៀបចំឥណទានឡើងវិញ ដើម្បីសម្រាលបន្ទុកដល់ក្រុមហ៊ុន សហគ្រាស ក៏ដូចជា លក្ខណៈគ្រួសារ ជាដើម៕
