ឯកឧត្តម តាន់ ផាន់ណារ៉ា អគ្គនាយក នៃអគ្គនាយកដ្ឋានសុខភាពសត្វ និងផលិតកម្ម បានអះអាងប្រាប់ខេមបូណូមីសថា សព្វថ្ងៃនេះ សកម្មភាពនៃការនាំចូលសត្វមាន់រស់ខុសច្បាប់ពីខាងក្រៅ ពិតជាបន្តកើតមានជាបន្តបន្ទាប់មែន។ ប៉ុន្តែ ឯកឧត្តម បានបញ្ជាក់ថា អគ្គនាយកដ្ឋានសុខភាពសត្វ និងផលិតកម្មសត្វ នឹងរឹតបន្តឹងបន្ថែមលើការងារនេះ ហើយលោកមិនអនុញ្ញាតឡើយចំពោះការនាំចូលសត្វរស់ពីខាងក្រៅដោយខុសច្បាប់។
ពាក់ព័ន្ធការនាំចូលសត្វមាន់រស់ ឯកឧត្តម តាន់ ផាន់ណារ៉ា បានបញ្ជាក់បន្ថែមថា បច្ចុប្បន្ន កម្ពុជា បានកាត់បន្ថយឱ្យមានការនាំចូលសត្វមាន់រស់មកនៅត្រឹមប្រមាណ ១ម៉ឺនក្បាល ប៉ុណ្ណោះ ក្នុងមួយថ្ងៃ ខណៈកាលពីមុនកម្ពុជា បាននាំចូលសត្វមាន់រស់ប្រមាណ ៥ម៉ឺនក្បាល ឯណោះ។
បើតាមមន្ត្រីជាន់ខ្ពស់ក្រសួងកសិកម្មដដែលនេះ បានបញ្ជាក់ថា ការនាំចូលសត្វមាន់នេះ បានបង្កផលប៉ះពាល់ដល់ក្រុមអ្នកចិញ្ចឹមមាន់ក្នុងស្រុកក៏ពិតមែន តែប៉ះពាល់ខ្លាំងជាងគេ ចំពោះអ្នកដែលចិញ្ចឹមមាន់សាច់ ប៉ុណ្ណោះ។ ដើម្បីដោះស្រាយបញ្ហានេះបាន អាជ្ញាធរនៅតាមបណ្ដាខេត្តដែលជាប់ព្រំដែនប្រទេសទាំងអស់ ត្រូវបង្កើនការរឹតត្បិត ដើម្បីឈានដល់ការបញ្ឈប់ការនាំចូលមាន់រស់ទាំងស្រុង នាពេលខាងមុខ។
បើតាមលោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បញ្ហាការនាំចូលសត្វខុសច្បាប់ មិនមែនជារឿងថ្មីនោះទេ សម្រាប់កម្ពុជា។ ទោះយ៉ាងណា សមាគមអ្នកចិញ្ចឹមសត្វកម្ពុជា នៅតែបន្តទាមទារ និងស្នើឱ្យក្រសួង-ស្ថាប័នពាក់ព័ន្ធ ចាត់វិធានការបន្ទាន់ ដើម្បីដោះស្រាយបញ្ហាជូនកសិករចិញ្ចឹមមាន់ក្នុងស្រុកដែលកំពុងជួបបញ្ហាទីផ្សារ ពិបាកប្រកួតប្រជែងនឹងមាន់នាំចូល។
ប្រធានសមាគមរូបនេះ បានអះអាង ថា បច្ចុប្បន្ន កំណើននៃការចិញ្ចឹមមាន់កាន់តែកើនឡើង ពិសេសអំឡុងវិបត្តិកូវីដ-១៩ ដែលធ្វើឱ្យក្រុមអ្នកចិញ្ចឹមមាន់ក្នុងស្រុក មានលទ្ធភាពគ្រប់គ្រាន់សម្រាប់ផ្គត់ផ្គង់ទីផ្សារក្នុងស្រុកខ្លួនឯង ដោយមិនចាំបាច់នាំចូលពីខាងក្រៅបន្ថែមនោះទេ។
អត្ថបទទាក់ទង
ប្រធានសមាគមអ្នកចិញ្ចឹមសត្វរូបនេះ បានសង្កត់ធ្ងន់ថា សកម្មភាពនៃការនាំចូលសត្វពីប្រទេសជិតខាង បានបង្កផលប៉ះពាល់យ៉ាងធ្ងន់ធ្ងរដល់ក្រុមកសិករក្នុងស្រុក និងបានធ្វើឱ្យតម្លៃផលិតផលសត្វ កាន់តែធ្លាក់ចុះ។
ទោះជាបែបនេះក្ដី ការចិញ្ចឹមមាន់ស្រែ និងការចិញ្ចឹមមាន់សាច់ ដែលមានកិច្ចសន្យាទទួលទិញត្រឹមត្រូវពីក្រុមហ៊ុន គឺមិនសូវរងផលប៉ះពាល់ទីផ្សារនោះទេ។
ជាក់ស្ដែង លោក ឡេង ស៊ីវុទ្ធី អ្នកចិញ្ចឹមមាន់ស្រែ នៅខេត្តកំពង់ស្ពឺ បានអះអាង ប្រាប់សារព័ត៌មានខេមបូណូមីស ថា បច្ចុប្បន្ន ទីផ្សារមាន់របស់លោក មិនមានបញ្ហារាំងស្ទះអ្វីនោះទេ លោកអាចលក់មាន់លើទីផ្សារជាប្រចាំ។ កសិកររូបនេះ បានបញ្ជាក់ថា មាន់របស់លោកមានទីផ្សារស្រាប់ ទើបអាចលក់បានជាធម្មតា ដោយមាន់១គីឡូក្រាម អាចលក់បាន ១ម៉ឺន៧ពាន់រៀល ទៅ ១ម៉ឺន៨ពាន់រៀល ក្នុងមួយគីឡូក្រាម។ ដោយឡែក លោក ហេង យ័ន អ្នកចិញ្ចឹមមាន់សាច់ វិញ ក៏អះអាងមិនខុសគ្នា ប៉ុន្មានពីកសិករចិញ្ចឹមមាន់ស្រែដែរ លោកថា មាន់សាច់លោក លក់មិនដែលសល់នោះទេ ព្រោះក្រុមហ៊ុន CP ជាអ្នកទទួលទិញ។
បើតាមការបញ្ជាក់របស់លោក ស្រ៊ុន ពៅ បច្ចុប្បន្ន មាន់បីសាសន៍ មានតម្លៃ ៧ពាន់រៀល ក្នុងមួយគីឡូក្រាម។ រីឯ មាន់សាច់វិញ កសិករអាចលក់បានតម្លៃ ក្រោម៤ពាន់រៀល ប៉ុណ្ណោះ ក្នុងមួយគីឡូក្រាម។ បច្ចុប្បន្ន កម្ពុជាមានលទ្ធភាពផ្គត់ផ្គង់សត្វមាន់ប្រមាណ ១០ម៉ឺនក្បាល ក្នុងមួយថ្ងៃ ហើយកម្ពុជា មានតម្រូវការសត្វមាន់ប្រមាណ ១០ម៉ឺនក្បាល ក្នុងមួយថ្ងៃ ដូច្នេះ កម្ពុជា មិនចាំបាច់នោះទេ ក្នុងការនាំចូលសត្វមាន់ពីខាងក្រៅ។ នេះបើតាមការបញ្ជាក់បន្ថែមរបស់លោក ស្រ៊ុន ពៅ ប្រធានសមាគអ្នកចិញ្ចឹមសត្វកម្ពុជា៕
អត្ថបទ៖ ខន ណារី
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
