យ៉ាងណាក៏ដោយចុះ រដ្ឋាភិបាលក្រុងប៉េកាំងនៅតែមានការព្រួយបារម្ភជុំវិញ បញ្ហាធានាឲ្យបាននូវទីផ្សារការងារសម្រាប់ប្រជាជនដ៏ច្រើនសម្បើមរបស់ខ្លួន និងជាពិសេសធានាឲ្យបានទីផ្សារការងារសម្រាប់និស្សិតដែលបានបញ្ចប់ការសិក្សានៅតាមសាកលវិទ្យាល័យ ដែលកំពុងត្រៀមខ្លួនឈានជើងចូលបម្រើការងារក្នុងចំនួនរាប់លាននាក់ក្នុងមួយឆ្នាំៗ។
យោងតាមការចុះផ្សាយរបស់សារព័ត៌មានដ៏ធំដែលមានស្នាក់ការក្នុងទីក្រុងហុងកុង South China Morning Post, ខេមបូណូមីសសូមធ្វើការលើកយកនូវចំណុចគោលសំខាន់ៗមួយចំនួន ទាក់ទងនឹងស្ថានភាព ទីផ្សារការងារក្នុងប្រទេសចិន ថាតើវាមានការវិវត្តប្រែប្រួលយ៉ាងណាខ្លះ?
តើកម្លាំងពលកម្មនៅក្នុងប្រទេសចិនមានទំហំធំប៉ុនណា?
បើតាមរបាយការណ៍ជំរឿនរៀងរាល់១០ឆ្នាំម្តងរបស់ចិនចេញផ្សាយកាលពីឆ្នាំ ២០២០បានបង្ហាញថា ពលរដ្ឋចិនមានអាយុចន្លោះពី ១៥ឆ្នាំ ដល់ ៥៩ឆ្នាំ មានចំនួនជាង ៨៩៤លាននាក់ តំណាងឲ្យជាង ៦៣% នៃពលរដ្ឋសរុប ធ្លាក់ចុះជិត៧% បើធៀបនឹងតួលេខជំរឿនក្នុងឆ្នាំ២០១០។
ការិយាល័យស្ថិតិជាតិរបស់ចិន បានគូសបញ្ជាក់ដែរថា នៅក្នុងខែមិថុនាឆ្នាំ២០២១ មានប្រជាជនប្រហែល ១៤លាននាក់កំពុងត្រៀមខ្លួនចូលក្នុងទីផ្សារការងារសម្រាប់ឆ្នាំ២០២១ ដោយក្នុងនោះមាន ៩លាននាក់ជានិស្សិតទើបបញ្ចប់ការសិក្សា។ ប្រការនេះ ធ្វើឲ្យរដ្ឋាភិបាលចិនកំណត់ចេញទិសដៅ ក្នុងការបង្កើតការងារនៅក្នុងទីក្រុងឲ្យបានដល់ ១១លានកន្លែង។
យ៉ាងណាមិញ តួលេខខាងលើជាតួលេខថយចុះ បើធៀបនឹងឆ្នាំកន្លងមក។ បើតាមការអះអាងពីរដ្ឋាភិបាលចិន កម្លាំងពលកម្មនឹងបន្តធ្លាក់ចុះអស់ ៣៥លាននាក់ទៀត ក្នុងពេល៥ឆ្នាំខាងមុខ ហើយប្រការនះមិនមែនជាសញ្ញាល្អនោះទេ សម្រាប់ប្រទេសចិន។
ការធ្លាក់ចុះកម្លាំងពលកម្មនឹងបន្ថែមសម្ពាធលើប្រព័ន្ធបើកប្រាក់ចូលនិវត្តន៍ដល់ពលរដ្ឋវ័យចំណាស់ និងអ្នកចូលនិវត្តន៍ ហើយវានឹងត្រូវបង្ខំឱ្យរដ្ឋាភិបាលក្រុងប៉េកាំងរៀបចំវិធានការថ្មី ដើម្បីឆ្លើយតបនឹងបញ្ហានេះ។ គួរជម្រាបថា ប្រាក់ដែលគេយកមកបើកឲ្យអ្នកចូលនិវត្តន៍ ច្បាស់ណាស់ វាបានមកពីកម្លាំងពលកម្មថ្មីៗទាំងអស់នៅក្នុងទីផ្សារការងារ។ ដរាបណាអ្នកចូលនិវត្តន៍មានច្រើនជាងកម្លាំងពលកម្មថ្មីៗក្នុងវិស័យការងារ នោះប្រព័ន្ធបើកប្រាក់ចូលនិវត្តន៍នឹងរងការរង្គោះរង្គើជាក់ជាមិនខានឡើយ។
ជុំវិញបញ្ហានេះ អ្នកជំនាញបានព្រមានជារឿយៗថា រដ្ឋាភិបាលក្រុងប៉េកាំងត្រូវតែចាត់វិធានការដោះស្រាយបញ្ហាធ្លាក់ចុះកម្លាំងពលកម្ម និងដោះស្រាយបញ្ហាកំណើនអ្នកចូលនិវត្តន៍ក៏ដូចជាមនុស្សចាស់ឲ្យមានប្រសិទ្ធភាព។
អត្ថបទទាក់ទង
តើបញ្ហាភាពគ្មានការងារធ្វើក្នុងប្រទេសចិនស្ថិតក្នុងសភាពបែបណា?
អត្រាអ្នកគ្មានការងារធ្វើនៅចិន ពិសេសការងារនៅក្នុងទីក្រុង បានហក់ឡើងខ្លាំងក្រោយពីមានរោគរាតត្បាតកូវីដ១៩ ពោលគឺមានប្រមាណ ៦,២% កាលពីខែកុម្ភៈឆ្នាំ២០២០។ ប៉ុន្តែតួលេខនេះបានថមថយបន្តិចវិញត្រឹម ៥% គ្រាដែលកូវីដ-១៩ត្រូវបានគេគ្រប់គ្រងបាន។
ពុំមានរបាយការណ៍ច្បាស់លាស់ណាមួយត្រូវបានផ្សាយចេញនោះទេ ជុំវិញអត្រាប្រចាំឆ្នាំនៃភាពគ្មានការងារធ្វើក្នុងប្រទេសចិន ក្រៅតែពីការស្ទង់មតិឃើញក្នុងអត្រា ៥,៥% ដោយមិនបានរាប់បញ្ចូលអ្នកដែលមានអាជីវកម្មផ្ទាល់ខ្លួន និងពលករនៅក្រៅប្រទេស។ គេគ្រាន់តែបានដឹងថា រដ្ឋាភិបាលចិនបានដាក់គោលដៅបង្កើតការងារក្នុងទីប្រជុំជនឲ្យបានដល់ ១១លានកន្លែងបន្ថែមទៀត។
យុវជនចិនតម្រង់ជួរចូលសម្ភាសន៍ការងារ
តើការចូលនិវត្តន៍ក្នុងប្រទេសចិន គិតត្រឹមអាយុប៉ុន្មាន?
អស់ពេលជាច្រើនឆ្នាំទៅហើយ អាយុដែលត្រូវនឹងកាតព្វកិច្ចចូលនិវត្តន៍នៅក្នុងប្រទេសចិនមិនធ្លាប់បានផ្លាស់ប្តូរនោះទេ ក្នុងនោះសម្រាប់មនុស្សប្រុសត្រូវចូលនិវត្តន៍ត្រឹមអាយុ ៦០ឆ្នាំ រីឯស្ត្រីចូលនិវត្តន៍នៅអាយុ ៥៥ឆ្នាំ។
ក្រោយមើលឃើញពីទីផ្សារការងារថា មានកំណើនយឺតជាងពលរដ្ឋដែលចូលនិវត្តន៍ លោកនាយករដ្ឋមន្ត្រីចិន លី ខើឈាង ធ្លាប់បានបង្ហើបពីផែនការចង់បង្កើនអាយុចូលនិវត្តន៍របស់ប្រជាជន ប៉ុន្តែប្រការនេះត្រូវបានរងការរិះគន់ពីអ្នកលេងបណ្តាញសង្គមនៅចិន ដោយពួកគេបានលើកឡើងថា វាជារឿងអយុត្តិធម៌សម្រាប់ពលរដ្ឋវ័យចំណាស់ដែលដល់អាយុត្រូវចូលនិវត្តន៍ ហើយអ្នកលេងបណ្ដាញសង្គមថែមទាំងបានរិះគន់ចំៗថា បញ្ហានេះមិនមែនជាកំហុសរបស់ពលរដ្ឋនោះទេ វាជាកំហុសក្នុងការអនុវត្តគោលនយោបាយរបស់រដ្ឋចិន ដែលមិនអាចបង្កើតទីផ្សារការងារឲ្យបានច្រើនសម្រាប់កម្លាំងពលកម្មដ៏ច្រើនសម្បើមរបស់ចិន។
សូមជម្រាបថា ពលរដ្ឋចិនមានការកើនឡើងជាលំដាប់ពីមួយឆ្នាំទៅមួយឆ្នាំ ទោះបី ស្ថិតិចុងក្រោយកំណើនពលរដ្ឋចិនស្ថិតក្នុងអត្រាតិចតួចក្តី។ ជំរឿនប្រជាជនចិន ដែលធ្វើឡើងកាលពីចុងឆ្នាំមុនដោយ ការិយាល័យជាតិស្ថិតិចិន បង្ហាញលទ្ធផលឲ្យឃើញថា ចំនួនពលរដ្ឋចិនបានកើនឡើងតិចតួចបំផុតនៅឆ្នាំ២០២០បើធៀបនឹងឆ្នាំ២០១៩ គិតជាភាគរយមានប្រមាណតែ ០,៥%ប៉ុណ្ណោះ។ ទន្ទឹមនឹងការកើនឡើងចំនួនប្រជាជន ទីផ្សារការងារក៏កំពុងកើនឡើងខ្លាំងផងដែរ ជាហេតុធ្វើឲ្យរដ្ឋាភិបាលចិនត្រូវឈឺក្បាលមែនទែន ក្នុងការដោះស្រាយភាពគ្មានការងារធ្វើរបស់ពលរដ្ឋ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
