ក្រុមហ៊ុនផលិតបន្ទះឈីប SMIC របស់ចិន ដែលបានចុះបញ្ជីនៅផ្សារភាគហ៊ុនទីក្រុងហុងកុង និងសៀងហៃ បានអះអាងថា ប្រាក់ចំណេញនៅក្នុងត្រីមាសពីរ ពោលគឺចាប់ពីខែមេសាដល់ខែមិថុនា បានធ្លាក់ចុះមកនៅត្រឹម ៥១៤ លានដុល្លារ ពោលគឺធ្លាក់ចុះ២៥% បើធៀបនឹងរយៈដូចគ្នាពេលកាលពីឆ្នាំមុន។
ដោយឡែក ចំពោះប្រាក់ចំណូលដុល ដែលក្រុមហ៊ុននេះសម្រេចបាននៅត្រីមាសទី២នេះវិញ គឺបានកើនឡើង ៤២% ពោលគឺមានដល់ដល់ទៅជិត ២ ពាន់លានដុល្លារឯណោះ ដោយបានមកពីការលក់បន្ទះឈីបសម្រាប់ឧបករណ៍ឆ្លាតវៃសម្រាប់ប្រើប្រាស់នៅក្នុងផ្ទះផ្សេងៗ។ ប៉ុន្ដែ ផ្ទុយទៅវិញ ចំពោះតម្រូវការឈីបសម្រាប់ការផលិតស្មាតហ្វូនវិញ ត្រូវបានធ្លាក់ចុះយ៉ាងខ្លាំង។ ទោះជាយ៉ាងណា ប្រាក់ចំណេញបានធ្លាក់ចុះគួរឲ្យកគ់សម្គាល់ផងដែរ។
ទោះយ៉ាង ប្រាក់ចំណេញរបស់ក្រុមហ៊ុននេះ បានរងនូវការប៉ះទង្គិច ខណៈដែលសមត្ថភាពផលិតកម្មក៏មានការថយចុះផងដែរ ដោយសារតែការផ្ទុះឡើងនៃជំងឺកូវីដ១៩ បង្កឲ្យមានការបិទខ្ទប់ និងមានការចំណាយកើនឡើង។
អត្ថបទគួរអាន
ជាមួយគ្នានេះដែរ ការចំណាយដើមទុនបន្ថែមបានកើនឡើងដល់ទៅ ១,៦ ពាន់លានដុល្លារចាប់ពីខែមេសាដល់ខែមិថុនា ហើយសរុបមានចំនួន ២,៥ ពាន់លានដុល្លារបើគិតក្នុងឆមាសទីមួយនៃឆ្នាំ ២០២២ នេះ។ បើគ្មានអ្វីប្រែប្រួលទេនោះ នៅឆ្នាំ២០២២ ក្រុមហ៊ុនយក្ស SMIC នឹងចំណាយដើមទុនសម្រាប់ប្រតិបត្តិការអាជីវកម្មរបស់ខ្លួនដល់ទៅ ៥ពាន់លានដុល្លារឯណោះ។
សូមបញ្ជាក់ថា បច្ចុប្បន្ន ប្រទេសចិន បាននិងកំពុងខិតខំជំរុញខ្លាំងមែនទែន ក្នុងការវិនិយោគពង្រីកសមត្ថភាពលើការផលិតបន្ទះឈីប និងការអភិវឌ្ឍបច្ចេកវិទ្យា ដែលបានធ្វើឲ្យសហរដ្ឋអាមេរិកដែលជាគូប្រជែងដ៏ធំរបស់ខ្លួន នៅមិនសុខនោះឡើយ ដោយថ្មីៗនេះ ទីក្រុងវ៉ាស៊ិនតោន ក៏ទើបតែបានសម្រេចអនុម័តនូវច្បាប់គាំទ្រការផលិតបន្ទះឈីប និងបច្ចេកវិទ្យារបស់ខ្លួន ដែលមានការចំណាយឧបត្ថម្ភធនក្នុងវិស័យនេះ ដល់ទៅជាង៥០ពាន់លានដុល្លារឯណោះ។ ប៉ុន្ដែ ក្រុមសមាគមពាណិជ្ជកម្មធំៗរបស់ចិនបានរិះគន់ថា ច្បាប់ថ្មីរបស់អាមេរិកនេះ គឺនឹងធ្វើឲ្យមានការរាំងស្ទះ រំខាន់ដល់ការផលិតបន្ទះឈីបនៅទូទាំងពិភពលោក៕
