ប្រទេសចិន បានប្រកាសថា នឹងផ្ដល់វ៉ាក់សាំង Sinopharm ប្រមាណ ៥លាន៧សែនដូស ទៅឲ្យប្រទេសវៀតណាម បើទោះបីជា វាមិនមែនជាជម្រើសវ៉ាក់សាំងដែលពលរដ្ឋវៀតណាមជាច្រើនចង់បានក៏ពិតមែន ប៉ុន្ដែ វាកំពុងជួយប្រទេសនេះ អាចបំពេញបាននូវតម្រូវការគម្លាតនៃការផ្គត់ផ្គង់វ៉ាក់សាំងក្នុងស្រុក និងការបង្កើននូវយុទ្ធនាការចាក់វ៉ាក់សាំងផងដែរ។
នៅក្នុងបរិកានយោបាយ ជំនួយវ៉ាក់សាំងរបស់ចិននេះ ក៏បានធ្វើឲ្យមានភាពប្រសើរឡើងចំពោះទំនាក់ទំនងរវាងរដ្ឋាភិបាលនៃប្រទេសជិតខាងគ្នាទាំងពីរនេះផងដែរ។
យោងតាមអង្គការសុខភាពពិភពលោក គិតត្រឹមដើមខែតុលា វ៉ាក់សាំងស៊ីណូហ្វាមចំនួន ២៨% នៃចំនួនវ៉ាក់សាំងនៃការផ្គត់ផ្គង់ទាំងប្រមាណ ១៧លាន៧ សែនដូសរបស់អង្គការសុខភាពពិភពលោក បានផ្ដល់ជូនប្រទេសវៀតណាម។ វ៉ាក់សាំងស៊ីណូហ្វាមស្ថិតនៅលេខរៀងទី២ ក្នុងចំណែកនៃចំនួនចាក់វ៉ាក់សាំងក្នុងប្រទេសវៀតណាម បន្ទាប់ពីវ៉ាក់សាំងអាស្ត្រាហ្សេនីកា ដែលមានចំនួន ៤៨% ខណៈដែលវ៉ាក់សាំងអាមេរិក Pfizer មាន ១១% និង Moderna មាន៨% ។
យ៉ាងណាមិញ ដើម្បីទប់ទល់នឹងវិបត្តិកូវីដ១៩ វៀតណាមពិតជាត្រូវការវ៉ាក់សាំងដើម្បីចាក់ជូនពលរដ្ឋរបស់ខ្លួនជាច្រើនថែមទៀត។ ដូចនេះ ជំនួយបរិច្ចាគរបស់ចិនលើកនេះ ពិតជាធ្វើឡើងចំពេលដែលវៀតណាមត្រូវការខ្លាំងបំផុត ហើយវាកំពុងដើរតួនាទីកាន់តែខ្លាំងឡើងនៅក្នុងយុទ្ធនាការចាក់វ៉ាក់សាំងរបស់វៀតណាមដែលបានចាប់ផ្តើមយឺតជាងប្រទេសដទៃទៀត។ ម្យ៉ាងវិញទៀត តាមរយៈនយោបាយការទូតវ៉ាក់សាំងនេះ បានបន្ធូរភាពតានតឹងរវាងរដ្ឋាភិបាលគណបក្សកុម្មុយនិស្តនៃប្រទេសទាំងពីរនេះផងដែរ។
អត្ថបទគួរអាន
សូមជម្រាបថា តាមរយៈមជ្ឈមណ្ឌលគ្រប់គ្រងជំងឺទីក្រុងហូជីមិញបាននិយាយថា ប្រជាពលរដ្ឋជិត ៣លាននាក់បានទទួលការចាក់វ៉ាក់សាំងស៊ីណូហ្វាម ក្នុងនោះ ពលរដ្ឋរស់នៅទីក្រុងហូជីមិញបានទទួលបានអត្ថប្រយោជន៍ច្រើនជាងគេ។ ជាក់ស្ដែង ពលរដ្ឋរស់នៅទីក្រុងហូជីមិញជាង ៧៦%នៃពលរដ្ឋ ៧ លាននាក់ បានចាក់វ៉ាក់សាំងគ្រប់២ ដូស។
ដោយឡែក បើគិតត្រឹមថ្ងៃទី១៤ តុលា អត្រាសរុបនៃពលរដ្ឋដែលបានចាក់វ៉ាក់សាំងគ្រប់ដូសក្នុងប្រទេសនេះ មានតែ ១៨% នៃពលរដ្ឋជាង ១០០ លាននាក់ប៉ុណ្ណោះ នេះបើយោងតាមទិន្នន័យពិភពលោក៕
អត្ថបទ៖ ស៊ើង និមល់
None
